ଅହମଦାବାଦ୍,୧୫।୩:ଇଂଲଣ୍ଡ ବିପକ୍ଷ ଦ୍ୱିତୀୟ ଟି-୨୦ ମ୍ୟାଚରେ ଭାରତ ୭ ଉଇକେଟ୍ ଜିତିଛି। ୧୬୫ ରନ୍ର ଲକ୍ଷ୍ୟ ପିଛା କରି ଇଶାନ କିଶନ-ଅଧିନାୟକ ବିରାଟ କୋହଲିଙ୍କ ଅର୍ଦ୍ଧଶତକ ବଳରେ ଜିତିଥିଲା ଭାରତ । କୋହଲି ଅପରାଜିତ ୭୩ ରନ ଏବଂ ଇଶାନ କିଶନ ୫୬ ରନ ସଂଗ୍ରହ କରିଥିଲେ। ଦୁହେଁ ୯୨ ରନର ଭାଗିଦାରୀ କରିଥିଲେ। ବିରାଟ କୋହଲି ୭୩ ରନ୍ର ପାଳିରେ ତିନୋଟି ବିଶ୍ୱ ରେକର୍ଡ ସୃଷ୍ଟି କରିଛନ୍ତି। ଅନ୍ତର୍ଜାତୀୟ କ୍ରିକେଟ୍ରେ ୧୨ ହଜାର ରନ ସ୍କୋର କରିବାରେ ବିରାଟ କୋହଲି ଦ୍ରୁତତମ ଅଧିନାୟକ ହୋଇଛନ୍ତି। କୋହଲି ଅଧିନାୟକ ଭାବେ ମାତ୍ର ୨୨୬ ଇନିଂସରେ ୧୨ ହଜାର ଅନ୍ତର୍ଜାତୀୟ ରନ ପୂରଣ କରିଥିଲେ। ତାଙ୍କ ପୂର୍ବରୁ ଏହି ରେକର୍ଡ ରିକି ପଣ୍ଟିଙ୍ଗଙ୍କ ନାମରେ ଥିଲା, ଯିଏ ୨୮୨ ଇନିଂସରେ ଏହି ପ୍ରଦର୍ଶନ କରିଥିଲେ। ଅନ୍ତର୍ଜାତୀୟ କ୍ରିକେଟରେ ଅଧିନାୟକ ଭାବରେ ବିରାଟ କୋହଲି ୧୨ ହଜାର ରନ୍ କରିବାରେ ପ୍ରଥମ ଭାରତୀୟ। ତାଙ୍କ ପୂର୍ବରୁ ଏମଏସ ଧୋନୀ ୧୧୨୦୭ ରନ ସ୍କୋର କରିବାର ରେକର୍ଡ ସର୍ବାଧିକ ଥିଲା।
ଅହମ୍ମଦାବାଦରେ ଖେଳାଯାଇଥିବା ଦ୍ୱିତୀୟ ମ୍ୟାଚରେ ବିରାଟ କୋହଲି ୩୦୦୦ ଅନ୍ତର୍ଜାତୀୟ ଟି -୨୦ ରନ ମଧ୍ୟ ପୂରଣ କରିଛନ୍ତି। ବିରାଟ କୋହଲି ହେଉଛନ୍ତି ବିଶ୍ୱର ପ୍ରଥମ କ୍ରିକେଟର ଯିଏକି ଟି -୨୦ କ୍ରିକେଟରେ ଏହି ସଂଖ୍ୟା ଛୁଇଁଛନ୍ତି। ତାଙ୍କ ପଛକୁ ୨୮୩୯ ରନ୍ କରି ମାର୍ଟିନ ଗୁପତିଲ୍ ଅଛନ୍ତି। ସେହିପରି ବିରାଟ କୋହଲି ଟି -୨୦ ରେ ୫୦ରୁ ଅଧିକ ସ୍କୋର କରି ଆଉ ଏକ ଅର୍ଦ୍ଧଶତକ ହାସଲ କରିଛନ୍ତି। ସେ ଏହି କାମ ୨୫ ଥର କରିଥିବା ରୋହିତ ଶର୍ମାଙ୍କଠାରୁ ଆଗରେ ଅଛନ୍ତି।
