ନୂୂଆଦିଲ୍ଲୀ,୫।୩ : ବିହାରର ଗୋପାଳଗଞ୍ଜ ଜିଲାରେ ୨୦୧୬ରେ ଘଟିଥିବା ମଦ ମୃତ୍ୟୁ ମାମଲାରେ ସ୍ବତନ୍ତ୍ର ଅବକାରୀ କୋର୍ଟ ୯ ଜଣଙ୍କୁ ଫାଶି ଦଣ୍ଡ ଦେଇଛନ୍ତି। ସମାନ ମାମଲାରେ ୪ ଜଣ ମହିଳାଙ୍କୁ ଆଜୀବନ କାରାଦଣ୍ଡ ଶୁଣାଇ ଥିବାବେଳେ ପ୍ରତ୍ୟେକଙ୍କୁ ୧୦ ଲକ୍ଷ ଟଙ୍କାର ଜରିମାନ ମଧ୍ୟ କରାଯାଇଛି। ଗତ ଫେବୃୟାରୀ ୨୬ ତାରିଖରେ ହୋଇଥିବା ମାମଲାର ଶୁଣାଣିରେ ୧୩ ଜଣ ଦୋଷୀ ସାବ୍ୟସ୍ତ ହୋଇଥିଲେ। ଫାଶି ଦଣ୍ଡ ପାଇଥିବା ୯ ଜଣ ଗୋଟିଏ ହିଁ ପରିବରର।
୨୦୧୬, ଅଗଷ୍ଟରେ ବିହାରର ଗୋପାଳଗଞ୍ଜ ଜିଲାର ଖଜୁରବାନି ଅଞ୍ଚଳରେ ଅପମିଶ୍ରିତ ମଦ କାରଣରୁ ୧୯ ଜଣଙ୍କ ମୃତ୍ୟୁ ହୋଇଥିଲା। ଆଉ ଦୃଷ୍ଟି ଶକ୍ତି ହରାଇଥିଲେ ଦୁଇ ଜଣ।
ଉଲ୍ଲେଖଯୋଗ୍ୟ, ସେହି ବର୍ଷ ହିଁ ମଦ ଉପରେ ପ୍ରତିବନ୍ଧକ ଲଗାଇଥିଲେ ମୁଖ୍ୟମନ୍ତ୍ରୀ ନୀତିଶ କୁମାର। ରାଜ୍ୟରେ ମଦ ବ୍ୟାନ ହେବା ପରେ ଏହା ଥିଲା ବିହାରର ସବୁଠୁ ବଡ଼ ଅପମିଶ୍ରିତ ମଦ ମୃତ୍ୟୁ ଘଟଣା। ଏହା ସାମ୍ନାକୁ ଆସିବା ପରେ ଖଜୁରବାନି ଅଞ୍ଚଳରେ ବ୍ୟାପକ ଚଢ଼ାଉ କରାଯାଇ ୫୦୦ ଲିଟର ମଦ ଜବତ କରାଯାଇଥିଲା। ଏହି ଘଟଣାରେ ୩ ଏସ୍ଆଇଙ୍କ ସମେତ ୨୧ ପୋଲିସ କର୍ମୀଙ୍କୁ ନିଲମ୍ବିତ କରିଥିଲେ ମୁଖ୍ୟମନ୍ତ୍ରୀ ନୀତିଶଙ୍କ ନେତୃତ୍ୱାଧୀନ ସରକାର।
