ପଟାଙ୍ଗୀ,୧୪ା୨: ଆନ୍ଧ୍ର ଓଡ଼ିଶାର ସୀମାନ୍ତ ଗ୍ରାମ କୋରାପୁଟ ଜିଲା ପଟାଙ୍ଗୀ ବ୍ଲକ କୋଟିଆ ପଞ୍ଚାୟତର ଫାଟୁସିନେରି ଗ୍ରାମକୁ ନିଜର ବୋଲି ଦାବି ସାବ୍ୟସ୍ଥ କରିବା ପାଇଁ ଶେଷରେ ଶନିବାର ଏହି ଗ୍ରାମରେ ପଞ୍ଚାୟତ ନିର୍ବାଚନ କରିଛି। ବିଜୟନଗରମ ଜିଲା ପ୍ରଶାସନ ସହଯୋଗରେ ସାଲୁର ବ୍ଲକ ପ୍ରଶାସନ ପକ୍ଷରୁ ଫାଟୁସିନେରିରେ ଏକ ନିର୍ମଣାଧୀନ
ଚର୍ଚ୍ଚ ଗୃହରେ ମତଦାନ କେନ୍ଦ୍ର କରି ନିର୍ବାଚନ କାର୍ଯ୍ୟ ଶେଷ କରିଛି। ଫାଟୁସିନେରି ଗ୍ରାମର ସେଧା ରାପୋକାମି (ହିମିରିକା) ସରପଞ୍ଚ ଭାବେ ନିର୍ବାଚିତ ହୋଇଛନ୍ତି। ସେ ଡି. ବେଲଗାବାଲସା ଗ୍ରାମର କୋଣ୍ଡାପାଲି ପାଇଡି ତାଳିଆମ୍ମାଙ୍କୁ ପରାସ୍ତ କରି ବିଜୟୀ ହୋଇଥିବା ରିର୍ଟନିଂ ଅଧିକାରୀ ଏ. ଜନାର୍ଦ୍ଦନ ରାଓ କହିଛନ୍ତି।
ନିର୍ବାଚନ ପ୍ରକ୍ରିୟାରେ ରୋକୋ ଲଗାଇବା ପାଇଁ କୋରାପୁଟ ଜିଲା ପ୍ରଶାସନ ପକ୍ଷରୁ ପୂର୍ବରୁ ଫଗୁଣସିନେରି ଗ୍ରାମରେ କରାଯାଇଥିବା ଜନସେବା କାର୍ଯ୍ୟ ସହ ସାଂସ୍କୃତିକ କାର୍ଯ୍ୟକ୍ରମର କୌଣସି ପ୍ରଭାବ ଗ୍ରାମବାସୀଙ୍କ ଉପରେ ପଡିନାହିଁ। ନିର୍ବାଚନ ପାଇଁ ଫାଟୁସିନେରି ଗ୍ରାମରେ ୮ଟି ଓ୍ବାର୍ଡର ଭୋଟରଙ୍କ ପାଇଁ ୮ଟି ବୁଥ ହୋଇଥିଲା। ଏହିସବୁ ଓ୍ବାର୍ଡର ୧୦୨୫ ଭୋଟରଙ୍କ ମଧ୍ୟରୁ ୬୧୭ ମତଦାନ କରିଥିବା ଜଣାପଡିଛି। ସେମାନଙ୍କ ମଧ୍ୟରେ ମହିଳା ଭୋଟର ୩୦୮ ଥିବା ବେଳେ ପୁରୁଷ ଭୋଟର ୩୦୯ ରହିଥିଲେ। ସକାଳ ସାଢେ ୬ଟାରେ ମତଦାନ ଆରମ୍ଭ ହୋଇ ଅପରାହ୍ନ ୧.୩୫ରେ ଶେଷ ହୋଇଥିଲା। ୨ଟା ପରେ ଭୋଟ ଗଣତି ହୋଇ ଫାଟୁସିନେରି ଗ୍ରାମର ସେଧା ରାପୋକାମି (ହିମିରିକା) ସରପଞ୍ଚ ରୂପେ ନିର୍ବାଚିତ ହୋଇଛନ୍ତି।
