ମେଲବୋର୍ନ, ୭ା୨(ପି.ଟି.)-ପୂର୍ବତନ ଅଧିନାୟକ ଷ୍ଟିଭ୍ ସ୍ମିଥ୍ ତୃତୀୟ ଥର ଆଲାନ ବର୍ଡର ପଦକ ଜିତିଛନ୍ତି। ଅନ୍ୟପକ୍ଷରେ ମହିଳା ବିଭାଗରେ ବେଥ୍ ମୁନି ପ୍ରଥମ ଥର ପାଇଁ ବେଲିଣ୍ଡା କ୍ଲାର୍କ ପୁରସ୍କାର ହାସଲ କରିଛନ୍ତି। ସମସ୍ତ ତିନୋଟି ଫର୍ମାଟର ପ୍ରଦର୍ଶନକୁ ଭିତ୍ତି କରି ସ୍ମିଥ୍ ଏହି ପୁରସ୍କାର ପାଇଛନ୍ତି। ଏହା ହେଉଛି ଅଷ୍ଟ୍ରେଲିଆନ କ୍ରିକେଟର ଦୁଇ ଶ୍ରେଷ୍ଠ ସମ୍ମାନ। ଭୋଟିଂ ପ୍ରକ୍ରିୟାରେ ୨୦୨୦-୨୧ ବର୍ଷର ପୁରସ୍କାର ବିଜେତାଙ୍କୁ ବଛାଯାଇଥିଲା। ଗତ ଭାରତ ବିପକ୍ଷ ସିରିଜରେ ନୈରାଶ୍ୟଜନକ ପ୍ରଦର୍ଶନ ଯୋଗୁ ସ୍ମିଥ୍ ଏଥର ପୁରସ୍କାର ଜିତିବେ ଏହା ଅନେକଙ୍କ କଳ୍ପନା ବାହାରେ ଥିଲା। ସ୍ମିଥ୍ କହିଛନ୍ତି ମାର୍ନସ ଲାବୁସେନ୍ କିମ୍ବା ପ୍ୟାଟ୍ କୁମିନ୍ସ ଏଥର ପୁରସ୍କାର ଜିତିବେ ବୋଲି ତାଙ୍କର ଧାରଣା ଥିଲା, କାରଣ ଉକ୍ତ ବର୍ଷରେ ଉଭୟଙ୍କ ପ୍ରଦର୍ଶନ ପ୍ରଭାବୀ ରହିଥିଲା। ସ୍ମିଥ୍ ଆହୁରି ମଧ୍ୟ ଲେଗ୍ ଆରୋନ ଫିଞ୍ଚ୍ଙ୍କଠାରୁ ୨୮ ଭୋଟ ବ୍ୟବଧାନରେ ଆଗୁଆ ରହି ବର୍ଷର ଶ୍ରେଷ୍ଠ ପୁରୁଷ ଅନ୍ତର୍ଜାତୀୟ ଦିନିକିଆ ଖେଳାଳି ପୁରସ୍କାର ଲାଭ କରିଛନ୍ତି। ଏହି ଦୌଡ଼ରେ ଲେଗ୍ ସ୍ପିନର ଆଡାମ ଜାମ୍ପା (୧୯) ମଧ୍ୟ ରହିଥିଲେ। ସ୍ମିଥ୍ ୬୩.୧୧ ଆଭରେଜରେ ୫୬୮ ରନ ସଂଗ୍ରହ କରିଥିଲେ। ସେ ବାଙ୍ଗାଲୋରରେ ଗୋଟିଏ ଏବଂ ଏସସିଜିଠାରେ ୩ ଦିନ ମଧ୍ୟରେ ଦୁଇଟି ଓ ରାଜକୋଟରେ ୯୮ ରନ ସଂଗ୍ରହ କରିଥିଲେ। ଲେଗ୍ ସ୍ପିନର ଜାମ୍ପା ଓ ଫିଞ୍ଚ୍ଙ୍କୁ ପଛରେ ପକାଇ ଆଷ୍ଟନ ଅଗର ପୁରୁଷ ଟି୨୦ ପ୍ଲେୟର ଅଫ୍ ଦି ଇୟର ପୁରସ୍କାର ଜିତିଛନ୍ତି। ସୂଚନାଯୋଗ୍ୟ, ଗତବର୍ଷ ଡେଭିଡ୍ ଓ୍ବାର୍ନର ଆଲାନ ବର୍ଡର ପଦକ ଏବଂ ଅଲ୍ରାଉଣ୍ଡର ଏଲିସି ପେରି ବେଲିଣ୍ଡା କ୍ଲାର୍କ ପୁରସ୍କାର ଲାଭ କରିଥିଲେ।
