ପୁରୀ ଅଫିସ,୫।୨: ଶ୍ରୀମନ୍ଦିର ଚତୁଃପାର୍ଶ୍ୱସ୍ଥ ୭୫ମିଟର ସୁରକ୍ଷା ଜୋନ୍ରେ ବିକ୍ରିବଟା କରିବାର ଅଧିକାର କାହାରି ନାହିଁ। ଏ ନେଇ ପୂର୍ବରୁ ପ୍ରଶାସନ ପକ୍ଷରୁ ସ୍ପଷ୍ଟୀକରଣ ଦିଆସରିଛି। ଯେ କେହି ବି ଦୋକାନ କରି ବ୍ୟବସାୟ କରୁଥିଲେ ତାହା ସାମୟିକ ଥିଲା ଓ ସବୁଠାରୁ ବଡ଼ କଥା ହେଉଛି ଏହା ପୌରାଞ୍ଚଳ ସ୍ବୀକୃତିପ୍ରାପ୍ତ ନ ଥିଲା। ଉଚ୍ଛେଦ ପାଇଁ ପୁଣି ଥରେ ଡାକବାଜି ଯନ୍ତ୍ର ଯୋଗେ ସୂଚନା ଦେବା କିମ୍ବା ପୋଲିସ ସହାୟତାରେ ଉଠାଦୋକାନୀଙ୍କୁ ଉଠାଇ ଦେବା ଏକ ସ୍ବାଭାବିକ ପ୍ରକ୍ରିୟା। ଶ୍ରୀମନ୍ଦିର ଚାରିପାଖରୁ ଉଠାଦୋକାନୀମାନଙ୍କୁ ହଟାଇ ଦିଆଯିବା ପରେ ପୁରୀ ପୌରପରିଷଦ କାର୍ଯ୍ୟନିର୍ବାହୀ ଅଧିକାରୀ ବିଜୟ କୁମାର ଦାଶ ଏଭଳି ପ୍ରତିକ୍ରିୟା ରଖିଛନ୍ତି। ତେବେ ଶ୍ରୀମନ୍ଦିର ଚାରିପଟେ ଉଠାଦୋକାନୀଙ୍କ ସଂଖ୍ୟା ହାତଗଣତି ନୁହେଁ। ନିର୍ବାହୀ ଅଧିକାରୀ ଯେପରି ଭାବେ ଏହି ସମସ୍ୟାର ସମାଧାନ ହୋଇଯିବ ବୋଲି ଭାବୁଛନ୍ତି, ସେଭଳି କିଛି ହେବା ଭଳି ମନେ ହେଉନାହିଁ। କାରଣ ଉଠାଦୋକାନୀଙ୍କୁ ଉଚ୍ଛେଦ କରାଯିବା ପରେ କଡ଼ା ବିରୋଧ ଦେଖିବାକୁ ମିଳିଛି। ଏ ନେଇ ଶତାଧିକ ଉଠାଦୋକାନୀ ଗୁରୁବାର ଜିଲାପାଳଙ୍କ କାର୍ଯ୍ୟାଳୟ ଅଫିସ ଘେରାଉ କରିଛନ୍ତି। ପ୍ରଥମେ ସେମାନଙ୍କୁ ସ୍ଥାୟୀ ଭାବେ ଥଇଥାନ କରାଯାଇ ପରେ ଉଚ୍ଛେଦ ହେଉ ବୋଲି ସେମାନେ ଦାବି ଜଣାଇଛନ୍ତି। ଏ ସଂକ୍ରାନ୍ତରେ ଜିଲାପାଳ ସମର୍ଥ ବର୍ମାଙ୍କୁ ଏକ ଦାବିପତ୍ର ଦେଇଛନ୍ତି। ସେମାନେ କହିଛନ୍ତି ଯେ, ବର୍ଷ ବର୍ଷ ଧରି ଉଠାଦୋକାନ ଆମର ଏକମାତ୍ର ପନ୍ଥା ହୋଇ ରହିଆସିଛି। ଏବେ ଆମମାନଙ୍କୁ ଉଚ୍ଛେଦ କରାଯିବା ପରେ ଆମ ହାତରୁ ବେଉସା ଚାଲିଯିବ। ପ୍ରଥମ ବିକଳ୍ପ ବ୍ୟବସ୍ଥାରେ ଥଇଥାନ ଓ ପରେ ଉଚ୍ଛେଦ ହେଲେ ହିଁ ପ୍ରଶାସନ ନିଷ୍ପତ୍ତିକୁ ଗ୍ରହଣ କରିବୁ। ସମସ୍ୟାକୁ ହୃଦୟଙ୍ଗମ କରି ବିକଳ୍ପ ରାସ୍ତା ଖୋଜିବା ପାଇଁ ପ୍ରଶାସନକୁ ନିବେଦନ କରାଯାଇଛି। କରୋନା ଭିତରେ ବଡ଼ବଡ଼ିଆଙ୍କ ଆର୍ଥିକ ସ୍ଥିତି ମଧ୍ୟ ବିଗିଡ଼ି ଯାଇଥିଲା। ଏଭଳି ସ୍ଥଳେ ବିନା ପର୍ଯ୍ୟଟକ ଏବଂ ଲକ୍ଡାଉନ -ଶଟଡାଉନ୍ ଭିତରେ ଉଠାବେପାରୀଙ୍କ ଅବସ୍ଥା ସଭିଁଙ୍କୁ ଜଣା ବୋଲି କେତେଜଣ ବ୍ୟବସାୟୀ କହିଛନ୍ତି।
