ଭୁବନେଶ୍ୱର,୧୮।୧(ବ୍ୟୁରେ): କିଡ୍ନୀ ଦେବାକୁ କହି ଲୋକଙ୍କଠାରୁ ବହୁ କୋଟି ଟଙ୍କା ଠକେଇ ର଼୍ୟାକେଟ୍ର ମାଷ୍ଟରମାଇଣ୍ଡ୍ କେନ୍ଦ୍ରାପଡ଼ାର ହିମାଂଶୁ ଭୂଷଣ ନନ୍ଦ ରିମାଣ୍ଡର ଦ୍ୱିତୀୟ ଦିନରେ ପୋଲିସକୁ ବହୁ ଚାଞ୍ଚଲ୍ୟକର ତଥ୍ୟ ଦେଇଛନ୍ତି। ହିମାଂଶୁ ଠକେଇ କରିଥିବା ଟଙ୍କାର ବଡ଼ଭାଗ ବିଭିନ୍ନ ବ୍ୟବସାୟରେ ଲଗାଇଛନ୍ତି। କେବଳ ସାଇ ଇଣ୍ଟେରିଅର ହୋମ୍ରେ ୫୦ଲକ୍ଷ ଟଙ୍କା ବିନିଯୋଗ କରିଥିବା କଥା ସେ ପୋଲିସ ନିକଟରେ କହିଛନ୍ତି। ଏଥିସହ ହିମାଂଶୁଙ୍କ ବୟାନ ଆଧାରରେ ଅଧିକ କିଛି ତଥ୍ୟ ପାଇବା ପାଇଁ ପୋଲିସ ତାଙ୍କ କମ୍ପ୍ୟୁଟରର ହାର୍ଡଡିସ୍କ ଓ ୩ଟି ଏଟିଏମ୍ କାର୍ଡ ଜବତ କରିଛି। ସେହିଭଳି ତାଙ୍କ ବ୍ୟାଙ୍କ ଆକାଉଣ୍ଟରେ ହୋଇଥିବା କାରବାରର ତଥ୍ୟ ହାସଲ କରିଛି ପୋଲିସ। ଅଭିଯୁକ୍ତ କାହାକୁ କେତେ ଟଙ୍କା ଦେଇଛନ୍ତି, କେଉଁଠୁ ତାଙ୍କ ନିକଟକୁ ଟଙ୍କା ଆସିଛି ଆଦି ଅନେକ ଦିଗକୁ ପୋଲିସ ଯାଞ୍ଚ କରୁଥିବା ଥାନା ଅଧିକାରୀ ଶରତ କୁମାର ସାହୁ କହିଛନ୍ତି। ହିମାଂଶୁଙ୍କ ବ୍ୟାଙ୍କ୍ ଆକାଉଣ୍ଟ ତଥ୍ୟରୁ ସମ୍ପୃକ୍ତ ଅନ୍ୟ ଅଭିଯୁକ୍ତଙ୍କୁ ଧରିବାକୁ ଉଦ୍ୟମ ଆରମ୍ଭ ହୋଇଛି। ସୋମବାର ୩ ଦିନିଆ ରିମାଣ୍ଡ ଅବଧି ସରୁଥିବାରୁ ପୋଲିସ ର଼୍ୟାକେଟ୍ ଉପରୁ ସମ୍ପୂର୍ଣ୍ଣ ପର୍ଦ୍ଦା ହଟାଇବାକୁ ମାରାଥନ ଜେରା କରୁଛି। ତେବେ ଡାକ୍ତର ଓ ଘରୋଇ ହସ୍ପିଟାଲର ଲିଙ୍କ୍ ଥିବାନେଇ ହିମାଂଶୁ ପୋଲିସ ଆଗରେ ମୁହଁ ଖୋଲି ନ ଥିବା ସୂଚନା ମିଳିଛି।
ସୂଚନା ଯୋଗ୍ୟ, ହିମାଂଶୁ ଭୁବନେଶ୍ୱରର ଏକ ଘରୋଇ ହସ୍ପିଟାଲର ମାର୍କେଟିଂ ବିଭାଗରେ ଚାକିରି କରୁଥିଲେ। ଏହି ସମୟରେ ସେ ହସ୍ପିଟାଲରେ କିଡ୍ନୀ ଆବଶ୍ୟକ ଥିବା ଲୋକଙ୍କ ସମ୍ପର୍କରେ ତଥ୍ୟ ହାସଲ କରିଥିଲେ। ସେମାନଙ୍କୁ ଯୋଗାଯୋଗ କରି କିଡ୍ନୀ ଦେବାକୁ ମିଥ୍ୟା ପ୍ରତିଶ୍ରୁତି ଦେଇ ଠକେଇ କରୁଥିଲେ। ଟଙ୍କା ନେବା ପରେ ଆଉ ଧରାଛୁଆଁ ଦେଉ ନ ଥିଲେ। ନୟାପଲ୍ଲୀ ପୋଲିସ ହାତରେ ଗିରଫ ହେବାପରେ ହିମାଂଶୁଙ୍କ କଳାକାରନାମା ସାମ୍ନାକୁ ଆସିଥିଲା। ଏହାପରେ ତାଙ୍କ ନାମରେ କମିଶନରେଟ୍ ପୋଲିସରେ ୪ଟି ଅଭିଯୋଗ ହୋଇସାରିଛି।
