ଯାଜପୁର ରୋଡ,୮।୧(ଡି.ଏନ୍.ଏ.): ଯାଜପୁର ଜିଲା କଳିଙ୍ଗନଗର ଶିଳ୍ପାଞ୍ଚଳର ମୁଖଶାଳା ଭାବେ ପରିଚିତ ବ୍ୟାସନଗର ପୌରାଞ୍ଚଳବାସୀ ଏବେ ନାନା ସମସ୍ୟା ମଧ୍ୟରେ ଦିନ କାଟୁଛନ୍ତି। ଗତ ୨ ବର୍ଷରୁ ଊର୍ଦ୍ଧ୍ୱ ହେବ ପୌର ନିର୍ବାଚନ ହେଉ ନ ଥିବାରୁ ପ୍ରଶାସକଙ୍କ ହାତରେ ସହରର ପରିମଳ କ୍ଷମତା ରହିଛି। ହେଲେ ସେଥିରେ ସୁଧାର ଆସିବା ପରିବର୍ତ୍ତେ ଅଧିକ ଅବନତି ଘଟିଛି। ସହରବାସୀ ଆବର୍ଜନା ପାଣି ଓ ମଶା, ମାଛିଙ୍କ ଉପଦ୍ରବରେ ହନ୍ତସନ୍ତ ହେଉଛନ୍ତି। ଏ ସଂକ୍ରାନ୍ତରେ ବାରମ୍ବାର ଅଭିଯୋଗ ହେଲେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ବରଂ ସହରର ସୌନ୍ଦର୍ଯ୍ୟକରଣକୁ ଗୁରୁତ୍ୱ ଦିଆଯାଉଛି। ବ୍ୟାଟେରି ଗାଡିରେ ମଇଳା ଉଠାଇବା ଦାୟିତ୍ୱ ନେଇଥିବା ଗୋଷ୍ଠୀ ୱାର୍ଡ ପରିକ୍ରମା କରୁନାହାନ୍ତି। ପ୍ରତିଦିନ ସକାଳୁ ଘରୁ ବାହାରୁ ଥିବା ଆବର୍ଜନା ଦେବାକୁ ଅପେକ୍ଷା କରୁଥିବା ଗୃହିଣୀମାନେ ପ୍ରଶାସକଙ୍କ କାର୍ଯ୍ୟଦକ୍ଷତା ଉପରେ ଅସନ୍ତୋଷ ପ୍ରକାଶ କରିଛନ୍ତି।
ପୌରାଞ୍ଚଳବାସୀ ମୌଳିକ ସୁବିଧାରୁ ବଞ୍ଚତ୍ତ ହେଉଥିବା ବେଳେ ସୌନ୍ଦର୍ଯ୍ୟକରଣ କାର୍ଯ୍ୟକୁ ପୌର ପରିଷଦ ପକ୍ଷରୁ ଗୁରୁତ୍ୱ ଦିଆଯାଉଛି। ସେହି କାମ ବି ଠିକ୍ ଭାବେ ଚାଲିନାହିଁ। ସେଥିରେ ନାନା ଦୁର୍ନୀତି ହେଉଥିବା ଅଭିଯୋଗ ହୋଇଛି। ରଜତ କୁମାର ପତି ନାମକ ଜଣେ ବ୍ୟକ୍ତି ଟୁଇଟ୍ କରି ପୌରସଂସ୍ଥା ସମ୍ମୁଖ ବ୍ୟାସନଗର ପ୍ରମୋଦ ଉଦ୍ୟାନ ବିକାଶ କାର୍ଯ୍ୟରେ ଅନୁଦାନ ହଡ଼ପ ହେଉଥିବା ସଂକ୍ରାନ୍ତରେ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି। ଜିଲାପାଳଙ୍କ କାର୍ଯ୍ୟାଳୟ ପକ୍ଷରୁ ବି ଏ ନେଇ ରି ଟୁଇଟ୍ କରାଯାଇଛି। ଏଥିରେ ଦର୍ଶାଯାଇଛି ଯେ, ସଂପୃକ୍ତ ଠିକାଦାରଙ୍କୁ ଜରିମାନା କରାଯିବ, ଦରକାର ମୁତାବକ ପଦକ୍ଷେପ ନିଆଯିବ।
ସ୍ବଚ୍ଛ ଓ ସୁସ୍ଥ ପରିମଳ ବ୍ୟବସ୍ଥା ପ୍ରତ୍ୟେକ ପୌରସଂସ୍ଥାର ମୌଳିକ ଦାୟିତ୍ୱ। କିନ୍ତୁ କେହି ଏଥିପ୍ରତି ଦୃଷ୍ଟି ନ ଦେବା ବିଡ଼ମ୍ବନା ଛଡା ଅନ୍ୟ କିଛି ନୁହେଁ ବୋଲି ଅଞ୍ଚଳବାସୀ କହିଛନ୍ତି। ବ୍ୟାସନଗର ପୌରାଞ୍ଚଳର ନିର୍ବାହୀ ଅଧିକାରୀ ଶୁଭେନ୍ଦୁ ଜେନାଙ୍କୁ ଏ ସଂକ୍ରାନ୍ତରେ ପଚାରିବାରୁ ସେ ସନ୍ତୋଷଜନକ ଉତ୍ତର ନ ଦେଇ ଅଭିଯୋଗକୁ ଏଡାଇ ଯାଇଥିଲେ। କେବଳ ବ୍ୟାଟେରି ଗାଡି କାହିଁକି ଯାଉନାହିଁ ବୁଝି କହୁଛି ବୋଲି କହି ଫୋନ କାଟି ଦେଇଥିଲେ। ପରବର୍ତ୍ତୀ ସମୟରେ ତାଙ୍କୁ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲା। ହେଲେ ସେ ଫୋନ ନ ଉଠାଇବାରୁ ତାଙ୍କ ସ୍ପଷ୍ଟ ମତାମତ ମିଳିପାରିନାହିଁ।
