ଭୁବନେଶ୍ୱର,୩।୧୨(ବ୍ୟୁରୋ):ରାଜ୍ୟ ସରକାର କରୋନା ପରୀକ୍ଷା ମାଗଣାରେ କରୁଛନ୍ତି। କିନ୍ତୁ ଘରୋଇ ଲାବରେଟୋରି ବା ହସ୍ପିଟାଲ ପାଇଁ ଧାର୍ଯ୍ୟ ହୋଇଥିବା ଆର୍ଟିପିସିଆର୍ ଟେଷ୍ଟ୍ ମୂଲ୍ୟରେ ସରକାର ପୁଣି ହ୍ରାସ କରିଛନ୍ତି। ପୂର୍ବରୁ ଏଥିପାଇଁ ୧୨ଶହ ଟଙ୍କା ନିଆଯାଉଥିବାବେଳେ ଏଣିକି ସର୍ବାଧିକ ୪୦୦ ଟଙ୍କା ଦେବାକୁ ପଡିବ। ନିର୍ଦ୍ଧାରିତ ହୋଇଥିବା ଏହି ମୂଲ୍ୟ ମଧ୍ୟରେ ଜିଏସ୍ଟି ଅନ୍ତର୍ଭୁକ୍ତ ରହିଛି। ଏ ନେଇ ବୁଧବାର ସ୍ବାସ୍ଥ୍ୟ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ଏଥିସହ ପୂର୍ବରୁ ଅର୍ଥାତ୍ ଗତ ଅଗଷ୍ଟ ୨୫ରେ ଜାରି ବିଜ୍ଞପ୍ତିକୁ ରାଜ୍ୟ ସରକାର ବାତିଲ୍ କରିଛନ୍ତି। ଘରୋଇ ଲାବରେଟୋରିଗୁଡ଼ିକ ପକ୍ଷରୁ କରାଯାଉଥିବା ସମସ୍ତ କରୋନା ଟେଷ୍ଟ ଭୁବନେଶ୍ବରର ଆର୍ଏମ୍ଆର୍ସି ତତ୍ତ୍ବାବଧାନରେ ହେବ ଓ ଆଇସିଏମ୍ଆର୍ ଗାଇଡ୍ଲାଇନ୍ ଅନୁସାରେ ପରୀକ୍ଷା କରାଯିବ ବୋଲି ନିର୍ଦ୍ଦେଶ ରହିଛି।
ପ୍ରଥମେ ଆର୍ଟିପିସିଆର୍ ଟେଷ୍ଟ ପାଇଁ ସରକାର ୨,୨୦୦ ଟଙ୍କା ସ୍ଥିର କରିଥିଲେ। ଜିଏସ୍ଟି ସହ ଅନ୍ୟ ଖର୍ଚ୍ଚକୁ ମିଶାଇ ବିଭିନ୍ନ ଘରୋଇ ଲାବ୍ ଓ ହସ୍ପିଟାଲରେ ରୋଗୀଙ୍କଠାରୁ ୨୪ ଶହରୁ ୫ ହଜାର ଟଙ୍କା ଯାଏ ନିଆଯାଉଥିଲା। ଏହାପରେ ସରକାର ଆର୍ଟିପିସିଆର୍ ଟେଷ୍ଟର ମୂଲ୍ୟ ୧,୨୦୦ ଟଙ୍କା କରିଥିଲେ ମଧ୍ୟ ଘରୋଇ ହସ୍ପିଟାଲରେ ନମୁନା କଲେକ୍ସନ ଓ ଅନ୍ୟାନ୍ୟ ଖର୍ଚ୍ଚ ପାଇଁ ଅଲଗା ବିଲ୍ କରି ଶୋଷଣ କରାଯାଉଥିଲା। ଏ ନେଇ ମାମଲା ସୁପ୍ରିମକୋର୍ଟରେ ପହଞ୍ଚତ୍ଥିଲା। ଆର୍ଟିପିସିଆର ଟେଷ୍ଟ ବାବଦକୁ ନିଆଯାଉଥିବା ଅଧିକ ଟଙ୍କା ଏକ ପ୍ରକାର ଲୁଟ୍ ବୋଲି ଜଣେ ଆଇନଜୀବୀ ତାଙ୍କ ଆବେଦନରେ ଦର୍ଶାଇବା ସହ ଏହାର ମୂଲ୍ୟ ସର୍ବାଧିକ ୪୦୦ ଟଙ୍କା କରିବାକୁ ନିବେଦନ କରିଥିଲେ। ଏହା ଉପରେ ଶୁଣାଣି କରି ସୁପ୍ରିମକୋର୍ଟଙ୍କ ଖଣ୍ଡପୀଠ କେନ୍ଦ୍ର ସରକାରଙ୍କୁ ନୋଟିସ କରିଥିଲେ। ଏହି ଆଧାରରେ ରାଜ୍ୟ ସରକାର ନୂଆ ବିଜ୍ଞପ୍ତି ଜାରି କରିବା ସହ ଏବାବଦ ମୂଲ୍ୟରେ ପରିବର୍ତ୍ତନ କରିଥିବା କୁହାଯାଉଛି।
ଅନ୍ୟପଟେ ରାଜ୍ୟରେ ହୋମ୍ ଆଇସୋଲେଶନରେ ରହୁଥିବା କରୋନା ଆକ୍ରାନ୍ତଙ୍କ ଘରେ ଆଉ ପୋଷ୍ଟର ଲଗାଯିବ ନାହିଁ। ଏ ନେଇ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ବୁଧବାର ରାଜ୍ୟର ସମସ୍ତ ଜିଲାପାଳ ଓ ଜିଲା ଚିକିତ୍ସାଧିକାରୀଙ୍କୁ ଚିଠି ଲେଖି ଜଣାଯାଇଛି। ଉକ୍ତ ଚିଠିରେ ଉଲ୍ଲେଖ ରହିଛି ଯେ, ରାଜ୍ୟରେ କରୋନା ସଂକ୍ରମଣ ହ୍ରାସ ପାଉଛି। ତେଣୁ ବର୍ତ୍ତମାନ ଘରେ ଯେଉଁ ଆକ୍ରାନ୍ତମାନେ ହୋମ୍ ଆଇସୋଲେଶନରେ ରହୁଛନ୍ତି, ସେମାନଙ୍କ ଘର ବାହାରେ ଆଉ ପୋଷ୍ଟର ଲଗା ହେବା ଜରୁରୀ ନୁହେଁ ବୋଲି ଅନୁଭବ ହେଉଛି। ତେଣୁ ଯଥାଶୀଘ୍ର ଏହାକୁ ପାଳନ କରିବା ପାଇଁ ନିର୍ଦ୍ଦେଶ ଦିଆଯାଇଛି। ସେହିଭଳି ସଂକ୍ରମଣ ଆଉ ସେପରି ହେଉ ନ ଥିବାରୁ ଓ ବର୍ତ୍ତମାନର ସ୍ଥିତିକୁ ଦୃଷ୍ଟିରେ ରଖି କରୋନା ଚିକିତ୍ସାରେ ସାମିଲ ଥିବା ଆୟୁଷ ଡାକ୍ତରଙ୍କୁ ମୁକ୍ତ କରିବାକୁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି।
