ମୁମ୍ବାଇ, ୬।୧୦: ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା ମାମଲାରେ ପ୍ରତିଦିନ ନୂଆ ଖବର ଯୋଡ଼ି ହେବାରେ ଲାଗିଛି। ଏବେ ମୁମ୍ବାଇ ପୋଲିସ ପକ୍ଷରୁ ନୂଆ ତଥ୍ୟ ପଦାକୁ ଆସିଛି। ମୁମ୍ବାଇ ପୋଲିସକୁ ବଦନାମ୍ କରିବା ଲାଗି ତିଆରି ହୋଇଥିଲା ୮୦ ହଜାରରୁ ଅଧିକ ଫେକ୍ ସୋସିଆଲ୍ ମିଡ଼ିଆ ଆକାଉଣ୍ଟ ତିଆରି କରାଯାଇଥିଲା। ମୁମ୍ବାଇ ପୋଲିସର ସାଇବର ଟିମ୍ ଏହାର ଯାଞ୍ଚ୍ କରିଛନ୍ତି। ମୁମ୍ବାଇ ପୋଲିସ କମିଶନର ପରମବୀର ସିଂଙ୍କ ନିର୍ଦ୍ଦେଶରେ ସାଇବର ଟିମ୍ ପକ୍ଷରୁ ଏନେଇ ଏକ ମାମଲା ଦାଏର କରାଯିବାର ଯୋଜନା ରହିଛି। ଅଧିକାଂଶ ଫେକ୍ ଆକାଉଣ୍ଟ୍ ବିଦେଶରୁ ଅପରେଟ୍ ହେଉଥିବା କମିଶନର କହିଛନ୍ତି। ଇଟାଲୀ, ଜାପାନ, ପୋଲାଣ୍ଡ, ସ୍ଲୋଭାନିଆ, ଇଣ୍ଡୋନେସିଆ, ତୁର୍କି, ଥାଇଲାଣ୍ଡ୍, ରୋମାନିଆ ଆଦି ଦେଶରୁ ଫେକ୍ ଆକାଉଣ୍ଟ୍ ଗୁଡ଼ିକୁ ଅପରେଟ କରାଯାଉଥିବା ସେ ସୂଚନା ଦେଇଛନ୍ତି। ଇନଷ୍ଟାଗ୍ରାମ୍, ଟୁଇଟର ଏବଂ ଫେସ୍ବୁକ୍ ସମେତ ଅନ୍ୟ ସୋସିଆଲ୍ ମିଡ଼ିଆ ପ୍ଲାଟଫର୍ମରେ ଏଭଳି ଆକାଉଣ୍ଟ ଗୁଡ଼ିକ ଖୋଲାଯାଇ ମୁମ୍ବାଇ ପୋଲିସ ସମ୍ପର୍କରେ ବିଭ୍ରାନ୍ତିକର ତଥ୍ୟ ଅପଲୋଡ୍ କରାଯାଉଥିବା ପରମବୀର ସିଂ କହିଛନ୍ତି।
