ପୁରୀ ଅଫିସ, , ୨୪।୯:ଶ୍ରୀମନ୍ଦିରର ୩ଟି ପ୍ରମୁଖ କବାଟ ରୁପା ଛାଉଣି ହେବ। କଳାହାଟ ଦ୍ୱାର, ବେହେରଣ ଦ୍ୱାର ଏବଂ ଜୟବିଜୟ ଦ୍ୱାରରେ ଲାଗିଥିବା କବାଟଗୁଡ଼ିକୁ ରୁପା ଛାଉଣି କରାଯିବ। ଏଥିପାଇଁ ଆବଶ୍ୟକ ରୁପା ଜଣେ ଦାତା ଦେବେ। ତେବେ ପୂର୍ବରୁ ଏହି ନିଷ୍ପତ୍ତି ନିଆଯାଇଥିବା ବେଳେ ବୁଧବାରଠାରୁ ଏହାର ପ୍ରକ୍ରିୟା ଆରମ୍ଭ ହୋଇଛି। ଉପରୋକ୍ତ ୩ କବାଟର ମାପ ନେଇଛନ୍ତି ଦାତାଙ୍କ ପକ୍ଷରୁ ଆସିଥିବା ମୁମ୍ବାଇର ୪ ଜଣିଆ ପ୍ରତିନିଧି। ଶ୍ରୀମନ୍ଦିରର ନିର୍ବାହୀ ଯନ୍ତ୍ରୀ ଆଶିଷ ସୁବୁଦ୍ଧିଙ୍କ ନେତୃତ୍ୱରେ ପ୍ରତିନିଧିମାନେ ମାପଚୁପ କରିଛନ୍ତି। ଏମାନଙ୍କ ମଧ୍ୟରେ ରୁପା କାରିଗର ରହିଥିବା ଜଣାପଡ଼ିିଛି।
ସୂଚନା ଅନୁଯାୟୀ, ଜଣେ ବଦାନ୍ୟ ବ୍ୟକ୍ତି ଏଥିପାଇଁ ରୁପା ଦାନ କରିବା ଲାଗି ଆଗ୍ରହ ପ୍ରକାଶ କରିଥିଲେ। ଏହାକୁ ଆଧାର କରି ଶ୍ରୀମନ୍ଦିର ପ୍ରଶାସନ ୩ଟି କବାଟ ରୁପା ଛାଉଣି ଲାଗି ନିଷ୍ପତ୍ତି ନେଇଛି। ଏହି ତିନୋଟି ଯାକ ଦ୍ୱାର କବାଟ ମଧ୍ୟ ନଷ୍ଟ ଅବସ୍ଥାକୁ ଚାଲି ଆସିଲାଣି। ଶ୍ରୀମନ୍ଦିର ପ୍ରଶାସନର ଜଣେ ଅଧିକାରୀ କହିଛନ୍ତି, ପ୍ରଥମେ ବର୍ମାଟିକ କାଠରେ ୩ଟି ଦ୍ୱାର ପାଇଁ ନୂଆ କବାଟ ତିଆରି କରାଯିବ। ଏହାପରେ ଏହି କବାଟଗୁଡ଼ିକରେ ୧.୬୩ ଇଞ୍ଚର ରୁପା ଛାଉଣି କରାଯିବାକୁ ପ୍ରାଥମିକ ଭାବେ ଆଲୋଚନା କରାଯାଇଛି। ୩ଟି କବାଟରେ ପ୍ରାୟ ୧,୯୨୦ କେଜି ରୁପା ଲାଗିବ। ଅର୍ଥାତ୍ ପ୍ରାୟ ୧୪ କୋଟି ଟଙ୍କାର ରୁପା ଲାଗିବ ବୋଲି ଆକଳନ କରାଯାଇଛି। ସେହିପରି କାଗରିଗରଙ୍କ ପାରିଶ୍ରମିକ ବାବଦରେ ପ୍ରାୟ ୧.୫ କୋଟି ଟଙ୍କା ଖର୍ଚ୍ଚ ହେବ। ଏଥିପାଇଁ ବର୍ମାଟିକ୍ କାଠ ମଧ୍ୟ କିଣାଯିବ। ଏହି ୩ଟି କବାଟ ସମ୍ପୂଣ୍ଣର୍ର୍ ହେବାରେ ପ୍ରାୟ ୧୮ରୁ ୨୦ କୋଟି ଟଙ୍କା ଖର୍ଚ୍ଚ ହେବ ବୋଲି ସମ୍ପୃକ୍ତ ଅଧିକାରୀ ସୂଚନା ଦେଇଛନ୍ତି। ସବୁଠୁ ଗୁରୁତ୍ୱପୂର୍ଣ୍ଣ ହେଉଛି ଶ୍ରୀମନ୍ଦିରର ସଂସ୍କୃତି, ଐତିହ୍ୟ, ପରମ୍ପରା ହେଉଛି ବିଶ୍ୱରେ ଅନନ୍ୟ। ୩ଟି ଦ୍ୱାର ସହ ମହାପ୍ରଭୁଙ୍କ ନୀତିକାନ୍ତିର ବି ସମ୍ପର୍କ ରହିଛି। ତେଣୁ ଏ ସମସ୍ତ ଦିଗକୁ ନଜରରେ ରଖି ମରାମତି ଏବଂ ରୁପା ଛାଉଣି କରାଯିବ ବୋଲି ଜଣାପଡ଼ିଛି। ଏ ସମ୍ପର୍କରେ ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା କହିଛନ୍ତି, ରୁପା ଛାଉଣି ପାଇଁ ଦାତାଙ୍କ ପକ୍ଷରୁ ଆସିଥିବା ପ୍ରତିନିଧିମାନେ ୩ଟି କବାଟର ମାପ ନେଇଛନ୍ତି।
