ନୂଆଦିଲ୍ଲୀ,୨୧ା୮(ପି.ଟି.): ଅଦାଲତ ଅବମାନନା ମାମଲାରେ ବରିଷ୍ଠ ଆଇନଜୀବୀ ପ୍ରଶାନ୍ତ ଭୂଷଣଙ୍କୁ ସୁପ୍ରିମକୋର୍ଟର ୩ ଜଣିଆ ଖଣ୍ଡପୀଠ ଦୋଷୀ ସାବ୍ୟସ୍ତ କରିଥିବାବେଳେ ଗୁରୁବାର ଦଣ୍ଡ ଶୁଣାଣି ଥିଲା। ହେଲେ ଦେଶବ୍ୟାପୀ ପ୍ରଶାନ୍ତଙ୍କ ପ୍ରତି ସମର୍ଥନ ବୃଦ୍ଧି ପାଇଥିବାବେଳେ ସୁପ୍ରିମକୋର୍ଟ ବିଚାରପତିଙ୍କ କାର୍ଯ୍ୟକଳାପ ବିରୋଧରେ ବାତାବରଣ ସୃଷ୍ଟି ହୋଇଛି। ସୁପ୍ରିମକୋର୍ଟ ପ୍ରଶାନ୍ତଙ୍କୁ କ୍ଷମା ମାଗିବା ପାଇଁ କହିଥିଲେ ମଧ୍ୟ ସେ ତାହାକୁ ଅସ୍ବୀକାର କରିଥିଲେ। ଫଳରେ ଗୁରୁବାର ସୁପ୍ରିମକୋର୍ଟ ରାୟ ଦେବା ପରିବର୍ତ୍ତେ ଏଥିପାଇଁ ଚିନ୍ତା କରିବାକୁ ଆଉ୨/୩ ଦିନ ସମୟ ଦେଇଛନ୍ତି। ଅପରପକ୍ଷରେ ଦଣ୍ଡବିଧାନ ଶୁଣାଣି ବୃହତର ଖଣ୍ଡପୀଠରେ କରିବା ପାଇଁ ପ୍ରଶାନ୍ତ କରିଥିବା ଆବେଦନକୁ ଅଦାଲତ ଖାରଜ କରିଦେଇଛନ୍ତି। ଦୋଷୀସାବ୍ୟସ୍ତ ରାୟ ବିରୋଧରେ ସେ କରିଥିବା ରିଭ୍ୟୁ ପିଟିଶନ ଉପରେ ନିଷ୍ପତ୍ତି ନ ହେବା ପର୍ଯ୍ୟନ୍ତ ପ୍ରଶାନ୍ତଙ୍କୁ ଦଣ୍ଡବିଧାନ କରାଯିବ ନାହିଁ ବୋଲି ଜଷ୍ଟିସ୍ ଅରୁଣ ମିଶ୍ରଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ପ୍ରତିଶ୍ରୁତି ଦେଇଛନ୍ତି। ଖଣ୍ଡପୀଠରେ ଜଷ୍ଟିସ୍ ବି.ଆର୍. ଗାଭି ଏବଂ କ୍ରିଷ୍ଣ ମୁରାରୀ ରହିଛନ୍ତି। ନ୍ୟାୟପାଳିକା ବିରୋଧରେ ଅଦାଲତ ଅବମାନନା ଟୁଇଟ୍ ପାଇଁ କ୍ଷମା ମାଗିବାକୁ ପ୍ରଶାନ୍ତ ଭୂଷଣ ମନା କରିଦେଇଥିବାରୁ ଏଭଳି ଅବଜ୍ଞାପୂର୍ଣ୍ଣ ମନ୍ତବ୍ୟର ପୁନର୍ବିଚାର ଲାଗି ଅଦାଲତ ତାଙ୍କୁ ଦୁଇ ତିନି ଦିନ ସମୟ ଦେଇଛନ୍ତି। ପ୍ରଶାନ୍ତ ତାଙ୍କ ଓକିଲମାନଙ୍କ ସହ ପରାମର୍ଶ କରି ଏହା ଉପରେ ନିଷ୍ପତ୍ତି ନେବେ ବୋଲି ଖଣ୍ଡପୀଠକୁ କହିଛନ୍ତି। ଅଦାଲତ ଅବମାନନା ମାମଲାରେ ପ୍ରଶାନ୍ତ ଭୂଷଣ ଦୋଷୀସାବ୍ୟସ୍ତ ହୋଇସାରି ଥିବାରୁ ତାଙ୍କୁ କୌଣସି ଦଣ୍ଡ ନ ଦେବା ପାଇଁ ଆଟର୍ନି ଜେନେରାଲ କେ.କେ. ବେଣୁଗୋପାଳ ଖଣ୍ଡପୀଠଙ୍କୁ ଅନୁରୋଧ କରିଥିଲେ। ତେବେ ପ୍ରଶାନ୍ତ ତାଙ୍କ ପୂର୍ବ ବିବୃତିର ପୁନର୍ବିଚାର ନ କରିବା ପର୍ଯ୍ୟନ୍ତ ବେଣୁଗୋପାଳଙ୍କ ଅନୁରୋଧକୁ ବିଚାରକୁ ନିଆଯିବ ନାହିଁ ବୋଲି ଖଣ୍ଡପୀଠ ସ୍ପଷ୍ଟ କରିଦେଇଛନ୍ତି। ଯଦି ପ୍ରଶାନ୍ତ ତାଙ୍କ ଭୁଲ୍ ପାଇଁ ଅନୁତାପ କରନ୍ତି ତେବେ ଅଦାଲତ ନରମ ଆଭିମୁଖ୍ୟ ଗ୍ରହଣ କରିପାରିବେ ବୋଲି ଖଣ୍ଡପୀଠ କହିବା ସହ ପରବର୍ତ୍ତୀ ଶୁଣାଣି ୨୪ରେ କରିବାକୁ ଧାର୍ଯ୍ୟ କରିଛନ୍ତି। ସାଧାରଣତଃ ଅଦାଲତ ଅବମାନନା ମାମଲାରେ ଦୋଷୀସାବ୍ୟସ୍ତ ହେଲେ ୬ ମାସ ପର୍ଯ୍ୟନ୍ତ ଜେଲ, କିମ୍ବା ୨୦୦୦ ଟଙ୍କା ପର୍ଯ୍ୟନ୍ତ ଜରିମାନା କିମ୍ବା ଉଭୟ ହୋଇପାରେ।
