ନୂଆଦିଲ୍ଲୀ,୮।୮: କେରଳର କୋଝିକୋଡ ବିମାନବନ୍ଦରରେ ଶୁକ୍ରବାର ଏୟାର ଇଣ୍ଡିଆ ଏକ୍ସପ୍ରେସର ଏକ ବିମାନ ଦୁର୍ଘଟଣାଗ୍ରସ୍ତ ହେବା ଫଳରେ ୨ ପାଇଲଟଙ୍କ ସମେତ ୧୮ ଜଣଙ୍କ ମୃତ୍ୟୁ ହୋଇଛି। କେରଳରେ ପ୍ରବଳ ବର୍ଷ ହେଉଥିବା ସମୟରେ ବନ୍ଦେ ଭାରତ ମିଶନର ଏହି ବିମାନଟି ଦୁବଇରୁ ଆସି କୋଝିକୋଡ ବିମାନ ବନ୍ଦରରେ ଅବତରଣ କରିବା ସମୟରେ ରନ୍ଓ୍ବେରୁ ଖସି ଯାଇ ଦୁର୍ଘଟଣାର ଶିକାର ହୋଇଥିଲା। ଏବେ ଜଣାପଡିଛି କି କୋଝିକୋଡ ବିମାନବନ୍ଦରର ରନ୍ଓ୍ବେକୁ ନେଇ ଡିରେକ୍ଟୋରେଟ ଜେନରାଲ ଅଫ୍ ସିଭିଲ ଆଭିଏଶନ(ଡିଜିସିଏ) ବହୁ ପୂର୍ବରୁ ସତର୍କ କରାଇ ସାରିଥିଲା। ଡିଜିସିଏ କହିଥିଲା କି ଏହି ରନଓ୍ବେ ଉପରେ ଯେକୌଣସି ସମୟରେ କିଛି ବି ଘଟିପାରେ। ଏହାଏକ ଟେବଲ ଟପ୍ ରନ୍ଓ୍ବେ। ଏହାର ଅର୍ଥ ହେଉଛି ରନ୍ଓ୍ବେ ସାମାନ୍ୟ ଉଚ୍ଚତାରେ ରହିଛି ଓ ଏହାର ଦୁଇପାର୍ଶ୍ୱ ମାଟି ଖାଲୁଆ ରହିଛି। ଆହୁରି ମଧ୍ୟ ଏହା ଆବଶ୍ୟକତାଠାରୁ ଛୋଟ ରନଓ୍ବେ ଓ ଏହା ସରିବା ମାତ୍ରେ ୩୦ ଫୁଟ ଗହିର ଘାଟି ବି ରହିଛି। ଏସବୁକୁ ଦେଖିଲେ ବିମାନ ଦୁର୍ଘଟଣା ପରେ ଉଦ୍ଧାର କାର୍ଯ୍ୟରେ ମଧ୍ୟ ବାଧା ଉପୁଜୁଛି।
