ଆଜିକାଲି ସୋସିଆଲ ମିଡିଆରେ ଯିଏ ଯାହା ପାରୁଛି ପୋଷ୍ଟ କରୁଛି। ସତେ ଯେମିତି ଏଥିପ୍ରତି କଟକଣା ନାହିଁ। ବିଶେଷକରି ହ୍ବାଟ୍ସଆପ୍ ଗ୍ରୁପ୍ରେ ମିଥ୍ୟା ଖବର, ଘୃଣା, ଜାତି, ଧର୍ମ, ବର୍ଣ୍ଣର ଭେଦଭାବ ସମ୍ବନ୍ଧୀୟ ଖବର ସମ୍ପର୍କରେ ଜାଣିବାକୁ ମିଳୁଛି। ତେଣୁ ଏଥିରେ ରୋକ୍ ଲଗାଇଛି ଫରିଦାବାଦ ପୋଲିସ। ପୋଲିସ ଆୟୁକ୍ତ ଓପି ସିଂହ ଏଥିରୁ ନିବୃତ୍ତ ରହିବାକୁ ହ୍ବାଟ୍ସଆପ୍ ବ୍ୟବହାରକାରୀଙ୍କୁ ନିର୍ଦ୍ଦେଶ ଜାରି କରିଛନ୍ତି।
ସେ କହିଛନ୍ତି, ହ୍ବାଟ୍ସଆପ୍ ଗ୍ରୁପ୍ରେ ମିଥ୍ୟା ଖବର ପ୍ରଚାରିତ ହେଉଛି। ଫଳରେ ଶାନ୍ତି ଭଙ୍ଗ ହେଉଛି। ଏପରି ଖବର ଆଇନ ବ୍ୟବସ୍ଥା ପ୍ରତି ବିପଦ ସୃଷ୍ଟି କରୁଛି। ଫରିଦାବାଦ ପୋଲିସ ପକ୍ଷରୁ କଡ଼ା ନିୟମ କରାଯାଇଛି କି ହ୍ବାଟ୍ସଆପ୍ ଗ୍ରୁପ୍ରେ ଅଶାଳୀନ ଭାଷା ପ୍ରୟୋଗ ନ କରିବା କିମ୍ବା କାହା ସହ ଏପରି ଭାଷା ଶେୟାର ନ କରିବା, ମିଥ୍ୟା ଖବର ପ୍ରଚାର ନ କରିବା, ଘୃଣା କିମ୍ବା ଅନ୍ୟ ଭୁଲ ପରି ପୋଷ୍ଟ ଗ୍ରୁପ୍ରେ ଶେୟାର ନ କରିବା, କୌଣସି ଆପତ୍ତିଜନକ ପୋଷ୍ଟ ନ କରିବା, ଯଦିଓ ଆପଣଙ୍କ ନିକଟକୁ ଏପରି କିଛି ଫଟୋ ଆସୁଛି ତାହାକୁ ତୁରନ୍ତ ଡିଲିଟ୍ କରିବା, ହିଂସାତ୍ମକ ଭିଡିଓ ଶେୟାର ନ କରିବା, ଅଶ୍ଲୀଳ ଭିଡିଓ ଶେୟାର ନ କରିବା, କୌଣସି ଜାତି ଧର୍ମକୁ ନେଇ ଆକ୍ଷେପମୂଳକ କଥା ନ କହିବା ଆଦି ପ୍ରତି କଟକଣା ଜାରି କରାଯାଇଛି। ଏତଦ୍ବ୍ୟତୀତ ଗ୍ରୁପ୍ ଆଡ୍ମିନ୍ ଗ୍ରୁପ୍ରେ ନିୟମିତ ଭାବେ ସକ୍ରିୟ ରହିବା ଏବଂ ଗ୍ରୁପ୍ରେ ଥିବା ଅନ୍ୟ ସଦସ୍ୟମାନେ ଯେପରି ଏସବୁ ଦିଗରୁ ନିବୃତ୍ତ ରହିବେ ସେଥିପ୍ରତି ଧ୍ୟାନ ଦେବା ଜରୁରୀ।
ପୋଲିସ ପକ୍ଷରୁ କୁହାଯାଇଛି, ଏପରି ଅଭିଯୋଗ ଯାହା ବିରୋଧରେ ଆସିବ ତାକୁ ଜେଲ୍ଦଣ୍ଡ ଭୋଗିବାକୁ ପଡ଼ିବ।
