ବିଗ୍ ବି ଅମିତାଭ ବଚ୍ଚନ କରୋନା ସଂକ୍ରମିତ ହୋଇ ଏବେ ମୁମ୍ବାଇର ନାନାବତୀ ହସ୍ପିଟାଲରେ ଚିକିତ୍ସିତ ହେଉଛନ୍ତି। ତାଙ୍କ ଆରୋଗ୍ୟ କାମନା କରି ଦେଶର ଅନେକ ସ୍ଥାନରେ ପୂଜାର୍ଚ୍ଚନା ମଧ୍ୟ ଚାଲିଛି। ଏହି ସମୟରେ ପୂର୍ବତନ କ୍ରିକେଟର ମହମ୍ମଦ କୈଫ୍ ଏକ ରୋଚକ ଖୁଲାସା କରିଛନ୍ତି। ୨୦୦୨ ଜୁଲାଇ୧୩ରେ ଇଂଲଣ୍ଡରେ ଚାଲିଥିବା ନାଟଓ୍ବେଷ୍ଟ ଟ୍ରଫି ଫାଇନାଲରେ ଭାରତ ବିଜୟୀ ହାସଲ କରିଥିଲା। ଇଂଲଣ୍ଡର ୩୨୬ରନର ପିଛା କରି ଭାରତ ୧୪୬ରନରେ ୫ଟି ଉଇକେଟ୍ ହରାଇଥିଲା। ଏହି ସମୟରେ ମହମ୍ମଦ କୈଫ ଏବଂ ଯୁବରାଜ ସିଂ ଭାରତକୁ ସଙ୍କଟରୁ ଉଦ୍ଧାର କରିଥିଲେ। ଉଭୟ ୧୨୬ ରନର ପାର୍ଟନରସିପ୍ କରି ଭାରତ ପାଇଁ ବିଜୟ ଆଣିଥିଲେ। କୈଫ ୮୭ ରନର ପାଳି ଖେଳି ମ୍ୟାନ୍ ଅଫ୍ ଦ ମ୍ୟାଚ୍ ବିବେଚିତ ହୋଇଥିଲେ। ମ୍ୟାଚ୍ ପରେ ଭାରତ ଆସିବା କ୍ଷଣି ତାଙ୍କ ନିଜ ସହର ଆହ୍ଲାବାଦରେ ତାଙ୍କୁ ଜୋରଦାର ସ୍ବାଗତ କରାଯାଇଥିଲା। ଫୁଲ ବିଛାଇ ଖୋଲା କାର୍ରେ ତାଙ୍କୁ ନିଆଯାଇଥିଲା। ଏହି ସମୟରେ ନିଜକୁ ଅମିତାଭ ବଚ୍ଚନ ଭାବୁଥିଲେ କୈଫ୍। କାରଣ ଅମିତାଭ ବଚ୍ଚନ ଯେବେ ନିର୍ବାଚନ ଜିତି ଆହ୍ଲାବାଦ ଆସିଥିଲେ ତାଙ୍କୁ ଏପରି ସ୍ବାଗତ କରାଯାଇଥିଲା ବୋଲି କୈଫ୍ କହିଛନ୍ତି।
