ନୂଆଦିଲ୍ଲୀ,୨୨।୬: ବଜେଟରେ ବିମାନ ସେବା ଯୋଗାଣ କରୁଥିବା ମାଲେସିଆ ଭିତ୍ତିକ କମ୍ପାନୀ ଏୟାର ଏସିଆ ବରହାଦ ଲାଗି ଭାରତ ଏବଂ ଜାପାନ ଏକ ବାହ୍ୟ ଅଞ୍ଚଳ ବଜାର। କମ୍ପାନୀ ବର୍ତ୍ତମାନ ଟାଟା ଗ୍ରୁପ ସହ ମିଳିତ ହୋଇ ସେବା ଯୋଗାଣ କରୁଥିବା ବେଳେ ଏହି ସହଭାଗିତାରୁ ଓହରିପାରେ ବୋଲି କ୍ରେଡିଟ ସୁଇସ ପକ୍ଷରୁ ଏକ ରିପୋର୍ଟରେ ପ୍ରକାଶ ପାଇଛି। ଏହି ରିପୋର୍ଟରେ କମ୍ପାନୀର ମୁଖ୍ୟ କାର୍ଯ୍ୟନିର୍ବାହୀ ଟୋନି ଫର୍ଣ୍ଣାଡିଜଙ୍କ ମତକୁ ପ୍ରକାଶ କରାଯାଇଥିବା ଜଣାପଡିଛି। ଶନିବାର ଆସିଥିବା କ୍ରେଡିଟ ସୁଇସ ରିପୋର୍ଟରେ କୁହାଯାଇଛି ଯେ, ଆସିଆନ ଅଞ୍ଚଳ କମ୍ପାନୀ ପାଇଁ ଏକ ପ୍ରମୁଖ ବଜାର ଭାବେ ଉଭା ହୋଇଛି। ବର୍ତ୍ତମାନ ଅଭିବୃଦ୍ଧି ଧାରା ଜାରି ରହିଥିବାରୁ ଭାରତ ବାହାରକୁ କାରବାର ସମ୍ପ୍ରସାରଣ କେବେ ନ କରାଯିବ ବୋଲି କହି ହେବ ନାହିଁ। ଟାଟା ସହ ଭଲ ସହଭାଗିତା ରହିଛି। ବର୍ତ୍ତମାନ ଅନ୍ତର୍ଜାତୀୟ ଲାଇସେନ୍ସ ପାଇବା ଲାଗି ଏୟାର ଏସିଆ ଲକ୍ଷ୍ୟ ରଖିଛି।ଭାରତରେ ବିମାନ ସେବା ଲାଗି ସରକାର ମେ ମାସ ୨୫ରୁ ଅନୁମତି ଦେଇଥିବାରୁ ବଜାର ଅଂଶ ବଢାଇବା ଦିଗରେ ସହାୟକ ହେଉଥିବା ସେ ମତ ପ୍ରକାଶ କରିଛନ୍ତି।
କମ୍ପାନୀ ପକ୍ଷରୁ କୁହାଯାଇଛି ଯେ, ଦୀର୍ଘମିଆଦୀ ଭିତ୍ତିରେ ଏହା କୌଣସି ନୂଆ ବିମାନ ଯୋଡିବା ଯୋଜନା ରଖି ନାହିଁ। ଅଶୋଧିତ ତେଲ ଦର ନିମ୍ନରେ ରହିବା ନେଇ କମ୍ପାନୀ ଅନୁମାନ ଲଗାଇଛି। ମାତ୍ର ଏହାର ଲାଭ ବର୍ତ୍ତମାନ ପରିସ୍ଥିତିରେ ବିଶେଷ ଭାବେ ମିଳି ପାରୁନାହିଁ। ଏଣୁ ନୂଆ ପ୍ଲେନ ଯୋଡିବା ପରିବର୍ତ୍ତେ ପୁରୁଣା ପ୍ଲେନରେ କମ୍ପାନୀ କାମ ଚଳାଇପାରେ। ଏହି ପ୍ରସଙ୍ଗ ଉପରେ ସ୍ପଷ୍ଟୀକରଣ ଲୋଡା ଯାଇଥିବା ବେଳେ ଏୟାର ଏସିଆ ଇଣ୍ଡିଆ ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ। ସେହିଭଳି ଟାଟାସନ୍ସର ମୁଖପାତ୍ର ଏହି ପ୍ରସଙ୍ଗ ଉପରେ କିଛି କହିବାକୁ ମନା କରିଦେଇଛନ୍ତି। ଏୟାର ଏସିଆ ଇଣ୍ଡିଆ ଏକ ଯୌଥ ଉଦ୍ୟୋଗ ହୋଇଥିବା ବେଳେ ଟାଟାସନ୍ସ ଏବଂ ଏୟାର ଏସିଆ ବରହାଦ ଏକତ୍ର ହୋଇ କାମ କରୁଛନ୍ତି। ମେ ୨୫ ପରେ ବିମାନ ସେବାକୁ ସରକାର ପୁଣି ଥରେ ଅନୁମତି ପ୍ରଦାନ କରିବା ପରେ ଏହି କମ୍ପାନୀ ୪୬% ଲୋଡ୍ ଫ୍ୟାକ୍ଟର ସହ କାମ କରୁଛି। ୨ ମାସ ଧରି ସେବା ବନ୍ଦ ରହିବା ପରେ କମ୍ପାନୀ ପୁଣି ଥରେ ସେବା ଯୋଗାଉଛି। ବର୍ତ୍ତମାନ ସୁଦ୍ଧା ୨୨ ହଜାର ବିମାନ ଯାତ୍ରୀଙ୍କୁ ଏହା ସେବା ଯୋଗାଇ ଦେଉଛି। ବର୍ତ୍ତମାନ ବଜାରର ପ୍ରମୁଖ ସ୍ଥାନରେ ରହିଥିବା ଇଣ୍ଡିଗୋ ୫୦.୬% ବଜାର ଅଂଶ ହାସଲ କରିଛି। ଏହି ସମୟରେ ଏହା ୫୨.୬% କ୍ଷମତା ସହ ପରିଚାଳିତ ହେଉଛି। କମ୍ପାନୀ ମୋଟ ୧.୪୨ ଲକ୍ଷ ଯାତ୍ରୀଙ୍କୁ ସେବା ଯୋଗାଇବାକୁ ସକ୍ଷମ ହୋଇଛି।
