ନୂଆପଡା ଅଫିସ,୧୯ା୫-ନୂଆପଡ଼ା ଜିଲାକୁ ପ୍ରବାସୀ ଓଡ଼ିଆଙ୍କ ଆଗମନର ଲମ୍ବା ଧାଡି ଲାଗିଛି। ପ୍ରତିଦିନ ଯିଏ ଯାହା ଉଦ୍ୟମରେଏଠାକୁ ହଜାର ହଜାର ସଂଖ୍ୟାରେ ଆସି ପହଞ୍ଚୁଛନ୍ତି। ଏମାନଙ୍କ ସକାଶେ ଜିଲା ପ୍ରଶାସନ ପଞ୍ଚାୟତରେ କ୍ୱାରାଣ୍ଟାଇନ ସେଣ୍ଟର ଖୋଲିଛି। ହେଲେ ଏଗୁଡିକରେ ମୌଳିକ ସୁବିଧା ଅଛି କି ନାହିଁ ସେ ଉପରେ ନିଜେ ଜିଲାପାଳ ମଧୁସ୍ମିତା ସାହୁ ଅଚାନକ ଭାବେ ବୁଲି ପରିଦର୍ଶନ କରୁଛନ୍ତି। ଅନ୍ୟପଟେ କ୍ୱାରାଣ୍ଟାଇନ ସେଣ୍ଟର ଗୁଡିକରେ ଠିକ୍ ଭାବେ ଖାଦ୍ୟ ପେୟ ଦିଆଯାଉ ନ ଥିବାବେଳେ ମୌଳିକ ସୁବିଧା ମିଳୁ ନ ଥିବା ପ୍ରବାସୀମାନେ ଅଭିଯୋଗ କରିଛନ୍ତି। କ୍ୱାରାଣ୍ଟାଇନ ସେଣ୍ଟରେ ରହୁଥିବା ପ୍ରବାସୀଙ୍କଠାରୁ ଏଭଳି ଅଭିଯୋଗ ପାଇଲା ପରେ ବ୍ୟବସ୍ଥା ପ୍ରତି ଧ୍ୟାନ ଦେବାକୁ ଜିଲାପାଳ କଡା ତାଗିଦ କରିଛନ୍ତି। ମଙ୍ଗଳବାର ସକାଳେ ଜିଲାପାଳ ଖଡିଆଳ ବ୍ଲକ ଅଞ୍ଚଳର ବହୁ କ୍ୱାରାଣ୍ଟାଇନ ସେଣ୍ଟର ବୁଲି ଦେଖିଛନ୍ତି। ଜିଲା ଗ୍ରାମ ପଞ୍ଚାୟତ ଅଧିକାରୀ ବିବେକାନନ୍ଦ ମହାନନ୍ଦ, ବିଡିଓ ଉତ୍ତମ ବାଗ ପ୍ରମୁଖ ଜିଲାପାଳଙ୍କ ସହ ପରିଦର୍ଶନରେ ଯାଇଥିଲେ। ସେହିଭଳି କୋମନା ବ୍ଲକ ତରବୋଡରେ ଶିଶୁ, ମହିଳା ଓ ପୁରୁଷ ମିଶି ମୋଟ ୭୦ ଜଣ ପ୍ରବାସୀ ରହୁଛନ୍ତି। ଅପରାହ୍ନ ସାଢେ ୨ଟା ପର୍ଯ୍ୟନ୍ତ ଏମାନେ ମଧ୍ୟାହ୍ନ ଭୋଜନ କରି ନ ଥିବା ଜାଣିଲା ପରେ ଜିଲାପାଳ ଉଦ୍ବେଗ ପ୍ରକାଶ କରଛନ୍ତି। ଏଠାରେ ପାଣି ଏବଂ ବିଜୁଳି ବ୍ୟବସ୍ଥା ଠିକ୍ ନାହିଁ। ନିମ୍ନମାନର ଖାଦ୍ୟ ଦିଆଯାଉଥିବା ସୁରଟ ଫେରନ୍ତା କୈଳାସ ମାଝି ଅଭିଯୋଗ କରିଛନ୍ତି। ତେବେ ଏହା ଉପରେ ବିଶେଷ ଧ୍ୟାନ ଦିଆଯିବ ବୋଲି ଜିଲା ଗ୍ରାମ ପଞ୍ଚାୟତ ଅଧିକାରୀ ମହାନନ୍ଦ ପ୍ରକାଶ କରିଛନ୍ତି। ସୂଚନାଯୋଗ୍ୟ, ଜିଲାର ୧୩୧ଟି ପଞ୍ଚାୟତରେ ୯୦୯ଟି କ୍ୱାରାଣ୍ଟାଇନ ସେଣ୍ଟରର ବ୍ୟବସ୍ଥା କରାଯାଇଛି। ଘରକୁ ଫେରିବାକୁ ୬୨ହଜାର ପ୍ରବାସୀ ପଞ୍ଜୀକରଣ କରିଥିବାବେଳେ ୫୦୬୨ ପ୍ରବାସୀ ବିଭିନ୍ନ କ୍ୱାରାଣ୍ଟାଇନ ସେଣ୍ଟରରେ ରହିଛନ୍ତି।
