ବ୍ରହ୍ମପୁର ଅଫିସ୍,୧୩ା୬-ଖରା ଛୁଟି ପରେ ଆସନ୍ତା ୧୯ତାରିଖରେ ସ୍କୁଲ ଖୋଲିବ। ଏହା ପୂର୍ବରୁ ସମସ୍ତ ଆନୁଷଙ୍ଗିକ ବ୍ୟବସ୍ଥା କରିବାକୁ ବ୍ଲକ ଶିକ୍ଷା ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ଜିଲା ଶିକ୍ଷା ଅଧିକାରୀ ଡ. ସନାତନ ପଣ୍ଡା। ଖରା ଛୁଟି ଚାଲିଥିବା ବେଳେ ବାତ୍ୟା ‘ଫନୀ’ ହୋଇଥିଲା। ଏହା ପ୍ରଭାବରେ ସ୍କୁଲ କ୍ଷତିଗ୍ରସ୍ତ ହୋଇଛି। ତେଣୁ ସ୍କୁଲ ଖୋଲିବାର ଦୁଇ ଦିନ ପୂର୍ବରୁ ଅର୍ଥାତ୍ ୧୭ତାରିଖରେ କେବଳ ଶିକ୍ଷକ ଏବଂ କର୍ମଚାରୀମାନେ ସ୍କୁଲକୁ ଯାଇ ଶ୍ରେଣୀ ଗୃହ, କମ୍ପ୍ୟୁଟର୍ ଗୃହ, ଆଇସିଟି ଲାବ୍, ବିଜ୍ଞାନ ଲାବ୍, ଶୌଚାଳୟ ଏବଂ ଅନ୍ୟାନ୍ୟ କୋଠାରିର ସ୍ଥିତି ପରଖିବେ। ଏଥିସହ ରୋଷେଇ ଗୃହର ସ୍ବଚ୍ଛତା, ରୋଷେଇ ଏବଂ ଖାଦ୍ୟ ସାମଗ୍ରୀ ଯାଞ୍ଚ କରିବାକୁ ନିର୍ଦ୍ଦେଶ ଦିଆଯାଇଛି।
ସେହିପରି ଆଉ କେତେକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ମଧ୍ୟ ଦିଆଯାଇଛି। ସମସ୍ତ ସ୍କୁଲ ପରିସରରେ ଶତପ୍ରତିଶତ ଚାରାରୋପଣ କରାଯିବ। ବ୍ଲକ ଶିକ୍ଷା ଅଧିକାରୀମାନେ ଏହାର ତଦାରଖ କରିବେ। ଯଦି କୌଣସି ସ୍କୁଲରେ ଚାରାରୋପଣ ନ ହୁଏ, ତେବେ ସଂପୃକ୍ତ ଗୋଷ୍ଠୀ ଶିକ୍ଷା ଅଧିକାରୀ ଏଥିପାଇଁ ଦାୟୀ ରହିବେ। ପାନୀୟ ଜଳ, ବିଦ୍ୟୁତ୍, ପୃଥକ ଶୌଚାଳୟ ସୁବିଧା ପ୍ରତ୍ୟେକ ସ୍କୁଲରେ ରହିବ। ୧୯ତାରିଖ ସକାଳ ୯ଟାରୁ ଶିକ୍ଷକ ଏବଂ ଅଣଶିକ୍ଷକ କର୍ମଚାରୀମାନେ ସ୍କୁଲରେ ପହଞ୍ଚିବେ। ସ୍କୁଲ ପରିସରରେ ରଙ୍ଗିନ୍ ଝୋଟି ଏବଂ ଫୁଲରେ ସଜାଇବେ। ଏହାଦ୍ୱାରା ଅଧିକରୁ ଅଧିକ ଛାତ୍ରୀଛାତ୍ର ବିଦ୍ୟାଳୟ ପ୍ରତି ଆକୃଷ୍ଟ ହେବେ। ଶିକ୍ଷକମାନେ ୟୁନିଫର୍ମ ପିନ୍ଧିବେ। ‘ପ୍ରେରଣା’ କାର୍ଯ୍ୟକ୍ରମ ଅନୁଯାୟୀ ଛାତ୍ରୀଛାତ୍ରଙ୍କୁ ଡେଙ୍ଗୁ ଓ ମ୍ୟାଲେରିଆ ନିରାକରଣ ସମ୍ପର୍କରେ ସଚେତନ କରାଯିବ। ସ୍ବାସ୍ଥ୍ୟ ବିଭାଗ ତରଫରୁ ପ୍ରଦତ୍ତ ପାମ୍ପଲେଟ୍କୁ ବଣ୍ଟାଯିବ। ଗଞ୍ଜାମ ଜିଲାକୁ ପ୍ଲାଷ୍ଟିକ ଏବଂ ପଲିଥିନ୍ମୁକ୍ତ କରିବା ପାଇଁ ଛାତ୍ରୀଛାତ୍ରମାନେ ଶପଥ ନେବେ। ସେହିଭଳି ‘ଶୂନ୍ ଶ୍ରେଣୀ’(ଜିରୋ କ୍ଲାସ୍), ପାଠାଗାର ଅଭିଯାନ କାର୍ଯ୍ୟକ୍ରମ ସମସ୍ତ ସ୍କୁଲରେ ଅନୁଷ୍ଠିତ ହେବ। ଶ୍ରେଣୀ ଗୃହରେ ମୋବାଇଲ୍ ଫୋନ୍ ବ୍ୟବହାରକୁ ବାରଣ କରାଯାଇଛି। ଯଦି କୌଣସି ଶିକ୍ଷକ ପାଠ ପଢ଼ାଇବା ବେଳେ ମୋବାଇଲ୍ ଫୋନ ବ୍ୟବହାର କରିବେ, ତେବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ। ପ୍ରତ୍ୟେକ ବିଦ୍ୟାଳୟରେ ଧଳା ବୋର୍ଡ଼ ଏବଂ ରଙ୍ଗିନ୍ ଚକ୍ ବ୍ୟବହାର କରାଯିବ। ପ୍ରତ୍ୟେକ ଶ୍ରେଣୀ କକ୍ଷରେ ଏକ ଆଇନା ରହିବ। ଛାତ୍ରୀଛାତ୍ରମାନେ ସେଥିରେ ନିଜକୁ ଦେଖିବେ। ଯଦି କୌଣସି ଛାତ୍ରୀଛାତ୍ର ସ୍କୁଲ ଛାଡ଼ିଦେଇଛନ୍ତି, ତେବେ ତାଙ୍କୁ ଫେରାଇ ଆଣିବା ଦାୟିତ୍ୱ ସିଆର୍ସିସି ଏବଂ ପ୍ରଧାନ ଶିକ୍ଷକଙ୍କର। ଅଭିଭାବକଙ୍କ ସହ ଏ ସମ୍ପର୍କରେ ଆଲୋଚନା କରାଯିବ। ଯେଉଁ ପିଲାମାନେ ଟିସି ନେଉଛନ୍ତି, ସେମାନେ ଅନ୍ୟ ବିଦ୍ୟାଳୟରେ ନାମ ଲେଖାଉଛନ୍ତି କି ନାହିଁ, ଦେଖାଯିବ। କୌଣସି ସ୍ଥାନରେ ଶିଶୁ ଶ୍ରମିକ ଦେଖାଦେଲେ, ତୁରନ୍ତ ଜିଲା ଶିଶୁ ସୁରକ୍ଷା ଅଧିକାରୀଙ୍କୁ ଅବଗତ କରିବାକୁ ଜିଲା ଶିକ୍ଷା ଅଧିକାରୀ ଡ. ପଣ୍ଡା ନିର୍ଦ୍ଦେଶ ଦେଇଛନ୍ତି।
