ନ୍ୟୁୟର୍କ,୧୫।୪: କରୋନା ସଂକ୍ରମଣକୁ ରୋକିବା ପାଇଁ ପୃଥିବୀର ବିଭିନ୍ନ ଦେଶରେ ବୈଜ୍ଞାନିକମାନେ ଔଷଧ ପ୍ରସ୍ତୁତିରେ ଲାଗି ରହିଛନ୍ତି। ଦିନରାତି ଏନେଇ ଉଦ୍ୟମ ଅବ୍ୟାହତ ରହିଛି। ତେବେ ଆମେରିକାରୁ ଖୁସି ଖବର ମିଳିଛି। ଆମେରିକା ନ୍ୟୁୟର୍କରେ ବୈଜ୍ଞାନିକମାନେ ‘ଇଆଇଡିଡି-୨୮୦୧’ ଟ୍ୟାବଲେଟ୍ ପ୍ରସ୍ତୁତ କରିଛନ୍ତି। ଏହା କରୋନା ସଂକ୍ରମଣରେ ଫୁସ୍ଫୁସ୍କୁ ସୁରକ୍ଷିତ ରଖିବାକୁ ସକ୍ଷମ ହେବ ବୋଲି କୁହାଯାଉଛି। ଶରୀରରେ କରୋନା ଭୂତାଣୁ ନିଜର ଜେନେଟିକ୍ ପ୍ରସ୍ତୁତିରେ ବ୍ୟବହାର କରୁଥିବା ଏନ୍ଜାଇମ୍କୁ ‘ଇଆଇଡିଡି-୨୮୦୧’ ଟ୍ୟାବଲେଟ୍ ପ୍ରତିରୋଧ କରିଥାଏ। ଫଳରେ କରୋନା ଭୂତାଣୁ ସଂକ୍ରମଣ ଯୋଗୁ ଶରୀର କ୍ଷତିଗ୍ରସ୍ତ ହୋଇ ନ ଥାଏ। ଏହି ଔଷଧର ପରୀକ୍ଷଣ ମନୁଷ୍ୟ ଉପରେ କରିବା ପାଇଁ ଆମେରିକାର ଫୁଡ୍ ଆଣ୍ଡ୍ ଡ୍ରଗ୍ସ୍ ଆଡ଼ମିନିଷ୍ଟ୍ରେଶନ ପକ୍ଷରୁ ଅନୁମତି ଦିଆଯାଇଛି। ଏହା ସଫଳ ହେଲେ ପରବର୍ତ୍ତୀ ସମୟରେ ‘ଇଆଇଡିଡି-୨୮୦୧’ ଟ୍ୟାବଲେଟ୍କୁ ଲୋକଙ୍କୁ ଦିଆଯିବ ବୋଲି ଇମୋରି ବିଶ୍ୱବିଦ୍ୟାଳୟ ପକ୍ଷରୁ ସୂଚନା ଦିଆଯାଇଛି।
