ପୁରୀ ଅଫିସ,୩୧ା୧୨- ନୂତନ ବର୍ଷରେ ଶ୍ରୀକ୍ଷେତ୍ରରେ ପ୍ରବଳ ଜନସମାଗମ ହେବ। ଏ ନେଇ ପୁରୀ ପୋଲିସ ପକ୍ଷରୁ ଟ୍ରାଫିକ ନିିୟନ୍ତ୍ରଣ ଓ ପାର୍କିଂ ଉପରେ ବିଶେଷ ଗୁରୁତ୍ୱ ଦିଆଯାଇଛି। ଦୁଇ ଚକିଆ ଓ ଚାରି ଚକିଆ ଗାଡ଼ି ପାର୍କିଂ ପ୍ରବେଶ ଏବଂ ପ୍ରସ୍ଥାନ ସମୟରେ ଅସୁବିଧା ନ ହେବ ସେଥିଲାଗି ଦୃଷ୍ଟି ଦିଆଯିବ। ଟ୍ରାଫିକ ବ୍ୟବସ୍ଥାକୁ ନିୟନ୍ତ୍ରଣ ଲାଗି ସହରରେ ୨୨ଟି ଅସ୍ଥାୟୀ ପୋଲିସ କ୍ୟାମ୍ପ, ୨୪ଘଣ୍ଟିଆ କଣ୍ଟ୍ରୋଲ ରୁମ ବ୍ୟବସ୍ଥା ରହିବ। ୩୧ ତାରିଖ ମଧ୍ୟରାତ୍ରିରୁ ଜାନୁୟାରୀ ୧ ପର୍ଯ୍ୟନ୍ତ ଟ୍ରାଫିକ ବ୍ୟବସ୍ଥାକୁ କଡାକଡି କରାଯାଇଛି ବୋଲି ସୋମବାର ଏସପି ଉମାଶଙ୍କର ଦାଶ ସୂଚନା ଦେଇଛନ୍ତି।
ମାର୍କେଟ କମ୍ପ୍ଲେକ୍ସରେ ରହିବ ଦୁଇଚକିଆ:
ଟ୍ରାଫିକ ନିୟନ୍ତ୍ରଣ ଦୃଷ୍ଟିରୁ ସିଂହଦ୍ୱାର ନିକଟକୁ ସମସ୍ତ ଯାନବାହନ ଚଳାଚଳ ଉପରେ କଟକଣା କରାଯାଇଛି। ମାର୍କେଟ କମ୍ପ୍ଲେକ୍ସ ଉଚ୍ଛେଦ ପରେ ଏହାକୁ ଦୁଇ ଚକିଆ ଯାନର ପାର୍କିଂସ୍ଥଳ କରାଯାଇଛି। ଏହି ସ୍ଥାନ ଫୁଲ ହେବା ପରେ ମୋଚିସାହି ଛକରେ ଅନ୍ୟ ଏକ ପାର୍କିଂ ବ୍ୟବସ୍ଥା କରାଯିବ। ସମସ୍ତ ଦୁଇ ଚକିଆ ଯାନ ମେଡିକାଲ ଛକରୁ ଝାଡେଶ୍ୱରୀ ଛକ, ଟାଉନ ହଲ ଛକ ଦେଇ ଏଠାରେ ରହିବେ। ବେଳାଭୂମି ଦିଗବାରେଣୀ ପାର୍କିଂ ଏବଂ ଯାତ୍ରୀକାଠାରେ ପାର୍କିଂ କରିପାରିବେ।
ଚାରିଚକିଆ ଯାନ ପାର୍କିଂ:
ଶ୍ରୀମନ୍ଦିରକୁ ଆସୁଥିବା ଚାରିଚକିଆ ଯାନ ଲାଗି ଜଗନ୍ନାଥ ବଲ୍ଲଭ, ପୁରୁଣା ଜେଲ ପଡିଆରେ ବ୍ୟବସ୍ଥା ରହିଛି। ଏହି ସ୍ଥାନ ପୂର୍ଣ୍ଣ ହେବା ପରେ ଗୁଣ୍ଡିଚା ମନ୍ଦିର, ଶରଧାବାଲି, ମଙ୍ଗଳାଘାଟ ଦେଇ ଫ୍ଲୋରିସ ଇଣ୍ଡିଆ ଓ ଯାତ୍ରିକାରେ ପାର୍କିଂ କରାଯିବ। ଗୁଣ୍ଡିଚା ମନ୍ଦିର ପାର୍କିଂ ଫୁଲ ହେଲେ ତାଳବଣିଆ ଇନଡୋର ଷ୍ଟାଡିିୟମ ଏବଂ ଆଇଟିଆଇ ଛକରେ ଯାନବାହନ ପାର୍କିଂ କରିବେ। ଏହି ସ୍ଥାନ ବ୍ୟତୀତ ଅନ୍ୟ କୌଣସି ଭିଡ଼ ସ୍ଥାନରେ ପାର୍କିଂ ପାଇଁ ଅନୁମତି ନ ଦେବା ଲାଗି ପୌର ପ୍ରଶାସନ ପକ୍ଷରୁ ଅନୁରୋଧ କରାଯାଇଛି।
ପାସେଞ୍ଜର, ଟୁରିଷ୍ଟ ବସ୍ ଯାତାୟାତ :
ଭୁବନେଶ୍ୱରରୁ ପୁରୀ ଆସୁଥିବା ଦୈନିକ ଘରୋଇ ବସ ଅଠରନଳା, ନବକଳେବର ରୋଡ ଦେଇ ମ୍ୟୁନିସିପାଲିଟି ବସଷ୍ଟାଣ୍ଡରେ ପ୍ରବେଶ କରିବେ। ବ୍ରହ୍ମଗିରି ପଟୁ ଆସୁଥିବା ଘରୋଇ ବସ ଜଟିଆ ବାବାଜୀ ଛକ ପର୍ଯ୍ୟନ୍ତ ଆସିବେ, ସେହି ରୁଟ ଦେଇ ଫେରିବେ। ସେହିପରି କୋଣାର୍କ ପଟୁ ଆସୁଥିବା ଗ୍ରୀଡ ଛକ ବାଲିଘାଟ, ମାଟିଆପଡା ଛକ ଦେଇ ବସଷ୍ଟାଣ୍ଡରେ ପ୍ରବେଶ କରିବେ। ସେହିଭଳି ବାହାର ରାଜ୍ୟର ଟୁରିଷ୍ଟ ବସ ମାଲତିପାଟପୁର ଟୁରିଷ୍ଟ ବସଷ୍ଟାଣ୍ଡରେ ରଖିବେ। ସେଠାରୁ ପର୍ଯ୍ୟଟକମାନେ ଅଟୋ ଓ ମିନିବସ ଯୋଗେ ଶ୍ରୀମନ୍ଦିର ଆସିପାରିବେ। କୋଣାର୍କରୁ ଆସୁଥିବା ଟୁରିଷ୍ଟ ବସ ତୋଷାଳି ପ୍ଲାଜା ଛକ, ବାଇଦାସ ନଗର, ଆରଓବି ଦେଇ ମାଳତିପାଟପୁରରେ ପାର୍କିଂ କରିବେ। ଭୁବନେଶ୍ୱର ପଟୁ ସାତପଡା ଚିଲିକା ଲାଗି ଆସୁଥିବା ଟୁରିଷ୍ଟ ବସ ବାଟଗଁା ମଙ୍ଗଳାଘାଟ ବାଇପାସ ଦେଇ ଜାତୀୟ ରାଜପଥ ଦେଇ ସାତପଡା ଯିବେ। ଭାରିଯାନ ଯଥା ଟ୍ରକ, ଟ୍ରାକ୍ଟର, ମାଲ ବୋଝେଇ ଟ୍ରକ ଆଦିର ସହରରେ ପ୍ରବେଶ ଉପରେ କଟକଣା ରହିବ। ଏହା ୩୧ ଓ ୦୧ ତାରିଖ ଦୁଇଦିନ ଧରି ବଳବତ୍ତର ରହିବ।
