ଯେକୌଣସି ବୃତ୍ତିରୁ ଜଣେ କର୍ମଚାରୀ ଅବସର ନେଲେ ବିଦାୟକାଳୀନ ସମ୍ବର୍ଦ୍ଧନା ଉତ୍ସବ ପାଳିତ ହେବା ପରମ୍ପରା ରହିଛି। ଏହା ଲାଗି କେତେ କ’ଣ ଆୟୋଜନ ହେଉଛି। ଉପହାରଠାରୁ ଆରମ୍ଭ କରି ଭୋଜିର ଆସର ଜମୁଛି। ହେଲେ ଶୁଣିଛନ୍ତି କି କୃଷକଙ୍କ ଅବସର କଥା? ଏମିତି ଏକ ଘଟଣା ସାମ୍ନାକୁ ଆସିଛି ମହାରାଷ୍ଟ୍ରରେ। ମହାରାଷ୍ଟ୍ରର ଭଣ୍ଡରା ଜିଲା ମୋହଗାଁଓର ଜଣେ କୃଷକ ଅବସର ଘୋଷଣା କରିଛନ୍ତି। ତାଙ୍କ ଲାଗି ପାଳିତ ହୋଇଛି ସ୍ବତନ୍ତ୍ର ଉତ୍ସବ। ମୋହଗାଁଓର କାଲେ ପରିବାରରେ ୬୦ ବର୍ଷ ଧରି ଚାଷ କରୁଥିବା ପରିବାରର ମୁଖିଆ ଗଜାନନ କାଲେ କୃଷିରୁ ତାଙ୍କ ଅବସର ଘୋଷଣା କରିଛନ୍ତି। ତାଙ୍କୁ ଏବେ ୮୦ ବର୍ଷ। ଅବସର ନେବା ପରେ ସେ ଆଉ ଚାଷ କରିବେ ନାହଁ। ପରିବାର ପକ୍ଷରୁ ତାଙ୍କ ଲାଗି ବିଦାୟ ସମ୍ବଦ୍ଧର୍ର୍ନା ଉତ୍ସବର ଆୟୋଜନ କରାଯାଇଥିଲା। ଏହି ଅବସରରେ ୧୦ ଜଣ କୃଷକଙ୍କୁ ବି ସମ୍ମାନିତ କରାଯାଇଛି। ପରେ ଏହି ଉତ୍ସବରେ ବଳଦଗାଡିରେ ଗଜାନନ ଓ ସମ୍ମାନିତ କୃଷକମାନେ ବସି ଏକ ଶୋଭାଯାତ୍ରାରେ ବାହାରିଥିଲେ। ଗଜାନନଙ୍କ ପରିବାରରେ ଛୋଟବଡ଼ ୧୯ ଜଣ ସଦସ୍ୟ ରହିଛନ୍ତି। ତାଙ୍କର ୨୫ ଏକର ଜମି ରହିଛି। ବୟସ ଅଧିକ ହେବାରୁ ଗଜାନନଙ୍କୁ ଚାଷକାମରୁ ମୁକ୍ତ କରାଯାଇଛି ବୋଲି କହିଛନ୍ତି ତାଙ୍କ ସାନଭାଇ ଯଶବନ୍ତ।
