ଦାରିଙ୍ଗବାଡ଼ି,୧୦।୧୨(ଡି.ଏନ.ଏ)-ଦାରିଙ୍ଗବାଡ଼ି ବ୍ଲକ ଭ୍ରମରବାଡ଼ି ପଞ୍ଚାୟତ ଲାଦାଙ୍ଗି ନୂତନ ଉଚ୍ଚ ପ୍ରାଥମିକ ବିଦ୍ୟାଳୟର ସପ୍ତମ ଶ୍ରେଣୀ ଛାତ୍ର ଟୁନା ପ୍ରଧାନ। ତାଙ୍କ ବାମ କାନକୁ ଆଦୌ ଶୁଭୁ ନ ଥିବାବେଳେ ଡାହାଣ କାନକୁ ଅଳ୍ପ ଶୁଭୁଛି। ଫଳରେ ପାଠ ପଢାରେ ସମସ୍ୟା ହେଉଛି। ୭ ବର୍ଷ ଧରି ଏଭଳି ସମସ୍ୟା ମଧ୍ୟରେ ସେ ପଢୁଛନ୍ତି। ଏଭଳି ଛାତ୍ରୀଛାତ୍ରଙ୍କ ପାଇଁ ସରକାରଙ୍କ ପକ୍ଷରୁ ସମସ୍ତ ପ୍ରକାର ସୁବିଧା କରାଯାଉଛି। ୨୦ ନଭେମ୍ବରରେ ଦାରିଙ୍ଗବାଡ଼ି ଠାରେ କ୍ୟାମ୍ପ କରି ମାଗଣା ଚିକିତ୍ସା କରାଯାଇଥିଲା। କିନ୍ତୁ ଏଥିରୁ ବଞ୍ଚତ୍ତ ହୋଇଛନ୍ତି ଟୁନା। ବାପାଙ୍କ ମୃତ୍ୟୁ ହୋଇଥିବାବେଳେ ଅନ୍ୟ ୨ ଭାଇ ଓ ମା’ଙ୍କ ସହ ଟୁନା ରହୁଛନ୍ତି। ମା’ ମୂଲଲାଗି କିମ୍ବା ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ପରିବାର ଚଳାନ୍ତି। ଏଭଳି ପରିସ୍ଥିତିରେ ତାଙ୍କୁ ସ୍ବାସ୍ଥ୍ୟପରୀକ୍ଷା କରାଇବା ସମ୍ଭବ ହେଉନଥିବା କୁହନ୍ତି ଟୁନାଙ୍କ ମା’ ମାଳି। ଏନେଇ ଗୋଷ୍ଠୀ ସମ୍ବଳ ଶିକ୍ଷକ ମାନସ କୁମାର ଷଡ଼ଙ୍ଗି କୁହନ୍ତି, ପ୍ରଧାନ ଶିକ୍ଷକ କିଶୋର ଚନ୍ଦ୍ର କରଙ୍କୁ ଚିଠି କରାଯାଇଛି ଯେଉଁମାନେ ଶ୍ରବଣ ବାଧିତ ଓ ଚକ୍ଷୁ ସମସ୍ୟା ରହିଛି ସେମାନଙ୍କୁ ଦାରିଙ୍ଗବାଡ଼ି ଆଣିବାକୁ କୁହାଯାଇଛି। ନଭେମ୍ବର ୨୫ ତାରିଖରେ ମନିଟରିଂ ବେଳେ ଯାଇ ସମସ୍ତ ବିଷୟ ରିପୋର୍ଟ କରିଥିବା କହିଛନ୍ତି ସିଆର୍ସିସି ଜଳେନ୍ଦ୍ର ଦିଗାଳ। ପ୍ରଧାନ ଶିକ୍ଷକ କିଶୋର ଚନ୍ଦ୍ର କର କହିଛନ୍ତି ଯେ, ଟୁନାଙ୍କ ପରିବାର ଲୋକଙ୍କୁ କୁହାଯାଇଥିଲା ହେଲେ ସେ ଅବହେଳା କରିବାରୁ ଶ୍ରବଣ ପରୀକ୍ଷା ହୋଇଇପାରିନାହିଁ। ସେ ଖୁବଶୀଘ୍ର ଟୁନାଙ୍କୁ ଶ୍ରବଣ ଜନିତ ସମସ୍ୟାର ପରୀକ୍ଷା ପାଇଁ ନେବେ ବୋଲି କହିଛନ୍ତି।
ସୂଚନା ଯୋଗ୍ୟଯେ, ଲାଦାଙ୍ଗି ବିଦ୍ୟାଳୟରେ ପ୍ରଥମରୁ ଅଷ୍ଟମ ପର୍ଯ୍ୟନ୍ତ ୧୭ ଛାତ୍ରୀଛାତ୍ର ଥିବାବେଳେ ୪ଜଣ ଶିକ୍ଷୟିତ୍ରୀ ଶିକ୍ଷକ ରହିଛନ୍ତି। ଏମାନେ ୨ଟି ଶ୍ରେଣୀଗୃହରେ ପଢୁଛନ୍ତି। ଅନ୍ୟପକ୍ଷରେ ୪୦ ଜଣରେ ଜଣେ ଶିକ୍ଷକ ରହିବା ନିୟମ ରହିଥିଲେ ମଧ୍ୟ ୧୭ ଜଣ ଛାତ୍ରୀଛାତ୍ରଙ୍କୁ ୪ ଜଣ ଶିକ୍ଷକ ରହିଛନ୍ତି। ସମସ୍ତେ ପାଳି କରି ବିଦ୍ୟାଳୟକୁ ଯାଉଥିବା ଅଭିଯୋଗ ହେଉଛି। ଏନେଇ ବିଇଓ ବ୍ରହ୍ମାନନ୍ଦ ରାଉତ କୁହନ୍ତି, ଉଚ୍ଚ ପ୍ରାଥମିକ ବିଦ୍ୟାଳୟ କାରଣରୁ ସେଠାରେ ୫ଜଣ ଶିକ୍ଷକ ଆବଶ୍ୟକ। କିନ୍ତୁ ଛାତ୍ରୀଛାତ୍ରଙ୍କ ସଂଖ୍ୟା କମ୍ ଯୋଗୁ ଆବଶ୍ୟକ ସ୍ଥଳେ ଜଣେ ଶିକ୍ଷକଙ୍କୁ ଅନ୍ୟତ୍ର କରାଯିବା ସହ ଟୁନାଙ୍କ କାନ ପରୀକ୍ଷା କରାଯାଇ ଆବଶ୍ୟକ ଯନ୍ତ୍ର ଯୋଗାଇଦିଆଯିବ ବୋଲି କହିଛନ୍ତି।
