ସୋନପୁର, ୩।୧୨(ନି.ପ୍ର.)
ସୁବର୍ଣ୍ଣପୁର ଜିଲା ତରଭା ବ୍ଲକର ମରାଡୁଗୋଛା ମଦଭାଟି ବନ୍ଦ ପାଇଁ ପଞ୍ଚାୟତର ଲୋକପ୍ରତିନିଧି ଓ ମହିଳାମାନେ ସୋମବାର ଜିଲାପାଳ ମୋନିଷା ବାନାର୍ଜୀଙ୍କ ନିକଟରେ ଦାବି କରିଛନ୍ତି। ଏହି ସରକାରୀ ଦେଶୀ ମଦ ଭାଟି ସ୍ଥାନୀୟ ଉଚ୍ଚ ବିଦ୍ୟାଳୟଠାରୁ ମାତ୍ର ୧୦୦ ମିଟର ଦୂରରେ ରହିଛି। ମରାଡୁଗୋଛା, ରୁଗୁଡିପାଲି, ଲକ୍ଷ୍ମୀମୁଣ୍ଡା ଓ ଗୁହୁରିଆଘାଟ ଗ୍ରାମର ଛାତ୍ରୀଛାତ୍ର ପାଠ ପଢିବା ପାଇଁ ଏହି ବିଦ୍ୟାଳୟକୁ ଆସିଥାନ୍ତି। ତେବେ ରାସ୍ତା ପାର୍ଶ୍ୱରେ ମଦ ଭାଟି ଥିବାରୁ ମଦ୍ୟପ ଓ ଅସାମାଜିକ ଲୋକଙ୍କ ଏହା ଆଡ୍ଡାସ୍ଥଳୀ ପାଲଟିଛି। ଏଥିଯୋଗୁଁ ଅଭିଭାବକମାନେ ଚିନ୍ତାରେ ରହୁଛନ୍ତି। ମଦ୍ୟପଙ୍କ ଯୋଗୁଁ ଗ୍ରାମରେ ବିଶୃଙ୍ଖଳା ସୃଷ୍ଟି ହେଉଛି। ଝିଅ ବୋହୂମାନେ ରାସ୍ତାକୁ ବାହାରିବାକୁ ନିରାପଦ ମଣୁନାହାନ୍ତି। ତେଣୁ ମଦଭାଟି ବନ୍ଦ କରିବା ପାଇଁ ମରାଡୁଗୋଛାର ମହାମାୟୀ ସ୍ବୟଂ ସହାୟକ ଗୋଷ୍ଠୀ, ସରସ୍ବତୀ ସ୍ବୟଂ ସହାୟକ ଗୋଷ୍ଠୀର ସଭ୍ୟାମାନେ ଦାବି କରିଛନ୍ତି । ଆଇନଜୀବୀ ବଳଦେବ ପ୍ରସାଦ ବେଦବାକଙ୍କ ନେତୃତ୍ୱରେ ଶ୍ରଦ୍ଧାଞ୍ଜଳି ମିଶ୍ର, ମରାଡୁଗୋଛା ସରପଞ୍ଚ ଲଳିତା କୁଅଁର, ସମିତି ସଭ୍ୟ ହିରଣ୍ୟ କୁମାର ସାହୁ, ମନମୋହନ ସାହୁ, ଧନମତୀ ମହାକୁର, ଭାଗ୍ୟ ପାତ୍ର, ସୁବାସିନୀ ବେହେରା, ଚନ୍ଦ୍ରମା ନାଏକ, ଆନନ୍ଦିନୀ ବାରିକ, ନମିତା ହାତୀ, ସୌଦାମିନୀ ଦାସ ଓ ଯାଜ୍ଞସିନୀ ଦାଶ ପ୍ରମୁଖ ଆନ୍ଦୋଳନରେ ସାମିଲ ହୋଇଥିଲେ । ତେବେ ମଦଭାଟି ବନ୍ଦ ପ୍ରତି ବଦଳରେ ସ୍ଥାନାନ୍ତର ପାଇଁ ପଦକ୍ଷେପ ନେବେ ବୋଲି ଜିଲାପାଳ ମହିଳାମାନଙ୍କୁ ପ୍ରତିଶୃତି ଦେଇଥିଲେ ।
