ମୁମ୍ବାଇ,୨୬।୧୦: ମହାରାଷ୍ଟ୍ରରେ ରାଜନୀତି ଏବେ ସରଗରମ। କାରଣ ବିଧାନସଭା ନିର୍ବାଚନ ପରେ ଏବେ ରାଜ୍ୟରେ ଭାଜପା-ଶିବସେନା ମେଣ୍ଟ ସରକାର ଗଠନ ହେବାକୁ ଯାଉଛି। ପୂର୍ବରୁ ୫୦-୫୦ ଆସନ ବୁଝାମଣାକୁ ନେଇ ଶିବସେନା ଭାଜପା ସହ ମେଣ୍ଟ କରିଥିବା ବେଳେ ଏବେ ଏହି ସମୟ ଆସି ପହଞ୍ଚିଯାଇଛି। ତେବେ ଏହି ବିଜୟ ପରେ ଭାଜପା ଅଧ୍ୟକ୍ଷ ତଥା ସ୍ବରାଷ୍ଟ୍ରମନ୍ତ୍ରୀ ଅମିତ ଶାହ ଶିବସେନା ମୁଖ୍ୟ ଉଦ୍ଧବ ଠାକରେଙ୍କୁ ଶୁଭେଚ୍ଛା ଜଣାଇଥିବା ବେଳେ ଦୀପାବଳି ପରେ ଆସନ ବୁଝାମଣା କଥା କଥାହେବେ ବୋଲି କହିଛନ୍ତି। କିନ୍ତୁ ବିଶେଷ ସୂତ୍ରରୁ ମିଳିଥିବା ସୂଚନା ଅନୁଯାୟୀ ୫୦-୫୦ ଅଙ୍କକୁ ନେଇ ଶିବସେନା ଅଡିବସିପାରେ ବୋଲି ଅନୁମାନ କରାଯାଉଛି। ଅଥାତ୍ ଅଢେଇ ବର୍ଷ ପାଇଁ ଶିବସେନା ମୁଖ୍ୟମନ୍ତ୍ରୀ ଆସନ ମାଗିପାରେ ବୋଲି ଏବେଠାରୁ ଚର୍ଚ୍ଚା ହେଲାଣି। ଏପଟେ ପ୍ରଥମଥର ଲାଗି ଠାକରେ ପରିବାରର ସୁପୁତ୍ର ଆଦିତ୍ୟ ଠାକରେ ନିର୍ବାଚନରେ ପ୍ରତିଦ୍ୱନ୍ଦିତା କରି ବିଜୟ ଲାଭ କରିଥିବାରୁ ମୁଖ୍ୟମନ୍ତ୍ରୀ ପଦକୁ ନେଇ ମଧ୍ୟ କଳ୍ପନା ଜଳ୍ପନା ଲାଗିବା ସ୍ବାଭାବିକ କଥା। ଏମିତିକି ଠାକରେଙ୍କ ସମର୍ଥକମାନେ ଶୁକ୍ରବାର ଆଦିତ୍ୟ ଭାବି ମୁଖ୍ୟମନ୍ତ୍ରୀ ହେବେ ବୋଲି ପୋଷ୍ଟର ଲଗାଇ ସାରିଛନ୍ତି।
