ବ୍ରହ୍ମପୁର ଅଫିସ,୧୯ା୧୦-ସିପିଏମ ପକ୍ଷରୁ ଶୁକ୍ରବାର ବ୍ରହ୍ମପୁର ଉପଜିଲାପାଳଙ୍କ ଅଫିସ ଆଗରେ ବିକ୍ଷୋଭ ସମାବେଶ କରାଯାଇଥିଲା। ଭାଜପା ନେତୃତ୍ୱାଧୀନ ଏନଡିଏ ସରକାର ଶାସନରେ ଦେଶର ଆର୍ଥିକ ସ୍ଥିତି ବିପର୍ଯ୍ୟସ୍ତ ହୋଇପଡଥିବାରୁ ସାଧାରଣ ଲୋକଙ୍କ ଦୁର୍ଦ୍ଦଶା ବଢ଼ି ଚାଲିଛି। ଏହା ପ୍ରତିବାଦରେ ମିଳିତ ବାମପନ୍ଥୀ ଦଳ ଆହ୍ବାନରେ ବିକ୍ଷୋଭ ସମାବେଶ ହୋଇଥିଲା। ଶତାଧିକ କର୍ମୀ ଲାଲ ପତାକା ଧରି ଏଥିରେ ସାମିଲ ହୋଇଥିଲେ। ମାନ୍ଦାବସ୍ଥା ଦୂର କରି ପୂର୍ବ ସ୍ଥିତି ଆଣିବା ପାଇଁ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଉପଜିଲାପାଳଙ୍କୁ ଦାବିପତ୍ର ପ୍ରଦାନ କରାଯାଇଥିଲା।
ରାଜ୍ୟ ସିପିଏମ ସମ୍ପାଦକ ଅଳି କିଶୋର ପଟ୍ଟନାୟକ ଏଥିରେ ଯୋଗଦେଇ ମୋଦି ସରାକରଙ୍କ ଦେବାଳିଆ ଆର୍ଥିକ ନୀତିର କଡ଼ା ସମାଲୋଚନା କରିଥିଲେ। ବିମୁଦ୍ରୀକରଣ, ଜନ ବିରୋଧୀ ଜିଏସଟି ଲାଗୁ ଯୋଗୁଁ ଆର୍ଥିକ ମାନ୍ଦାବସ୍ଥା ଉପୁଜିଛି ଓ ଏହା ଫଳରେ ଦେଶ ସଂକଟ ମଧ୍ୟରେ ଗତି କରୁଥିବା ସେ ଅଭିଯୋଗ କରିିଥିଲେ । ସରକାରଙ୍କ ପୁଞ୍ଜିପତି ତୁଷ୍ଟିକରଣ ନୀତି ଦ୍ୱାରା ବେକାରୀ ସମସ୍ୟା ବଢ଼ି ଚାଲିଥିବା ଦର୍ଶାଇ ଏହାର ପ୍ରତିରୋଧ ନିମନ୍ତେ ବାମପନ୍ଥୀ ଦଳ ଚଳାଇଥିବା ଆନ୍ଦୋଳନରେ ଜନସାଧାରଣ ସାମିଲ ହେବାକୁ ସିପିଏମ ନେତା ଆହ୍ବାନ ଦେଇଥିଲେ। ସେହିପରି ସିଟୁ ଜେନା ତଥା ବ୍ରହ୍ମପୁର ଆଞ୍ଚଳିକ କମିଟି ସମ୍ପାଦକ ଯୁଧିଷ୍ଠିର ବେହେରାଙ୍କ ସମେତ ବସନ୍ତ ନନ୍ଦ, ପ୍ରତାପ ଚୌଧୁରୀ, ଶିବ ପ୍ରସାଦ ମହାପାତ୍ର, ଅଶୋକ ଦାସ, ବାବୁଲା ନାୟକ, ଗୋପାଳ ପାଣିଗ୍ରାହୀ ଓ ହରି ନାୟକ ପ୍ରମୁଖ ଉଦବୋଧନ ଦେଇଥିଲେ । ବାମପନ୍ଥୀ ନେତାମାନେ ଏହି ପରିପ୍ରେକ୍ଷୀରେ ମହାନଗର ସମସ୍ୟା ଉପସ୍ଥାପନ କରିଥିଲେ । ବ୍ରହ୍ମପୁରରେ ଆରଟିଓ ଅଫିସ ଖୋଲାଯିବା, ବଡ଼ ମେଡିକାଲରେ ନିଅଣ୍ଟିଆ ଔଷଧ ସମସ୍ୟାର ସମାଧାନ, ଆଙ୍କୁଲି ଓଭରବ୍ରିଜ ନିର୍ମାଣ ଅବିଳମ୍ବେ ସମ୍ପୂର୍ଣ୍ଣ କରାଯିବା, ଟଙ୍କିକିଆ ଚାଉଳ ଯୋଗାଣରେ ଆଧାର ଲିଙ୍କ ବନ୍ଦ କରାଯିବାକୁ ଦାବି କରିଥିଲେ ।
