ନୂଆଦିଲ୍ଲୀ,୨୩ା୬: ବିଜ୍ଞାନ ଜଗତରେ ମାନସିକ ସ୍ବାସ୍ଥ୍ୟକୁ ନେଇ ଏକ ବଡ଼ ସଫଳତା ମିଳିଛି। ବୈଜ୍ଞାନିକମାନେ ମାନବ ଶରୀରର ଡିଏନ୍ଏ (ଜେନୋମ) ମଧ୍ୟରେ ଏଭଳି ୭୪ଟି ଦିଗ ଚିହ୍ନଟ କରିଛନ୍ତି, ଯାହା ଆଙ୍ଗ୍ଜାଇଟି ବା ମାନସିକ ଉଦ୍ବେଗ ବା ଉତ୍କଣ୍ଠାର ଲକ୍ଷଣ ସହ ପ୍ରତ୍ୟକ୍ଷ ଭାବେ ଜଡ଼ିତ ରହିଛି। ଏହା ମଧ୍ୟରୁ ୩୯ଟି ଦିଗ ସମ୍ପୂର୍ଣ୍ଣ ନୂତନ ଭାବେ ଆବିଷ୍କୃତ ହୋଇଛି। ଆଙ୍ଗ୍ଜାଇଟିକୁ ନେଇ ଆନୁବଂଶିକ କ୍ଷେତ୍ରରେ ଏହା ବିଶ୍ୱର ସବୁଠାରୁ ବଡ଼ ଗବେଷଣା ବୋଲି କୁହାଯାଇଛି। ‘କିଙ୍ଗ୍ସ କଲେଜ ଲଣ୍ଡନ’ ଏବଂ ଅଷ୍ଟ୍ରେଲିଆର ‘ କ୍ୟୁଆଇଏମ୍ଆର୍ ବର୍ଗହୋଫର୍ ମେଡିକାଲ ରିସର୍ଚ୍ଚ ଇନ୍ଷ୍ଟିଚ୍ୟୁଟ୍’ର ଗବେଷକମାନେ ମିଳିତ ଭାବେ ପ୍ରାୟ ୬,୯୩,୮୬୯ ଜଣ ବ୍ୟକ୍ତିଙ୍କ ବଂଶାନୁକ୍ରମିକ ତଥ୍ୟ ଅନୁଧ୍ୟାନକରି ଏହି ତଥ୍ୟ ପାଇଛନ୍ତି। ପ୍ରସିଦ୍ଧ ଜର୍ନାଲ ‘ନେଚର ହ୍ୟୁମାନ ବିହେଭିୟର’ରେ ଏହି ରିପୋର୍ଟ ପ୍ରକାଶ ପାଇଛି। ମୁଖ୍ୟ ଗବେଷକ ମେଗାନ ସ୍କେଲ୍ଟନଙ୍କ କହିବା ଅନୁଯାୟୀ, କେବଳ ଜେନେଟିକ୍ସ (ବଂଶଗତ କାରଣ) ଯୋଗୁ ଆଙ୍ଗ୍ଜାଇଟି ହୁଏନାହିଁ। ମଣିଷର ଜୀବନଶୈଳୀ, ସାମାଜିକ ପରିବେଶ ଏବଂ ମାନସିକ ସ୍ଥିତି ଏଥିପାଇଁ ୯୪ ପ୍ରତିଶତ ଦାୟୀ ଥିବାବେଳେ ଜେନେଟିକ୍ସ ମାତ୍ର ୬ ପ୍ରତିଶତ ପ୍ରଭାବ ପକାଇଥାଏ। ତେଣୁ ଜେନେଟିକ୍ ବିପଦ ଥିବା ବ୍ୟକ୍ତି ମଧ୍ୟ ଭଲ ପରିବେଶରେ ରହିଲେ ଏହି ସମସ୍ୟାରୁ ମୁକ୍ତ ରହିପାରିବେ। ଏହି ଚିହ୍ନଟ ହୋଇଥିବା ଜିନ୍ଗୁଡ଼ିକ ମସ୍ତିଷ୍କର କୋଷଗୁଡ଼ିକ ମଧ୍ୟରେ ଯୋଗାଯୋଗ ରକ୍ଷାକରିବାରେ କାମ କରନ୍ତି। ଏହି ଗବେଷଣା ଦ୍ୱାରା ଭବିଷ୍ୟତରେ ଆଙ୍ଗ୍ଜାଇଟି, ଡିପ୍ରେସନ, କ୍ରନିକ୍ ପେନ୍ (ଦୀର୍ଘଦିନର ଯନ୍ତ୍ରଣା) ଏବଂ ମାଇଗ୍ରେନ୍ ଭଳି ଜଟିଳ ସମସ୍ୟାର ଠିକ୍ ଓ ପ୍ରଭାବଶାଳୀ ଚିକିତ୍ସା କରାଯାଇପାରିବ ବୋଲି କୁହାଯାଇଛି।
