ଲକ୍ଷ୍ନୌ, ୧୧।୦୬: ଉତ୍ତର ପ୍ରଦେଶର ଅମରୋହ ଜିଲାରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ଦୁର୍ଘଟଣାରେ ୪ ଜଣ ୟୁଟ୍ୟୁବରଙ୍କ ମୃତ୍ୟୁ ହୋଇଥିବା ଜଣାପଡ଼ିଛି। ଏହି ୟୁଟ୍ୟୁବରମାନେ ଗଜରୈଲାରେ ଜନ୍ମଦିନ ପାଳନ କରି ବୁଲନ୍ଦ ସହରକୁ ଫେରୁଥିବା ବେଳେ ଏପରି ଦୁର୍ଘଟଣା ଘଟିଥିଲା।
ମିଳିଥିବା ସୂଚନା ଅନୁସାରେ, ପ୍ରାଣ ହରାଇଥିବା ୟୁଟ୍ୟୁବରମାନେ ହେଉଛନ୍ତି ଲକି, ସଲମାନ, ଶାହାରୁଖ ଏବଂ ଶାହନାୱାଜ । ଏହି ଚାରିଜଣ ଯୁବକ ଏକାଠି ମିଶି ରାଉଣ୍ଡ ୨ ୱାଲର୍ଡ ଚ୍ୟାନେଲ ଚଳାଉଥିଲେ ଏବଂ କମେଡି ବିଷୟବସ୍ତୁ ତିଆରି କରୁଥିଲେ । ସୋସିଆଲ ମିଡିଆରେ ତାଙ୍କର ବହୁତ ଭଲ ସବ୍ସ୍କ୍ରାଇବର ଏବଂ ଫଲୋର୍ସ ରହିଛନ୍ତି । ସେମାନଙ୍କର ୟୁଟ୍ୟୁବରେ ଦୁଇ ମିଲିୟନରୁ ଅଧିକ ଗ୍ରାହକ ଅଛନ୍ତି। ସେହିପରି ଇନଷ୍ଟାଗ୍ରାମରେ ୮୦ ହଜାରରୁ ଅଧିକ ଫଲୋର୍ସ ଅଛନ୍ତି। ଏହା ବ୍ୟତୀତ ଫେସବୁକରେ ପ୍ରାୟ ଦୁଇ ଲକ୍ଷ ଫଲୋର୍ସ ମଧ୍ୟ ରହିଛନ୍ତି।
ପୋଲିସର ସୂଚନାନୁସାରେ, ଏହି ଚାରିଜଣ ଯୁବକ ଜନ୍ମଦିନ ଉତ୍ସବ ସାରି ଘରକୁ ଫେରୁଥିବା ବେଳେ, ସେମାନଙ୍କ ମାରୁତି ସୁଜୁକି ଏର୍ଟିଗା କାର ଆଗରୁ ଆସୁଥିବା ମହିନ୍ଦ୍ରା ବୋଲେରୋ ସହିତ ମୁହାଁମୁହିଁ ଧକ୍କା ହୋଇଥିଲା। ଫଳରେ ସମସ୍ତ ଚାରିଜଣ ୟୁଟ୍ୟୁବରଙ୍କର ଘଟଣାସ୍ଥଳରେ ମୃତ୍ୟୁ ହୋଇଯାଇଥିଲା। ଅନ୍ୟପଟେ ବୋଲେରୋରେ ଥିବା ୬ଜଣଙ୍କୁ ଗୁରୁତର ଅବସ୍ଥାରେ ଡାକ୍ତରଖାନା ନିଆଯାଇଥିଲା ।
