ଦାରିଙ୍ଗବାଡି, ୮।୧୨ (ଅରୁଣ ସାହୁ ): କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ସିମନବାଡି ଉଚ୍ଚ ପ୍ରାଥମିକ ବିଦ୍ୟାଳୟରେ ମଧ୍ୟାନ୍ନ ଭୋଜନ ଖାଇ ଛାତ୍ରୀଛାତ୍ର ଅସୁସ୍ଥ ଘଟଣାରେ ଜିଲା ପ୍ରଶାସନର ନିର୍ଦ୍ଦେଶକ୍ରମେ ଜିଲା ଜନସ୍ବାସ୍ଥ୍ୟ ବିଭାଗ ପକ୍ଷରୁ ତଦନ୍ତ ଆରମ୍ଭ ହୋଇଛି। ଏହି ଘଟଣାକୁ ଜିଲା ପ୍ରଶାସନ ଗୁରୁତ୍ୱ ଭାବେ ନେଇଛି। ରବିବାର ସକାଳେ ଜନସ୍ବାସ୍ଥ୍ୟ ବିଭାଗ କାର୍ଯ୍ୟାଳୟରୁ ଏକ ତଦନ୍ତକାରୀ ଦକ ଦାରିଙ୍ଗବାଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚି ଛାତ୍ରୀଛାତ୍ର ମାନଙ୍କ ବୟାନ ରେକର୍ଡ କରିବା ସହ ଚିକିତ୍ସା କରୁଥିବା ଡାକ୍ତର ଏବଂ ସିମନବାଡି ପହଞ୍ଚି ବିଦ୍ୟାଳୟ ପ୍ରଧାନଶିକ୍ଷକ ବିଦେଶୀ ନାୟକ ଏବଂ ଅନ୍ୟ ସହକାରୀ ଶିକ୍ଷୟତ୍ରୀ ଓ ମଧ୍ୟାନ୍ନ ଭୋଜନ ରୋଷେଇ ଦାୟିତ୍ୱରେ ରହିଥିବା ମହିଳା ସ୍ବୟଂ ସହାୟକ ଗୋଷ୍ଠୀର ସଦସ୍ୟଙ୍କ ସମେତ ଛାତ୍ରୀଛାତ୍ର ମାନଙ୍କୁ ବିଦ୍ୟାଳୟରେ ପଚରାଉଚରା କରିଛନ୍ତି। ଏଥି ସହ ମଧ୍ୟାନ୍ନ ଭୋଜନ ପାଇଁ ରଖାଯାଇଥିବା ଚାଉଳର ନମୁନା ସଂଗ୍ରହ କରିବା ସହ ରୋଷେଇଶାଳ ଓ ଚାଉଳ ରଖାଯାଇଥିବା ଷ୍ଟୋରରୁମକୁ ଦେଖି ଅସନ୍ତୋଷବ୍ୟକ୍ତ କରିଛନ୍ତି ଗୋଟିଏ ନଳକୂପ ରହିଥିବା ବେଳେ ସେଥିରୁ ପିଇବା ପାଇଁ ବ୍ୟବହାର ସହ ଛାତ୍ରୀଛାତ୍ରଙ୍କ ପାଇଁ ରୋଷେଇ ଓ ଅନ୍ୟ କାର୍ଯ୍ୟପାଇଁ ବ୍ୟବହାର କରୁଛନ୍ତି । ଯାହାକି ଦୂଷିତ ପରିବେଶ ମଧ୍ୟରେ ଉକ୍ତ ନଳକୂପ ରହିଥିବା ତଦନ୍ତ ଦଳ ଉଦ୍ବେଗ ପ୍ରକାଶ କରିଛନ୍ତି । ପତିତ୍ୟକ୍ତ ରୋଷେଇ ଗୃହରେ ପିଲାଙ୍କ ପାଇଁ ମଧ୍ୟାନ୍ନ ଭୋଜନ ରୋଷେଇକୁ ନେଇ ତଦନ୍ତ ଟିମ ଚିନ୍ତା ପ୍ରକାଟ କରିଛନ୍ତି ।ସେହିପରି ଆଗକୁ ମଧ୍ୟାନ୍ନ ଭୋଜନ ରୋଷେଇରେ ଆହୁରି ସ୍ବଚ୍ଛତା ଆଣିବାକୁ ମହିଳା ରୋଷେୟା ଏବଂ ବିଦ୍ୟାଳୟ କର୍ତ୍ତ୍ୟୁପକ୍ଷଙ୍କୁ ପରାମର୍ଶ ଦେଇଛନ୍ତି। ଏଥିରେ ଏପିଡେମୋଲୋଜିଷ୍ଟ ସ୍ପନ୍ଦନ ଭଞ୍ଜଦେଓ, ଜିଲା ଖାଦ୍ୟ ନିରାପତ୍ତା ଓ ମାନ ପ୍ରାଧିକରଣ ଅଧିକାରୀ ସତ୍ୟବ୍ରତ ଷେଣ୍ଢ ପ୍ରମୁଖ ପହଞ୍ଚି ତଦନ୍ତ କରିଛନ୍ତି ।
