ବ୍ରହ୍ମପୁର ଅଫିସ,୧୬ା୯: ଠିକାଦାର ପୂର୍ଣ୍ଣଚନ୍ଦ୍ର ନାହାକ ହତ୍ୟା ଘଟଣାରେ ସମ୍ପୃକ୍ତ ୩ ଅଭିଯୁକ୍ତଙ୍କୁ ବ୍ରହ୍ମପୁର ସଦର ଥାନା ପୋଲିସ ଗୁରୁବାର କାବୁ କରିଛି। ସେମାନଙ୍କ ମଧ୍ୟରେ ଜଣେ ହତ୍ୟାକାଣ୍ଡରେ ସମ୍ପୃକ୍ତ ଥିବା ବେଳେ ଅନ୍ୟ ଦୁଇଜଣ ବାପା- ପୁଅ ଏହାର ଷଡଯନ୍ତ୍ରକାରୀ ବୋଲି ପୋଲିସ ସ୍ପଷ୍ଟ କରିଛି। ପୂର୍ବ ଶତୃତା ଓ ପୁଞ୍ଜିଭୂତ ଅଶାନ୍ତିରୁ ପୂର୍ଣ୍ଣଚନ୍ଦ୍ରଙ୍କୁ ସଂଘବଦ୍ଧ ଭାବେ ଭୀମ ବେହେରା ଓ ତାଙ୍କର ଅନ୍ୟ ୩ ସହଯୋଗୀ ବିଭତ୍ସ ଭାବେ ହତ୍ୟା କରିଥିବା ପୋଲିସ ସ୍ପଷ୍ଟ କରିଛି। ଏଥିରେ ୩ ଜଣ ଷଡଯନ୍ତ୍ରକାରୀ ଥିବା ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ଏହି ହତ୍ୟାକାଣ୍ଡରେ ୭ଜଣଙ୍କ ସମ୍ପୃକ୍ତି ଥିବା ପୋଲିସ ସ୍ପଷ୍ଟ କରିଛି। ଗିରଫ ୩ ଅଭିଯୁକ୍ତଙ୍କ ମଧ୍ୟରେ ରହିଛନ୍ତି ହତ୍ୟାକାରୀ ରିଶିପୁର ଗ୍ରାମର ଭୀମ ବେହେରା ଓ ଅନ୍ୟ ଦୁଇଜଣ ଷଡଯନ୍ତ୍ରକାରୀ ହେଲେ ରିଶିପୁର ଗ୍ରାମର କୃଷ୍ଣ ବେହେରା (୫୦) ଓ ତାଙ୍କ ପୁଅ ସାଗର (୨୬)। ମାମଲା ନମ୍ବର ୪୨୨/୨୨ ରେ ୩ ଅଭିଯୁକ୍ତଙ୍କୁ ଗୁରୁବାର କୋର୍ଟ ଚାଲାଣ କରାଯାଇଛି। ଏନେଇ ପୋଲିସ ମୁଖ୍ୟାଳୟରୁ ଜାରି ହୋଇଥିବା ଏକ ପ୍ରେସ୍ନୋଟରେ ବ୍ରହ୍ମପୁର ଏସ୍ପି ଡ. ଶ୍ରବଣା ବିବେକ ଏମ. ସୂଚନା ଦେଇଛନ୍ତି। ଫେରାର ଅନ୍ୟ ୩ ଅଭିଯୁକ୍ତଙ୍କୁ ଖୁବଶୀଘ୍ର ଗିରଫ କରାଯିବ ବୋଲି ପୋଲିସ କହିଛି।
ପ୍ରକାଶଯେ, ପୁଟୁଷୋତ୍ତମପୁର ଥାନା ଅନ୍ତର୍ଗତ ରିଶିପୁର ଗ୍ରାମରେ ରହୁଥିବା ପୂର୍ଣ୍ଣଚନ୍ଦ୍ର ନାହାକଙ୍କ ସହ ଭୀମ ବେହେରା ଗୋଷ୍ଠୀ ମଧ୍ୟରେ ପୂର୍ବରୁ ଏକ ମାମଲାକୁ ନେଇ ଅଶାନ୍ତି ଲାଗି ରହିଥିଲା। ଗତ ୧୩ ତାରିଖରେ ପୂର୍ଣ୍ଣଚନ୍ଦ୍ର ବ୍ରହ୍ମପୁର ପୋକ୍ସୋ କୋର୍ଟକୁ ଆସୁଥିଲେ। ଭୀମ ମଧ୍ୟ ଉକ୍ତ କୋର୍ଟକୁ ଆସିବାର ଥିଲା। ଏକଥା ଭୀମ ଜାଣିବା ପରେ ତାଙ୍କ ୩ ଜଣ ସହଯୋଗୀଙ୍କ ସହ ସେମାନେ ଗ୍ରାମରୁ ପୂର୍ଣ୍ଣଚନ୍ଦ୍ରଙ୍କୁ ପିଛା କରିଥିଲେ। ଗୋଲା ଚଣ୍ଡୀପଦର- ରେଗିଡି ଛକରେ ଥିବା ଏକ ନିଛାଟିଆ ସ୍ଥାନରେ ଭୀମ ଓ ତାଙ୍କ ସହଯୋଗୀମାନେ ପୂର୍ଣ୍ଣଙ୍କ ଗାଡି ଅଟକାଇ ଥିଲେ। ପରେ ପୂର୍ଣ୍ଣଚନ୍ଦ୍ରଙ୍କୁ ଅପରାଧୀମାନେ ଚାରିପଟୁ ଘେରିଯାଇ ଖଣ୍ଡାରେ ଗୋଡ଼ାଇ ଗୋଡ଼ାଇ ହାଣି ହତ୍ୟା କରିଥିଲେ।
