ଭଣ୍ଡାରିପୋଖରୀ,୧୪।୭ (ଡି.ଏନ.ଏ): ଭଣ୍ଡାରିପୋଖରୀ ବ୍ଲକ କୃଷି କାର୍ଯ୍ୟଳୟ ନିକଟରେ ଏକ ବଡ ଲୁଟ୍ ହୋଇଛି। ସୋମବାର ପୂର୍ବାହ୍ନ ପ୍ରାୟ ସାଢେ ୧୧ଟା ସମୟରେ ନିର୍ଗୁଣ୍ଡି ପଞ୍ଚାୟତ ଗୁହାଳିଆ ଗ୍ରାମର ଉମାକାନ୍ତ ଖଟୁଆଙ୍କ ବାଇକ ହ୍ୟାଣ୍ଡେଲରେ ଟଙ୍ଗା ଯାଇଥିବା ଏକ ଟଙ୍କା ବ୍ୟାଗ ଲୁଟ୍ କରିନେଇଛନ୍ତି। ବ୍ୟାଗ୍ରେ ଲକ୍ଷେ ୩୨ ହଜାର ଟଙ୍କା ଥିଲା। ଉମାକାନ୍ତ ସ୍ଥାନୀୟ ଥାନାରେ ଅଭିଯୋଗ କରିବା ପରେ ପୋଲିସ ଘଟଣାସ୍ଥଳେ ପହଞ୍ଚି ଖୋଜାଖୋଜି କରିଥିଲେ ସୁଦ୍ଧା ସୁରାକ ପାଇନାହିଁ। ସ୍ବଚ୍ଛ ଭାରତ ଯୋଜନା ମୋଟିଭେଟର ଥିବା ଉମାକାନ୍ତ କୋଣସି କାମରେ ବ୍ଲକ କୃଷି କାର୍ଯ୍ୟାଳୟକୁ ଆସିଥିଲେ। କାର୍ଯ୍ୟାଳୟରୁ ଫେରି ବାଇକ ଉପରେ କିଛି ମଇଳା ପଡିଥିବା ଦେଖି ପାଣି ଆଣି ଧୋଇଥିଲେ। ଧୋଇସାରି ଟଙ୍କା ବ୍ୟାଗ ବାଇକ ହ୍ୟାଣ୍ଡେଲରେ ଟାଙ୍ଗି ବୋତଲ ଦେବାକୁ ଯାଇଥିବାବେଳେ ବାଇକରେ ଟଙ୍ଗା ଯାଇଥିବା ଟଙ୍କା ବ୍ୟାଗ କେହି ଲୁଟେରା ନେଇ ପାର ହୋଇଯାଇଥିଲେ। ଏ ସମ୍ପର୍କରେ ଥାନାରେ ମୌଖିକ ଅଭିଯୋଗ କରିବା ପରେ ପୋଲିସ ଖୋଜା ଖୋଜି କରିଥିଲେ ମଧ୍ୟ କୌଣସି ସୁରାକ ପାଇନାହିଁ। ଏଥିନେଇ ଉମାକାନ୍ତ ସୋମବାର ରାତିରେ ଭଣ୍ଡାରିପୋଖରୀ ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ଥାନା କେଶ ନଂ ୧୨୮/୨୦ ରେ ରୁଜୁ କରିଛି । ପ୍ରକାଶ ଥାଉ କି କିଛି ଦିନ ଧରି ଚୋରି ଲୁଟ ବନ୍ଦ ଥିବା ବେଳେ ଏବେ ବଢ଼ିବାରେ ଲାଗିଲାଣି। ପୂର୍ବାହ୍ନ ବ୍ଲକ ଛକରେ ଲୋକ ହାଉଯାଉ ହେଉଥିବା ବେଳେ ଚୋରି ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଛି।
