ପୁରୀ ଅଫିସ,୧୬।୧୦: ଶ୍ରୀକ୍ଷେତ୍ରରେ ଚାଲିଛି କାର୍ତ୍ତିକ ବ୍ରତ। ଏଠାରେ ଲକ୍ଷାଧିକ ଭକ୍ତ, ହବିଷିଆଳିଙ୍କ ସମାଗମ ହୋଇଛି। ଜିଲା ପ୍ରଶାସନ ପକ୍ଷରୁ ଟୁରିଷ୍ଟ କମ୍ପ୍ଲେକ୍ସ, ପୌର କଲ୍ୟାଣ ମଣ୍ଡପ ଓ ନରେନ୍ଦ୍ରକୋଣରେ ଅସ୍ଥାୟୀ ଶିବିରରେ ରହିଛନ୍ତି ହବିଷିଆଳି। ବୁଧବାର ୩ ହବିଷିଆଳି ଗୁରୁତର ଅସୁସ୍ଥ ହୋଇପଡିଛନ୍ତି। ସେମାନେ ହେଲେ ବ୍ରହ୍ମଗିରି ଭଣ୍ଡାରିକୁଦାର ଆଶା ଦେବୀ(୭୫), ଖୋର୍ଦ୍ଧା ବାଣପୁରର ଶଶୀ ଦେବୀ(୭୨) ଓ ବ୍ରହ୍ମଗିରିରର ସୁନ୍ଦରୀ ମଲ୍ଲିକ(୭୦)।
ବୁଧବାର ସକାଳେ ଟୁରିଷ୍ଟ କମ୍ପ୍ଲେକ୍ସରେ ରହୁଥିବା ଆଶା ଶୌଚାଳୟରେ ପଡି ଆହତ ହୋଇଥିଲେ । ସେହିପରି ଶଶୀଙ୍କ ମୁଣ୍ଡ ବୁଲାଇବାରୁ ସେ ଅଚେତ ହୋଇ ପଡ଼ିଯାଇଥିଲେ। ଉଭୟଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଆଶାଙ୍କ ବାମପାଶର୍ବ ପକ୍ଷାଘାତ ଆକ୍ରାନ୍ତ ହୋଇଥିବା ଜଣାପଡିଛି। ସେହିପରି ନରେନ୍ଦ୍ରକୋଣ ଶିବିରରେ ରହୁଥିବା ସୁନ୍ଦରୀ ସାଥୀଙ୍କ ସହ ନରେନ୍ଦ୍ର ପୁଷ୍କରିଣୀକୁ ସ୍ନାନ କରିବାକୁ ଯାଇଥିଲେ। ପାହାଚରେ ତାଙ୍କ ଗୋଡ଼ ଖସିଯିବାରୁ ସେ ଗୁରୁତର ହୋଇଛନ୍ତି ।
