ନୂଆଦିଲ୍ଲୀ, ୨୩ା୩: ଦେଶରେ ତିନି ବର୍ଷ ଧରି ବାୟୁ ଗୁଣବତ୍ତା ବୃଦ୍ଧିରେ ବ୍ରେକ୍ ଲାଗିଛି। ଭାରତରେ ପ୍ରଦୂଷଣ ଚିନ୍ତାଜନକ ଭାବେ ବୃଦ୍ଧି ପାଇଛି। ୨୦୨୧ରେ ଦିଲ୍ଲୀ ବିଶ୍ୱର ସର୍ବାଧିକ ପ୍ରଦୂଷିତ ରାଜଧାନୀ ହୋଇଛି। ଏହାବାଦ୍ ଦୁନିଆର ସବୁଠାରୁ ପ୍ରଦୂଷିତ ସହର ମଧ୍ୟରେ କେବଳ ଭାରତର ୬୩ ସହର ରହିଛି ବୋଲି ସ୍ବିସ୍ ଫାର୍ମ ଆଇକ୍ୟୁଏୟାର ଦ୍ୱାରା ପ୍ରକାଶିତ ବିଶ୍ୱ ବାୟୁ ଗୁଣବତ୍ତା ରିପୋର୍ଟରେ ଦର୍ଶାଯାଇଛି। ରିପୋର୍ଟ ଅନୁସାରେ, ଲେଥାଲ ଏବଂ ମାଇକ୍ରୋସ୍କୋପିକ୍ ପିଏମ୍ ୨.୫ ପ୍ରଦୂଷକରେ ମପା ଯାଉଥିବା ହାରାହାରି ବାୟୁ ପ୍ରଦୂଷଣ କ୍ୟୁବିକ୍ ମିଟର ପିଛା ୫୮.୧ ମାଇକ୍ରୋଗ୍ରାମ୍ ରହିଛି, ଯାହା ବିଶ୍ୱ ସ୍ବାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍ଓ) ବାୟୁ ଗୁଣବତ୍ତା ଗାଇଡ୍ଲାଇନ୍ ତୁଳନାରେ ୧୦ ଗୁଣା ଅଧିକ। ଏଥିସହ ଭାରତର କୌଣସି ସହର ଡବ୍ଲ୍ୟୁଏଚ୍ଓର ମାନକ ପୂରଣ କରିପାରିନାହିଁ।
ଉତ୍ତର ଭାରତର ସ୍ଥିତି ସବୁଠାରୁ ଖରାପ ରହିଛି। କ୍ରମାଗତ ଦ୍ୱିତୀୟ ବର୍ଷ ପାଇଁ ଦିଲ୍ଲୀ ବିଶ୍ୱର ସର୍ବାଧିକ ପ୍ରଦୂଷିତ ରାଜଧାନୀ ହୋଇଛି। ପୂର୍ବବର୍ଷ ତୁଳନାରେ ଦିଲ୍ଲୀରେ ପଲ୍ୟୁସନ୍ ୧୫% ବୃଦ୍ଧି ପାଇଛି। ଡବ୍ଲ୍ୟୁଏଚ୍ଓ ସୁରକ୍ଷା ଲିମିଟ୍ ୫ ମାଇକ୍ରୋଗ୍ରାମ୍ ଥିବାବେଳେ ଦିଲ୍ଲୀରେ ପିଏମ୍୨.୫ ପ୍ରାୟ ୨୦ ଗୁଣା ବଢ଼ି କ୍ୟୁବିକ୍ ମିଟର ପିଛା ୯୬.୪ ମାଇକ୍ରୋଗ୍ରାମ୍ ରହିଛି। କେବଳ ବାୟୁ ପ୍ରଦୂଷଣରେ ଦିଲ୍ଲୀର ସ୍ଥାନ ବିଶ୍ୱରେ ୪ ନମ୍ବର ରହିଛି। ରାଜସ୍ଥାନର ଭିଓ୍ବାଡି ବିଶ୍ୱର ସବୁଠାରୁ ପ୍ରଦୂଷିତ ସହର ହୋଇଛି। ଏହା ତଳକୁ ଉତ୍ତରପ୍ରଦେଶର ଗାଜିଆବାଦ ରହିଛି। ଶୀର୍ଷ ୧୫ ପ୍ରଦୂଷିତ ସହର ଦିଲ୍ଲୀ ପାଖାପାଖି ରହିଛି। ପ୍ରଦୂଷିତ ସହର ମଧ୍ୟରୁ ଅର୍ଦ୍ଧାଧିକ ଉତ୍ତରପ୍ରଦେଶ ଏବଂ ହରିୟାଣାର। କେବଳ ଚେନ୍ନାଇକୁ ଛାଡ଼ି ଅନ୍ୟ ସମସ୍ତ ୬ ମେଟ୍ରୋରେ ଗତବର୍ଷ ପ୍ରଦୂଷଣ ମାତ୍ରା ବଢ଼ିଛି। ମୁଖ୍ୟତଃ ଯାନବାହନରୁ ନିର୍ଗତ ଧୂଆଁ, କୋଇଲା ପାଓ୍ବାର ପ୍ଲାଣ୍ଟ, ଶିଳ୍ପ ବର୍ଜ୍ୟ, ନିର୍ମାଣ ଓ ରନ୍ଧନ କ୍ଷେତ୍ରରେ ଜୈବ ଇନ୍ଧନ ବ୍ୟବହାର ଆଦି ପ୍ରଦୂଷଣ ବୃଦ୍ଧିର ପ୍ରମୁଖ କାରଣ ପାଲଟିଛି। ବାୟୁ ପ୍ରଦୂଷଣ ବିପଜ୍ଜନକ ସ୍ତରରେ ପହଞ୍ଚିବା କାରଣରୁ ଗତ ବର୍ଷ ନଭେମ୍ବରରେ ଦିଲ୍ଲୀରେ ଏକାଧିକ ବୃହତ୍ ପାଓ୍ବାର ପ୍ଲାଣ୍ଟ୍, ସହ କଳକାରଖାନା ବନ୍ଦ କରିଦିଆଯାଇଥିଲା। ଏଥିଜନିତ ସଙ୍କଟ ଯୋଗୁ ଭାରତ ବାର୍ଷିକ ପ୍ରାୟ ୧୫୦ ବିଲିୟନ ଡଲାର(ପ୍ରାୟ ୧,୧୪,୦୨,୭୯,୦୦,୦୦,୦୦୦ ଟଙ୍କା) କ୍ଷତି ସହିବ ବୋଲି ଆକଳନ କରାଯାଇଛି। ସ୍ବାସ୍ଥ୍ୟ ଉପରେ ମଧ୍ୟ ପ୍ରଦୂଷଣର ବ୍ୟାପକ ପ୍ରଭାବ ପଡ଼ିବ। ଏଥିଯୋଗୁ ହୃଦ୍ଜନିତ ସମସ୍ୟା ଏବଂ ଫୁସ୍ଫୁସ୍ ସଂକ୍ରମଣ କାରଣରୁ ପ୍ରତି ୩ ମିନିଟ୍ରେ ମୃତ୍ୟୁ ଘଟିପାରେ ବୋଲି ଆକଳନ କରାଯାଇଛି।
