ବଇଣ୍ଡା, ୧୭ା୫(ଡି.ଏନ.ଏ.)- ଗରିବ ଲୋକଙ୍କୁ ସରକାର ରାଶନ କାର୍ଡ ମାଧ୍ୟମରେ ଚାଉଳ, ଗହମ ଆଦି ଯୋଗାଇ ଦେଉଥିବାବେଳେ ଅନେକ ସମୟରେ ଏଥିରେ ଅନିୟମିତତା ହେଉଥିବା ଖବର ସାମନାକୁ ଆସୁଛି। ଏପରିକି ରାଶନ କାର୍ଡଧାରୀଙ୍କ ମୃତ୍ୟୁ ପରେ ମଧ୍ୟ ସେମାନଙ୍କ ନାମରେ ଚାଉଳ ଉଠାଯାଉଛି, ଯାହା ଅନୁଗୋଳ ଜିଲା ଆଠମଲ୍ଲିକ ବ୍ଲକ କୁରୁମଟାପ ପଞ୍ଚାୟତରେ ଦେଖିବାକୁ ମିଳିଛି। ଏହି ପଞ୍ଚାୟତରେ ରାଶନ ସାମଗ୍ରୀ ଯୋଗାଣରେ ବ୍ୟାପକ ହେରଫେର ହେଉଥିବା ସରପଞ୍ଚ ସୁମନ୍ତ କୁମାର ବେହେରା ଶନିବାର ଅନୁଗୋଳ ଜିଲାପାଳଙ୍କଠାରେ ଅଭିଯୋଗ କରିଛନ୍ତି
ଅଭିଯୋଗ ମୁତାବକ, କୁରୁମଟାପ ପଞ୍ଚାୟତ ଅଧୀନରେ ଥିବା କେତେକ ଡିଲର ରାଶନ କାର୍ଡ ଯୋଗାଇଦେବାରେ ଅନିୟମିତତା କରୁଛନ୍ତି। ବିଶେଷ କରି ଚାଉଳ, ଗହମ ବଣ୍ଟନ ବେଳେ ଓଜନରେ ହିତାଧିକାରୀଙ୍କୁ ଠକୁଛନ୍ତି। ଅନେକ ହିତାଧିକାରୀଙ୍କ ନାମରେ ଚାଉଳ ଆସୁଥିବାବେଳେ ସେମାନଙ୍କ ଆଧାର କାର୍ଡ ରାଶନ କାର୍ଡରେ ସଂଯୋଗ କରାଯାଇନାହିଁ। ଫଳରେ ସମ୍ପୃକ୍ତ ହିତାଧିକାରୀଙ୍କୁ ଡିଲର ଚାଉଳ ଦେଉନାହାନ୍ତି। ସେହିପରି ବରପାଲି ଗ୍ରାମର ଦୀନବନ୍ଧୁ ରାଉଳଙ୍କ ୨୦୧୫ରେ ଏବଂ ମନ୍ଦରବାହାଳ ଗ୍ରାମର ସୁବାସ ପ୍ରଧାନଙ୍କ ୨୦୧୭ରେ ମୃତ୍ୟୁ ଘଟିସାରିଥିବାବେଳେ ଉଭୟଙ୍କ ନାମରେ ଡିଲର ଚାଉଳ ଉଠାଇ ହଡ଼ପ କରୁଛନ୍ତି। କେବଳ ଏତିକି ନୁହେଁ ପଞ୍ଚାୟତର ପ୍ରାୟ ୫୦ରୁ ଊର୍ଦ୍ଧ୍ୱ ମୃତ ବ୍ୟକ୍ତିଙ୍କ ନାମରେ ରାଶନ ସାମଗ୍ରୀ ଉଠାଯାଇ ଏହାକୁ ହଡ଼ପ କରାଯାଉଥିବା ସାଧାରଣରେ ଅଭିଯୋଗ ହୋଇଛି ଏଥିପ୍ରତି ଜିଲାପାଳ ଦୃଷ୍ଟି ଦେଇ ଭିଜିଲାନ୍ସ ତଦନ୍ତ କରାଯିବାକୁ ଦାବି ହୋଇଛି। ଏ ସମ୍ପର୍କରେ ଆଠମଲ୍ଲିକ ଉପଖଣ୍ଡ ଯୋଗାଣ ଅଧିକାରୀ ଦାଶରଥି ସୋରେନ କୁହନ୍ତି, ମୃତ ବ୍ୟକ୍ତିଙ୍କ ନାମରେ ଚାଉଳ ଉଠାଣ ଘଟଣା ନଜରକୁ ଆସିନାହିଁ। ଏ ଦିଗରେ ତଦନ୍ତ କରାଯିବ।
