ଭଦ୍ରକ ଅଫିସ, ୨୨।୧୦- ଆଉ ୫ ଦିନ ପରେ ଦୀପାବଳି। ଓଡ଼ିଶା ପ୍ରସିଦ୍ଧ ଭଦ୍ରକ କାଳୀପୂଜା ପାଇଁ ପ୍ରସ୍ତୁତି ଜୋର ଧରିଛି। ବିଭିନ୍ନ ପୂଜା ମଣ୍ଡପରେ ଆକର୍ଷଣୀୟ ସାଜସଜ୍ଜା, ମୂର୍ତ୍ତି ନିର୍ମାଣ କାର୍ଯ୍ୟ ଚାଲିଛି। ସାମାଜିକ ସଚେତନତା ସୃଷ୍ଟି ପାଇଁ ଅନ୍ୟ ବର୍ଷ ଭଳି ଏଥର ପୂଜା ମଣ୍ଡପରେ ବାରୁଆଳି ମୂର୍ତ୍ତି ଆକର୍ଷଣ ରହିବ। ପୌରାଣିକ ଉପାଖ୍ୟାନ ସମେତ ଟ୍ରାଫିକ ସମସ୍ୟା ଭଳି ବିଭିନ୍ନ ସାମାଜିକ ପ୍ରସଙ୍ଗକୁ ନେଇ ନୂତନ ଶୈଳୀରେ ବାରୁଆଳି ମୂର୍ତ୍ତି ନିର୍ମାଣ କରାଯାଉଛି। ମୀନାବଜାର, ବ୍ୟବସାୟିକ ଷ୍ଟଲ, ଦୋଳି, ଚକ୍ରି, ସର୍କସ୍ ଓ ମ୍ୟାଜିକ ଭଳି ମନୋରଞ୍ଜନ ମାଧ୍ୟମ ଏବଂ ଅପେରା ଭଳି ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନରେ ସମସ୍ତେ ବ୍ୟସ୍ତ ରହିଛନ୍ତି। ଚରମ୍ପା ଅଞ୍ଚଳରେ ବିଭିନ୍ନ ଯାତ୍ରା ପାର୍ଟିର ବ୍ୟାନର ଛାଇ ଗଲାଣି। ପୂଜା ପ୍ରସ୍ତୁତି ନେଇ ସାରା ସହର ପରିବେଶ ଏବେଠୁ ଚଳଚଞ୍ଚଳ ହୋଇଉଠିଛି।
ଚରମ୍ପା ଷ୍ଟେଶନ ଅଞ୍ଚଳରେ କାରିଗରମାନେ ଦିନରାତି ଏକ କରି କାଳୀପୂଜା ପାଇଁ ପାରମ୍ପରିକ ମେଢ଼ ସାଙ୍ଗକୁ ମଣ୍ଡପରେ ଟେଣ୍ଟ ଓ ସାଜସଜ୍ଜା କାର୍ଯ୍ୟରେ ଲାଗିପଡ଼ିଛନ୍ତି। ଦୀପାବଳି ତିଥିରୁ ମଣ୍ଡପରେ ପୂଜାପାଠ ଅନୁଷ୍ଠିତ ହେବ। ଏଥିସହ ଭଦ୍ରକର ଅଧିଷ୍ଠାତ୍ରୀ ଦେବୀ ମା’ ଭଦ୍ରକାଳୀ ପୀଠ ସମେତ ଅନ୍ୟ ଶକ୍ତିପୀଠ ପୂଜା ପାଇଁ ସଜେଇ ହେଲାଣି। ଭଦ୍ରକ କାଳୀପୂଜା ଉଭୟ ସାଂସ୍କୃତିକ ଓ ବ୍ୟବସାୟିକ ଗୁରୁତ୍ୱ ବହନ କରୁଥିବାରୁ ପ୍ରତିବର୍ଷ ଜିଲା ଓ ଜିଲା ବାହାରୁ ବହୁ ଯାତ୍ରୀ ଏଠାକୁ ଆସିଥାନ୍ତି। ଏଥର ପୂଜାରେ ଶାନ୍ତିଶୃଙ୍ଖଳା ରକ୍ଷା ସହ ପରିଚାଳନା କାର୍ଯ୍ୟ ଲାଗି ପୂଜା କମିଟି କର୍ମକର୍ତ୍ତା, ପ୍ରଶାସନ ଓ ପୋଲିସ ପକ୍ଷରୁ ବ୍ୟାପକ ପଦକ୍ଷେପ ନିଆଯାଉଛି। ଚଳିତ ବର୍ଷ ସୁରକ୍ଷା ଦୃଷ୍ଟିରୁ ବିଭିନ୍ନ ସମ୍ବେଦନଶୀଳ ସ୍ଥାନରେ ପୋଲିସ ପକ୍ଷରୁ ସିସିଟିଭି ଲଗାଯିବା ବ୍ୟବସ୍ଥା କରାଯାଇଛି। ଅଗ୍ନି ନିରାପତ୍ତା ବ୍ୟବସ୍ଥା ମଧ୍ୟ କରାଯାଉଛି ବୋଲି ଏସ୍ପି ରାଜେଶ ପଣ୍ଡିତ ସୂଚନା ଦେଇଛନ୍ତି। ଚରମ୍ପା ସମେତ ସହରର ପ୍ରମୁଖ ସ୍ଥାନରେ ଚଳିତବର୍ଷ ମୋଟ ୯ ମଣ୍ଡପରେ ମା’ଙ୍କ ମୃଣ୍ମୟୀ ମୂର୍ତ୍ତି ପୂଜା ପାଇବେ। ଏଥିଲାଗି ମଣ୍ଡପ ସମ୍ମୁଖ ତୋରଣ ସାଙ୍ଗକୁ ମା’ଙ୍କ ମୂର୍ତ୍ତି ତିଆରି କାମ ପ୍ରାୟତଃ ୬୦ ପ୍ରତିଶତ ସରିଗଲାଣି। ସବୁଠି ବାରିହୋଇପଡୁଛି ପ୍ରତିଯୋଗିତାର ଛାପ। କେଉଁଠି ଟାଇଟାନିକ୍ ଜାହାଜ ସଦୃଶ ତୋରଣ ତ ଆଉ କେଉଁଠି ସେହିଭଳି ଭିନ୍ନ ଆକର୍ଷଣର ତୋରଣ ତିଆରି ଚାଲିଛି। ମେଳାରେ ଛୋଟ ବଡ଼ ବ୍ୟବସାୟୀଙ୍କୁ ସ୍ଥାନ ଯୋଗାଇବା ଏବଂ ମୀନାବଜାର, ରାମଦୋଳି ସହ ଯାତ୍ରାପାର୍ଟି ଆଣିବା ଲାଗି କମିଟିଗୁଡ଼ିକ ଉଦ୍ୟମ କରୁଥିବା ସୂଚନା ମଳିଛି। ଆସନ୍ତା ୨୭ରେ କଳସ ଶୋଭାଯାତ୍ରା ଅନୁଷ୍ଠିତ ହେବ। ଦୀପାବଳିଠାରୁ ଏଥର ୧୦ ଦିନ ପର୍ଯ୍ୟନ୍ତ ପୂଜା ଚାଲିବା ପରେ ଆସନ୍ତା ନଭେମ୍ବର ୬ ତାରିଖରେ ଭସାଣି ହେବ। କମିଟି କର୍ମକର୍ତ୍ତା ଜିଲା ପ୍ରଶାସନଠାରୁ ଏଥିଲାଗି ଅନୁମତି ଆଣିଥିବା ଭଦ୍ରକ କାଳୀପୂଜା ମହାସଂଘ ପକ୍ଷରୁ କୁହାଯାଇଛି।
