ଢେଙ୍କାନାଳ ଅଫିସ, ୭।୧୨ – ଢେଙ୍କାନାଳସ୍ଥିତ ଭାରତୀୟ ଜନସଞ୍ଚାର ସଂସ୍ଥାନ (ଆଇଆଇଏମ୍ସି) ପରିସରରେ ଜିଲା ସ୍ବାସ୍ଥ୍ୟ ସମିତି ପକ୍ଷରୁ ଶୁକ୍ରବାର ମହାବିଦ୍ୟାଳୟସ୍ତରୀୟ ଜାତୀୟ ତମାଖୁ ବର୍ଜନ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏଥିରେ ଯୋଗଦେଇ ସିଡିଏମ୍ଓ ଡା. ନିରଞ୍ଜନ ମିଶ୍ର କହିଲେ, ତମାଖୁଠାରୁ ମାରାତ୍ମକ ଦ୍ରବ୍ୟ ଦୁନିଆରେ କିଛିନାହିଁ। ନିଜ ସ୍ବାସ୍ଥ୍ୟଗଠନ ଏବଂ ଉତ୍ତମ ଦେଶଗଠନ ଲାଗି ଏହି ନିଶା ସେବନ ଠାରୁ ସମସ୍ତେ ଦୂରେଇ ରଖିବାକୁ ଶପଥ ନେବା ଉଚିତ। ତମାଖୁ ସେବନର ବିପଜ୍ଜନକ ତଥ୍ୟ ଅବତାରଣା କରି ସିଡିଏମ୍ଓ କହିଲେ, ଭାରତ ଏବଂ ଚାଇନାରେ ସର୍ବାଧିକ ମଧ୍ୟବିତ୍ତ ଏବଂ ଗରିବ ଶ୍ରେଣୀର ଲୋକ ଏହି ନିଶା ଦ୍ୱାରା କବଳିତ। ଏଥିପାଇଁ ହଜାର ହଜାର ଜୀବନ ଅକାଳରେ ଝଡ଼ି ପଡୁଛି। ବିଭିନ୍ନ ପ୍ରକାର ତମାଖୁରେ ୪୦୦୦ରୁ ଅଧିକ ପ୍ରକାର କେମିକାଲ ରହୁଛି। ସେଥିରୁ ୧୦୦ଟି ବିଷ ଭାବେ ଚିହ୍ନଟ କରାଯାଇଛି। ତନ୍ମଧ୍ୟରୁ ୬୩ଟିରେ କ୍ୟାନସର ସୃଷ୍ଟିକାରୀ ତତ୍ତ୍ୱ ରହିଛି। ହେରୋଇନ ସେବନ, ମଦ୍ୟପାନ, ଦୁର୍ଘଟଣା, ହତ୍ୟା, ଆତ୍ମହତ୍ୟା, ଏଡ୍ସ ଜନିତ ମୃତ୍ୟୁଠାରୁ ଅଧିକ ଲୋକ ଧୂମପାନ ଯୋଗୁ ପ୍ରାଣ ହରାଉଛନ୍ତି। ବିଶ୍ୱରେ କ୍ୟାନ୍ସର ପୀଡ଼ିତଙ୍କ ମଧ୍ୟରୁ ୮୬% ଭାରତୀୟ। ଏ ଦିଗରେ ସଚେତନତା ସୃଷ୍ଟି କରିବାରେ ଗଣମାଧ୍ୟମର ଭୂମିକା ଗୁରୁତ୍ୱପୂର୍ଣ୍ଣ ବୋଲି ସିଡିଏମ୍ଓ କହିଛନ୍ତି।
ଅନ୍ୟତମ ବକ୍ତାଭାବେ ଯୋଗଦେଇ ଜିଲା ଜନସ୍ବାସ୍ଥ୍ୟ ଅଧିକାରୀ ଡା. ଜ୍ୟୋତିଷ ଚନ୍ଦ୍ର ମହାପାତ୍ର କହିଲେ, ଧୂମପାନକୁ ନିୟନ୍ତ୍ରଣ କରିବା ଏବେକାର ସମୟର ସବୁଠୁ ବଡ଼ ଆହ୍ବାନ। ସଂସ୍ଥାନର ଆଞ୍ଚଳିକ ନିର୍ଦ୍ଦେଶକ ଡ. ମୃଣାଳ ଚାଟ୍ଟାର୍ଜୀ କହିଲେ, ଧୂମପାନକୁ ଅନେକେ ସ୍ମାର୍ଟ ଜୀବନଶୈଳୀ ବୋଲି ଭାବୁଛନ୍ତି। ହେଲେ ଏହା ସ୍ମାର୍ଟ ହେବାର ଲକ୍ଷଣ ନୁହେଁ। ଧୂମପାନ କରୁଥିବା ଲୋକ ଉତ୍ତମ ବ୍ୟକ୍ତି କହିବାର ହକ୍ଦାର ନୁହେଁ। ସ୍ବାସ୍ଥ୍ୟପ୍ରତି ତମାଖୁର କୁପ୍ରଭାବ ଉପରେ ଅଧିକରୁ ଅଧିକ ସଚେତନତା ସୃଷ୍ଟି କରିବାକୁ ସେ ପରାମର୍ଶ ଦେଇଥିଲେ। ଏହି ଅବସରରେ ଏକ ପ୍ରଶ୍ନୋତ୍ତର କାର୍ଯ୍ୟକ୍ରମ କରାଯାଇ କୃତୀ ଛାତ୍ରୀଛାତ୍ରଙ୍କୁ ପୁରସ୍କୃତ କରାଯାଇଥିଲା। ଜିଲା କାର୍ଯ୍ୟକ୍ରମ ପରିଚାଳିକା ସୋନାଲି ପ୍ରିୟଦର୍ଶିନୀ ଧନ୍ୟବାଦ ଦେଇଥିଲେ।
