ଖଇରା,୭।୩(ଡି.ଏନ୍.ଏ.): ବାଲେଶ୍ବର ଜିଲା ଖଇରା ଥାନା ସାରକୋଣା ପଞ୍ଚାୟତ ସୋଜାଗଡ଼ ଗ୍ରାମରେ କରୋନା ଆତଙ୍କ ଦେଖାଦେଇଛି। ଚାଇନା ଫେରନ୍ତା ଯୁବକ ଜଗନ୍ନାଥ ଜେନାଙ୍କୁ କରୋନା ସଂକ୍ରମିତ ଥିବା ସନ୍ଦେହ କରାଯାଉଛି। ଖଇରା ମେଡିକାଲର ଏକ ଟିମ୍ ଶୁକ୍ରବାର ଜଗନ୍ନାଥଙ୍କ ଘରକୁ ଯାଇ ତାଙ୍କୁ କଟକ ବଡ଼ ଡାକ୍ତରଖାନା ଯିବାକୁ ପରାମର୍ଶ ଦେଇଛନ୍ତି। ମାତ୍ର ଜଗନ୍ନାଥ କଟକ ଯିବାକୁ ରାଜି ହେଉ ନ ଥିବା ଖଇରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଭାରପ୍ରାପ୍ତ ଚିକିତ୍ସାଧିକାରୀ ଡା. ପ୍ରଭାକର ମିଶ୍ର କହିଛନ୍ତି।
ପ୍ରକାଶ ଯେ, ଜଗନ୍ନାଥ ଗତ ୨୦ ତାରିଖରେ ଚାଇନାର ଜିଆନସିରୁ ମାଲେସିଆ, ଦିଲ୍ଲୀଦେଇ ଘରକୁ ଆସିଥିଲେ। ଉଭୟ ଏୟାରପୋର୍ଟରେ ତାଙ୍କର ସ୍କ୍ରିନିଂ ଟେଷ୍ଟରେ ନେଗେଟିଭ ବାହାରିଥିଲା। ହେଲେ ୩ ଦିନ ତଳେ ତାଙ୍କୁ ଥଣ୍ଡା ଜ୍ବର ହେବାରୁ ସେ ପ୍ରଥମେ ଖଇରା ପରେ ବାଲେଶ୍ବର ଯାଇ ସ୍ବାସ୍ଥ୍ୟ ପରୀକ୍ଷା କରାଇଥିଲେ। ସେଠାରେ ଡାକ୍ତର ତାଙ୍କୁ କଟକ ଯିବାକୁ ପରାମର୍ଶ ଦେଇଥିଲେ। ମାତ୍ର ଜଗନ୍ନାଥ କଟକ ନ ଯାଇ ଘରକୁ ଫେରି ଯାଇଥିଲେ। ଏବେ ସେ ଅସୁସ୍ଥ ଥିବାରୁ ଆଖପାଖ ଅଞ୍ଚଳରେ ଭୟ ସୃଷ୍ଟି ହୋଇଛି।
