ଅନୁଗୋଳ ଅଫିସ, ୨୯।୫- ଅନୁଗୋଳ ଜିଲା ଜରପଡ଼ା ପୋଲିସ ସୋମବାର ୨ ଅଭିଯୁକ୍ତଙ୍କୁ ଅଟୋରେ କୋର୍ଟଚାଲାଣ କରିଛି। ଜରପଡ଼ାରୁ ଅନୁଗୋଳ କୋର୍ଟର ଦୂରତା ୨୭ କିମି ହୋଇଥିଲେ ବି ମାତ୍ର ୩ କର୍ମଚାରୀ ୨ ଅଭିଯୁକ୍ତଙ୍କୁ ଅଟୋରେ ମେଡିକାଲ ଆଣିବା ଓ କୋର୍ଟରେ ହାଜର କରାଇବା ସୁରକ୍ଷା ଦୃଷ୍ଟିରୁ କେତେଦୂର ଯୁକ୍ତିଯୁକ୍ତ ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
ମିଳିଥିବା ସୂଚନା ଅନୁଯାୟୀ, ସୋମବାର ପାଟ୍ରୋଲିଂ ବେଳେ ଦୁଇ ସନ୍ଧିଗ୍ଧ ବନ୍ତଳା ଥାନା ଶଙ୍ଖପୁରର ଲିପୁ ଓରଫ ବିଶ୍ୱଜିତ ସାହୁ(୧୯) ଓ ସାନହିସଂରର ବୀରେନ୍ ଦେହୁରୀ(୨୦)ଙ୍କୁ ପୋଲିସ ଅଟକାଇଥିଲା। ସେମାନଙ୍କ ନିକଟରେ ଦୁଇଟି ଟ୍ରକ୍ ବ୍ୟାଟେରି ଥିବାରୁ ପୋଲିସର ସନ୍ଦେହ ବଢ଼ିଯାଇଥିଲା। ଥାନାକୁ ନେଇ ପଚାର ଉଚରା ପରେ ଦୁହେଁ ବ୍ୟାଟେରି ଚୋରିରେ ସମ୍ପୃକ୍ତ ଥିବା ଜଣାପଡ଼ିଥିଲା। ଏଥିସହ ୬ଟି ଟ୍ରକ୍ ବ୍ୟାଟେରି ଜବତ କରାଯାଇଥିଲା। ବିଶ୍ୱଜିତ ଅନୁଗୋଳ ଉପକଣ୍ଠରେ ଥିବା ଏକ ଗ୍ୟାରେଜରେ ମିସ୍ତ୍ରି ଭାବେ କାର୍ଯ୍ୟ କରୁଥିବା ବେଳେ ସେ ବୀରେନ ସହ ମିଶି ବ୍ୟାଟେରି ଚୋରି କରୁଥିବା ପୋଲିସକୁ କହିଥିଲେ। ପୋଲିସ ନଂ. ୧୨୭/୧୯ରେ ଏକ ମାମଲା ରୁଜୁ କରି ମଙ୍ଗଳବାର ଦୁହିଁଙ୍କୁ କୋର୍ଟଚାଲାଣ କରିଥିଲା। କିନ୍ତୁ ଥାନା ଗାଡ଼ି ବଦଳରେ ଏକ ଅଟୋରେ ୩ଜଣ କର୍ମଚାରୀ ୨ ଅଭିଯୁକ୍ତଙ୍କୁ ୨୭ କିମି ଦୂର ଆଣି ପ୍ରଥମେ ଜିଲା ମୁଖ୍ୟ ଚିକିତ୍ସାଳୟରେ ସ୍ବାସ୍ଥ୍ୟପରୀକ୍ଷା କରିଥିଲେ। ସେଠାରୁ ଅନୁଗୋଳ କୋର୍ଟକୁ ନେଇଥିଲେ। ଏ ନେଇ ଜରପଡ଼ା ଥାନା ଅଧିକାରୀ ବିନ୍ଦୁ ବାସିନୀ ବିଶ୍ୱାଳ କହିଛନ୍ତି, ଥାନାରେ ଗୋଟିଏ ଗାଡ଼ି ରହିଛି। ଏକ ଗୁରୁତ୍ୱପୂର୍ଣ୍ଣ ମାମଲାରେ ପୂର୍ବରୁ ଜଣେ ଅଭିଯୁକ୍ତଙ୍କୁ ସେଥିରେ ମେଡିକାଲକୁ ନିଆଯାଇଥିଲା। ପିସିଆର ଭ୍ୟାନ ପାଟ୍ରୋଲିଂ କରୁଥିବାରୁ ବାଧ୍ୟ ହୋଇ ଅଟୋରେ ଦୁଇ ଅଭିଯୁକ୍ତଙ୍କୁ ଡାକ୍ତରୀ ପରୀକ୍ଷା ପରେ କୋର୍ଟରେ ହାଜର ପାଇଁ ନିଆଯାଇଥିଲା।
