କେନ୍ଦୁଝର, ୨୧।୫(ସ୍ବ.ପ୍ର.)-କେନ୍ଦୁଝର ଜିଲାରେ କରୋନା ସ୍ଥିତ ଅନ୍ୟ ଜିଲା ଅପେକ୍ଷା ନିୟନ୍ତ୍ରଣରେ ରହିଛି। ଅଦ୍ୟାବଧି ୧୯ ତାରିଖ ସୁଦ୍ଧା ଜିଲାରୁ ୨୮୮୦ ଜଣଙ୍କ ସ୍ବାବ ଟେଷ୍ଟ କରାଯାଇଛି। ସେଥିରୁ ୨୮୭୨ ଜଣଙ୍କ ନେଗେଟିଭ ବାହାରିଛି। ୮ଜଣଙ୍କ କରୋନା ପଜିଟିଭ ବାହାରିଥିଲେ ହେଁ ତନ୍ମଧ୍ୟରୁ ୨ ଜଣ ଚିକିତ୍ସିତ ହୋଇ ଘରକୁ ଫେରିଥିବା ଜଣାପଡିଛି। ଅନ୍ୟ ୬ ଜଣ ଚିକିତ୍ସାଧୀନ ଅଛନ୍ତି। ବାହାର ରାଜ୍ୟରୁ ଫେରୁଥିବା ଶ୍ରମିକ ବା ପ୍ରବାସୀ ଓଡ଼ିଆଙ୍କୁ କ୍ୱାରାଣ୍ଟାଇନ୍ ବ୍ୟବସ୍ଥା କରାଯାଇଛି। ବାହାର ରାଜ୍ୟର ଲୋକଙ୍କୁ ନିଜ ନିଜ ଘରକୁ ସୁରକ୍ଷିତ ପଠାଇବା ପାଇଁ ପ୍ରଶାସନ ପକ୍ଷରୁ ବ୍ୟବସ୍ଥା କରାଯାଉଛି। ଜିଲାରେ କରୋନା ପାଇଁ କଟକଣା ଜାରି ରହିଥିଲେ ହେଁ ବହୁ ମାତ୍ରାରେ କୋହଳ କରାଯାଇଛି। ଫଳରେ ଜିଲାରେ ସ୍ବାଭାବିକ ଅବସ୍ଥା ଫେରୁଛି।
