ବନ୍ତଳା, ୬।୧(ଡି.ଏନ.ଏ.) ଅସହାୟ ଅବସ୍ଥାରେ ଭୋକ ଉପାସରେ ପଡ଼ି ରହି ଜୀବନମରଣ ସହ ସଂଘର୍ଷ କରୁଥିବା ଅସହାୟା ପାତି ନାଏକ (୭୦) ଏବଂ ତାଙ୍କ ପୁଅ ପ୍ରମୋଦ (୫୦)ଙ୍କୁ ସହାୟ ହୋଇଛି ସାଥୀ ପରିବାର। ଏ ନେଇ ରବିବାର ‘ଧରିତ୍ରୀ’ରେ ଖବର ପ୍ରକାଶ ପାଇବା ପରେ ଅନୁଷ୍ଠାନର ସଭାପତି ସିଦ୍ଧାର୍ଥ ପ୍ରଧାନ, ଦିଲୀପ ସାହୁ, ସୁବ୍ରତ ପ୍ରଧାନ, ସନ୍ଦୀପ ସାହୁ, ଅମରେନ୍ଦ୍ର ପ୍ରଧାନ ପ୍ରମୁଖ ସକାଳେ ମାଧପୁର ଗ୍ରାମକୁ ଯାଇ ୧୦୮ ଆମ୍ବୁଲାନ୍ସରେ ଡାକ୍ତରଖାନା ପଠାଇବା ବ୍ୟବସ୍ଥା କରିଥିଲେ। ଏହି ସମୟରେ ମାନସିକ ଭାରସାମ୍ୟ ହରାଇ ବସିଥିବା ପ୍ରମୋଦ ମା’ ମା’ କହି କାନ୍ଦି ପକାଇଥିଲେ। ଘଟଣା ସ୍ଥଳରେ ଉପସ୍ଥିତ ମଞ୍ଜୁ ସେଠୀ, ଅବୃତ୍ତି ଦେହୁରୀ, ଅଛୁ ପ୍ରଧାନ, ସଞ୍ଜୁ ସେଠୀ, ଅପୂର୍ବ ଦେହୁରୀ, ବାଲାବତୀ ମାଝି, ସସ୍ମିତା ସେଠୀ, କେତକୀ ସେଠୀ, ବିମଳା ନାଏକ ପ୍ରମୁଖ ପ୍ରମୋଦଙ୍କୁ ମଧ୍ୟ ନେଇଯିବାକୁ ନିବେଦନ କରିଥିଲେ। ଏପରି ନ କଲେ ସେ ମା’ଙ୍କୁ ଝୁରି ଝୁରି ମରିଯିବେ ବୋଲି କହିଥିଲେ। ଗ୍ରାମବାସୀଙ୍କ କଥାକୁ ଗୁରୁତ୍ୱ ଦେଇ ଅନୁଷ୍ଠାନର ସଦସ୍ୟମାନେ ଉଭୟଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛନ୍ତି। ଅନୁଷ୍ଠାନର ଏପରି କାର୍ଯ୍ୟକୁ ଅଞ୍ଚଳବାସୀ ପ୍ରଶଂସା କରିଛନ୍ତି।
ସୂଚନାଯୋଗ୍ୟ, ଅନୁଗୋଳ ଜିଲା ବନ୍ତଳା ଥାନା ନନ୍ଦପୁର ପଞ୍ଚାୟତ ମାଧପୁର ଗ୍ରାମର ପାତି ନାଏକ ଓ ତାଙ୍କ ପୁଅ ପ୍ରମୋଦ ଅସହାୟ ଅବସ୍ଥାରେ ଭୋକ ଉପାସରେ ପଡ଼ି ରହିଥିଲେ। ଉଭୟଙ୍କୁ ସରକାରୀ ସହାୟତା, ଚିକିତ୍ସା ସୁବିଧା ଯୋଗାଇ ଦେବାକୁ ଦାବି ହୋଇଛି।
