ରାତିଅଧିଆ ପ୍ରେମ ବେଳେ ନିସ୍ତୁକ ମାଡ଼: ପ୍ରେମିକ ଗୁରୁତର, ୨ ଗିରଫ
7:33 amJune 19, 2019June 9, 2020 / 21

ଛେଣ୍ଡିପଦା,୧୯।୬(ସ୍ବ.ପ୍ର.) – ପ୍ରେମିକଙ୍କୁ ମହଙ୍ଗା ପଡ଼ିଛି ରାତିଅଧିଆ ପ୍ରେମ। ପ୍ରେମିକାଙ୍କ ବାପା ଓ ଅଜାଙ୍କ ମାଡ଼ରେ ଗୁରୁତର ହୋଇଛନ୍ତି ଜଣେ ପ୍ରେମିକ। ଖବରପାଇ ପୋଲିସ ତାଙ୍କୁ ଉଦ୍ଧାର କରି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛି। ଏଥିସହ ପ୍ରେମିକଙ୍କ ବାପାଙ୍କ ଅଭିଯୋଗ ଆଧାରରେ ଏକ ମାମଲା ରୁଜୁ କରି ପ୍ରେମିକାଙ୍କ ବାପା ଓ ଅଜାଙ୍କୁ ଗିରଫ ପରେ କୋର୍ଟଚାଲାଣ କରିଛି।
ଘଟଣା ଘଟିଛି ଅନୁଗୋଳ ଜିଲା ନିଶା ଶିଳ୍ପାଞ୍ଚଳ ଥାନା ଅଞ୍ଚଳରେ। ପୋଲିସର କହିବା ଅନୁଯାୟୀ, ଥାନା ଅଞ୍ଚଳର ଜନୈକା ଯୁବତୀ ଓ ଯୁବକଙ୍କ ମଧ୍ୟରେ ଦୀର୍ଘଦିନରୁ ପ୍ରେମ ସମ୍ପର୍କ ଥିଲା। ସୋମବାର ରାତି ୧୧ ଟାରେ ପ୍ରେମିକ ଜଣକ ପ୍ରେମିକାଙ୍କ ଘର ନିକଟକୁ ଯାଇ ତାଙ୍କୁ ବାହାରକୁ ଡକାଇଥିଲେ। ଏକ ଗଛମୂଳେ ଦୁହେଁ କଥାବାର୍ତ୍ତା ହେଉଥିବାବେଳେ ପ୍ରେମିକାଙ୍କ ପରିବାର ଲୋକେ ଦେଖିବା ସହ ପ୍ରେମିକଙ୍କୁ କାବୁ କରି ନିସ୍ତୁକ ମାଡ ମାରିଥିଲେ। ଖବରପାଇ ପୋଲିସ ଘଟଣାସ୍ଥଳରୁ ପ୍ରେମିକକୁ ଉଦ୍ଧାର କରିଥିଲା। ଏ ନେଇ ପ୍ରେମିକଙ୍କ ବାପା ନିଶା ଶିଳ୍ପାଞ୍ଚଳ ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ନଂ. ୧୧୦/୧୯ରେ ଏକ ମାମଲା ରୁଜୁ କରି ପ୍ରେମିକାଙ୍କ ବାପା ଓ ଅଜାଙ୍କୁ ଗିରଫ କରି କୋର୍ଟଚାଲାଣ କରିଛି।