ପୁରୀ ଅଫିସ, ୫ା୨: ପୁଣି ଚର୍ଚ୍ଚାରେ ସବୁଠାରୁ ବିତ୍ତଶାଳୀ ମଠ ପୁରୀର ଏମାର ମଠ। ପ୍ରାୟ ୫ମାସର ବ୍ୟବଧାନ ପରେ ପୁନର୍ବାର ଶୁକ୍ରବାର ପ୍ରଶାସନ ପକ୍ଷରୁ ଏମାର ମଠ ଯାଞ୍ଚ କରାଯାଇଛି। ଏହି ମଠରେ ପୂର୍ବରୁ ରୁପାଇଟା ମିଳିଥିବାରୁ ଦ୍ୱିତୀୟ ଥର ମଧ୍ୟ କୌଣସି ଗୁପ୍ତଧନ ମିଳିବା ଆଶାରେ କେତେକ ସ୍ଥାନ ଖନନ କରାଯାଇଥିଲା। ତେବେ ଗୋଟିଏ କ୍ଷୁଦ୍ର ଲୁହାଖଣ୍ଡ ବ୍ୟତୀତ ଅନ୍ୟ କୌଣସି ଦ୍ରବ୍ୟ ମିଳିନାହିଁ। ଫଳରେ ଗୁପ୍ତଧନ ମିଳିବା ଆଶା ମଉଳି ଯାଇଛି।
ସୂଚନାଯୋଗ୍ୟ, ୨୦୧୧ରେ ପର୍ଯ୍ୟାୟକ୍ରମେ ଏମାର ମଠର ଏକ ଗୁପ୍ତ କୋଠରିରୁ ରୁପାଇଟା ମିଳିଥିଲା। ପ୍ରଶାସନ ପ୍ରଥମେ ୫୨୨ ଓ ପରେ ୪୫ ଖଣ୍ଡ ରୁପା ଇଟା ଜବତ କରିଥିଲା। ୨୦୨୧ରେ ଏମାର ମଠର ପରିଚାଳନା ଦାୟିତ୍ୱ ମଠ ମହନ୍ତଙ୍କ ହାତରୁ କାଢ଼ି ନିଆଯାଇ ଦେବୋତ୍ତର ବିଭାଗ ପକ୍ଷରୁ ନବଗଠିତ ଟ୍ରଷ୍ଟ ବୋର୍ଡକୁ ଦିଆଯାଇଥିଲା। ମଠ ପରିସର ମାଟିତଳେ ଆହୁରି ରୁପାଇଟା, ସୁନା, ହୀରା ପ୍ରଭୃତି ଅନେକ ଗୁପ୍ତଧନ ପୋତା ହୋଇରହିଥିବା ଟ୍ରଷ୍ଟବୋର୍ଡ ସନ୍ଦେହ ପ୍ରକଟ କରି ୨୦୨୧ ଅଗଷ୍ଟରେ ଦେବୋତ୍ତର ବିଭାଗକୁ ଚିଠି ଲେଖିଥିଲା। ପ୍ରଶାସନ ପକ୍ଷରୁ ଗତ ସେପ୍ଟେମ୍ବର ୧୬ରେ ମେଟାଲ ଡିଟେକ୍ଟର ସାହାଯ୍ୟରେ ଏହି ମଠର ମହନ୍ତଙ୍କ ମୁଖ୍ୟଘର, ପ୍ରବେଶ ପଥ, ଅଗଣା, ପଙ୍ଗତ ବାରଣ୍ଡା କାନ୍ଥ, ଚଟାଣ ପ୍ରଭୃତି ବିଭିନ୍ନ ସ୍ଥାନକୁ ଟିକିନିଖି ଯାଞ୍ଚ କରାଯାଇଥିଲା। ସେତେବେଳେ ୩ଟି ସ୍ଥାନରେ କିଛି ପଦାର୍ଥ ଥିବା ସନ୍ଦେହରେ ବୃତ୍ତ ଚିହ୍ନ ଦିଆଯାଇ ଖୋଳାଯିବା ପାଇଁ ନିଷ୍ପତ୍ତି ନିଆଯାଇଥିଲା। କିନ୍ତୁ ମେଟାଲ ଡିଟେକ୍ଟର ଦେଢ଼ଫୁଟ ପର୍ଯ୍ୟନ୍ତ ଚିହ୍ନଟ କରିପାରୁଥିବାରୁ ଟ୍ରଷ୍ଟବୋର୍ଡ଼ ପକ୍ଷରୁ ଅସନ୍ତୋଷ ପ୍ରକାଶ ପାଇଥିଲା। ଚାରିଫୁଟ ପର୍ଯ୍ୟନ୍ତ ଚିହ୍ନଟ କରାଗଲା ଭଳି ଡିଟେକ୍ଟର ବ୍ୟବହାର କରାଯିବାକୁ ଦାବି ହୋଇଥିଲା। ଶୁକ୍ରବାର ଖନନ ପରେ ଲୁହାକଣ୍ଟା ଓ ଲୁହାଖଣ୍ଡ ଛଡ଼ା କିଛି ମିଳିନାହିଁ। ତେଣୁ ଉଚ୍ଚକ୍ଷମତା ସମ୍ପନ୍ନ ମେଟାଲ ଡିଟେକ୍ଟରରେ ଯାଞ୍ଚ କରିବା ପାଇଁ ଆଗାମୀ ବୈଠକରେ ଟ୍ରଷ୍ଟ ବୋର୍ଡ ପକ୍ଷରୁ ଦାବି କରାଯିିବ ବୋଲି ସଭାପତି ତଥା ଉତ୍ତର ପାଶର୍ବ ମଠ ମହନ୍ତ ନାରାୟଣ ରାମାନୁଜ ଦାସ କହିଛନ୍ତି। ସେହିପରି ଏମାର ମଠର ଐତିହ୍ୟ ଓ ସୌନ୍ଦର୍ଯ୍ୟକରଣ ନେଇ ମଧ୍ୟ ବୈଠକରେ ଆଲୋଚନା ହେବ ବୋଲି ସେ କହିଛନ୍ତି। ଅନ୍ୟପକ୍ଷରେ ଖନନ କାର୍ଯ୍ୟ ସମ୍ପନ୍ନ ହୋଇଥିବା ଉପଜ଼ିଲାପାଳ ଭବତାରଣ ସାହୁ କହିଛନ୍ତି। ତେବେ ଏହି ମଠ ସର୍ବପୁରାତନ ତଥା ଜଗନ୍ନାଥ ସଂସ୍କୃତି ସହ ଅଙ୍ଗାଙ୍ଗୀ ଭାବେ ଜଡ଼ିତ ଥିବାରୁ ଏହାର ଉନ୍ନତୀକରଣ କାର୍ଯ୍ୟ କରାଯିବ। ସେହିପରି ମଠ କୋଠା ବିପଦସଙ୍କୁଳ ଅବସ୍ଥାରେ ଥିବାରୁ ପୁନରୁଦ୍ଧାର ଲାଗି ପଦକ୍ଷେପ ନିଆଯିବ ବୋଲି ଉପଜିଲାପାଳ ସୂଚନା ଦେଇଛନ୍ତି।
