ବର୍ଜ୍ୟବସ୍ତୁର ପୁନଃବିନିଯୋଗ କରି ପରିବେଶ ପ୍ରଦୂଷଣ କମାଇବାରେ ଅଙ୍କିତ ରାୟଙ୍କ ଚିନ୍ତାଧାରା ଏକ ନୂଆ ଦିଗ ଦେଖାଇଛି। ରୋଷେଇଘରୁ ବାହାରୁଥିବା ବର୍ଜ୍ୟରୁ ବାୟୋଗ୍ୟାସ ପାଇବା ପାଇଁ ସେ ‘ଶକ୍ତିଷ୍ଟିଲର’ ଷ୍ଟାର୍ଟଅପ ମାଧ୍ୟମରେ ବାୟୋଗ୍ୟାସ ଡାଇଜେଷ୍ଟର ନିର୍ମାଣ କରୁଛନ୍ତି। ଏହାଦ୍ୱାରା ଏଲ୍ପିିଜି ଗ୍ୟାସ ଖର୍ଚ୍ଚ ୬୦ ପ୍ରତିଶତ ପର୍ଯ୍ୟନ୍ତ କମିଯାଉଛି। ଅଙ୍କିତ ନ୍ୟାଶ୍ନାଲ ଇନ୍ଷ୍ଟିଚ୍ୟୁଟ ଅଫ୍ ଟେକ୍ନୋଲୋଜି (ଏନ୍ଆଇଟି)ରୁ ୨୦୧୨ରେ ଶିକ୍ଷା ଶେଷ କରିବା ପରେ ମୁମ୍ବାଇର ଏକ ପାଓ୍ବାର ସେକ୍ଟରରେ କାମ କରିବାବେଳେ ତାଙ୍କ ମୁଣ୍ଡକୁ ଏଭଳି ଚିନ୍ତାଧାରା ଢୁକିଥିଲା। ପରେ ସେ ଚାକିରି ଛାଡି ଭୋପାଳ ଫେରିଆସି ପ୍ରଥମେ ତାଙ୍କ ଘରେ ସୋଲାର ପ୍ୟାନେଲ ବସାଇ ବିଦ୍ୟୁତ୍ ଉପତ୍ାଦନ କରିଥିଲେ। ଏହି ସିଷ୍ଟମ୍କୁ ରାଜ୍ୟର ବିଭିନ୍ନ ଅଞ୍ଚଳରେ ଲଗାଇବା ପାଇଁ ସେ ମଧ୍ୟପ୍ରଦେଶ ସରକାରଙ୍କୁ ପତ୍ର ଲେଖି ନୂଆ ନିୟମ ଆଣିବାରେ ସକ୍ଷମ ହୋଇପାରିଥିଲେ। ପରେ ୨୦୧୭ରେ ଶକ୍ତିଷ୍ଟିଲର ଷ୍ଟାର୍ଟଅପ୍ ଆରମ୍ଭ କରି ବାୟୋଗ୍ୟାସ ଡାଇଜେଷ୍ଟର ନିର୍ମାଣ ଉପରେ ଗୁରୁତ୍ୱ ଦେଉଛନ୍ତି। ଏହାସହ ସେ ସୋଲାର ଇନ୍ଷ୍ଟାଲେଶନ, ଇ-ଭେହିକିଲ କନଭର୍ସନ ଏବଂ ରେନ୍ଓ୍ବାଟର ହାର୍ଭେଷ୍ଟିଙ୍ଗ ସିଷ୍ଟମ୍ ବି ନିର୍ମାଣ କରୁଛନ୍ତି। ବାୟୋଗ୍ୟାସ୍ ଡାଇଜେଷ୍ଟର୍କୁ ୧.୨ ବର୍ଗମିଟର ଜାଗାରେ କରାଯାଇପାରୁଥିବାରୁ ଏହାକୁ ଯେକୌଣସି ଜାଗାରେ ବସାଯାଇପାରୁଛି। ୩ ଲିଟର ଓ ୫ ଲିଟର କ୍ଷମତା ବିଶିଷ୍ଟ ଟାଙ୍କି ନିର୍ମାଣ କରାଯାଉଛି ଓ ଏଥିପାଇଁ ବେଶି ଖର୍ଚ୍ଚ ପଡୁନିି। ବର୍ଜ୍ୟବସ୍ତୁ ୧୦ରୁ ୧୫ ଦିନ ମଧ୍ୟରେ ଶଢିଗଲେ ସେଥିରୁ ଜାଳେଣି ଗ୍ୟାସ ନିର୍ଗତ ହେଉଛି।
