ନୂଆଦିଲ୍ଲୀ, ୪।୬: ଜଙ୍ଗଲର ରାଜା ବାଘର ସୁରକ୍ଷା ନେଇ ଏବେ ପ୍ରଶ୍ନ ଉଠିଛି। ନିଜ ଜଙ୍ଗଲରେ ମଧ୍ୟ ବାଘ ସୁରକ୍ଷିତ ନୁହଁନ୍ତି। ଗତ ୮ ବର୍ଷ ମଧ୍ୟରେ ଦେଶରେ ୭୫୦ ବାଘଙ୍କ ଜୀବନ ଯାଇଥିବା ସରକାରୀ ରିପୋର୍ଟରେ ଦର୍ଶାଯାଇଛି। ଜାତୀୟ ବାଘ ସଂରକ୍ଷଣ କର୍ତ୍ତୃପକ୍ଷ(ଏନ୍ଟିସିଏ)ଙ୍କଠାରୁ ୨୦୧୦ଠାରୁ ୨୦୨୦ ପର୍ଯ୍ୟନ୍ତ ଦେଶରେ ବାଘଙ୍କ ସ୍ଥିତି ସମ୍ପର୍କରେ ରିପୋର୍ଟ ସୂଚନା ଅଧିକାର ଆଇନ ଅନୁସାରେ ଲୋଡ଼ା ଯାଇଥିଲା। ତେବେ ଏନ୍ଟିସିଏ ପକ୍ଷରୁ ୨୦୧୨ଠାରୁ ୨୦୧୯ ପର୍ଯ୍ୟନ୍ତ ରିପୋର୍ଟ ଉପଲବ୍ଧ ଥିବା ଦର୍ଶାଯାଇଥିଲା। ମୃତ୍ୟୁ ଘଟିଥିବା ବାଘଙ୍କ ମଧ୍ୟରୁ ୩୬୯ଙ୍କ ଅଙ୍ଗପ୍ରତ୍ୟଙ୍ଗ ପାଇଁ ହତ୍ୟା କରାଯାଇଛି। ଜୀବନ ପ୍ରାକୃତିକ କାରଣ ଯୋଗୁ ଯାଇଥିବାବେଳେ ୧୬୮ ବାଘଙ୍କୁ ଅଙ୍ଗପ୍ରତ୍ୟଙ୍ଗ ପାଇଁ ହତ୍ୟା କରାଯାଇଛି। ସେହିପରି ୭୦ ବାଘଙ୍କ ମୃତ୍ୟୁର ତଦନ୍ତ ଜାରି ରହିଛି। ଅପରପକ୍ଷରେ ୪୨ ବାଘଙ୍କ ମୃତ୍ୟୁ ପରସ୍ପର ମଧ୍ୟରେ ଲଢ଼େଇ ଅବା ଦୁର୍ଘଟଣା ଯୋଗୁ ଘଟିଥିବା ଏହି ରିପୋର୍ଟରେ ଦର୍ଶାଯାଇଛି। ମଧ୍ୟପ୍ରଦେଶରେ ସର୍ବାଧିକ ୧୭୩ ବାଘଙ୍କ ମୃତ୍ୟୁ ଘଟିଥିବାବେଳେ ମହାରାଷ୍ଟ୍ରରେ ୧୨୫ ବାଘଙ୍କ ମୃତ୍ୟୁ ଘଟିଛି। ମଧ୍ୟପ୍ରଦେଶରେ ୯୪ ବାଘଙ୍କର ପ୍ରାକୃତିକ ଭାବେ ମୃତ୍ୟୁ ଘଟିଥିବାବେଳେ ଅଙ୍ଗପ୍ରତ୍ୟଙ୍ଗ ପାଇଁ ୩୮ ବାଘଙ୍କୁ ହତ୍ୟା କରାଯାଇଥିବା ଏଥିରେ ଉଲ୍ଲେଖ ରହିଛି। ସେହିପରି କର୍ନାଟକରେ ୧୧୧, ଉତ୍ତରାଖଣ୍ଡରେ ୮୮, ତାମିଲନାଡୁରେ ୫୪, ଆସାମରେ ୫୪, କେରଳରେ ୩୫, ଉତ୍ତରପ୍ରଦେଶରେ ୩୫, ରାଜସ୍ଥାନରେ ୧୭, ବିହାରରେ ୧୧, ପଶ୍ଚିମବଙ୍ଗରେ ୧୧ ଏବଂ ଛତିଶଗଡ଼ରେ ୧୦ ବାଘଙ୍କ ମୃତ୍ୟୁ ଘଟିଥିବା ରିପୋର୍ଟରେ ପ୍ରକାଶ ପାଇଛି। ସୂଚନାଯୋଗ୍ୟ, ଡିସେମ୍ବରରେ କେନ୍ଦ୍ର ସରକାରଙ୍କ ପକ୍ଷରୁ କୁହାଯାଇଥିଲା ଯେ, ଗତ ୪ ବର୍ଷ ମଧ୍ୟରେ ଦେଶରେ ବାଘ ସଂଖ୍ୟା ୭୫୦ ବୃଦ୍ଧି ପାଇ ୨,୨୨୬ରୁ ୨,୯୭୬ରେ ପହଞ୍ଚିଛି।
