ନୂଆଦିଲ୍ଲୀ,୪ା୫(ପି.ଟି.): ଲକ୍ଡାଉନ ଯୋଗୁ ବିଭିନ୍ନ ରାଜ୍ୟରେ ଅଟକିଥିବା ଶ୍ରମିକମାନଙ୍କୁ ସେମାନଙ୍କ ରାଜ୍ୟରେ ପହଞ୍ଚାଇବା ପାଇଁ ରେଲଓ୍ବେ ପକ୍ଷରୁ ଶ୍ରମିକ ସ୍ପେଶିଆଲ୍ ଟ୍ରେନ୍ ଚଳାଚଳ କରୁଛି। ଏହି ଟ୍ରେନ୍ ଯାତ୍ରୀ ପରିବହନ ସାମର୍ଥ୍ୟର ୯୦ ପ୍ରତିଶତ ଶ୍ରମିକଙ୍କୁ ନେବା ଲାଗି ରେଲଓ୍ବେ ପକ୍ଷରୁ ଗାଇଡ୍ଲାଇନ ଜାରି କରାଯାଇଛି। ସ୍ଥାନୀୟ ରାଜ୍ୟ ସରକାର ଯାତ୍ରୀମାନଙ୍କୁ ଟିକେଟ ଦେବେ ଓ ସେ ବାବଦ ଭଡ଼ା ସେମାନଙ୍କଠାରୁ ଆଦାୟ କରି ରେଳ ବିଭାଗକୁ ପ୍ରଦାନ କରିବେ। ଯେଉଁ ରାଜ୍ୟର ଶ୍ରମିକ ଟ୍ରେନ ଛାଡ଼ିବ ସେହି ରାଜ୍ୟ ସରକାର ଯାତ୍ରୀମାନଙ୍କ ପାଇଁ ପର୍ଯ୍ୟାପ୍ତ ସୁରକ୍ଷା ବନ୍ଦୋବସ୍ତ କରିବେ। ଏହି ଟ୍ରେନ୍ ଗନ୍ତବ୍ୟ ସ୍ଥଳ ବ୍ୟତୀତ ଅନ୍ୟ କୌଣସି ଷ୍ଟେଶନରେ ଅଟକିବ ନାହିଁ। ଟ୍ରେନ୍ ଭିତରେ ସାମାଜିକ ଦୂରତ୍ୱ ରକ୍ଷା କରିବାକୁ କୁହାଯାଇଛି। ଏତଦ୍ବ୍ୟତୀତ ଟ୍ରେନ୍ରେ ଯାତ୍ରୀ ସଂଖ୍ୟା ୯୦ ପ୍ରତିଶତରୁ କମ୍ ହେବା ଉଚିତ ନୁହେଁ। ଏଥିପାଇଁ ସମ୍ପୃକ୍ତ ରାଜ୍ୟ ଯୋଜନା ପ୍ରସ୍ତୁତ କରିବାକୁ ମାର୍ଗଦର୍ଶିକାରେ କୁହାଯାଇଛି। ସେହିପରି ଟ୍ରେନ୍ ଛାଡ଼ିବାକୁ ଥିବା ଷ୍ଟେଶନରେ ହିଁ ରାଜ୍ୟ ସରକାର ଶ୍ରମିକମାନଙ୍କ ପାଇଁ ଖାଦ୍ୟ ପ୍ୟାକେଟ ଓ ପାନୀୟ ଜଳ ଯୋଗାଇଦେବେ। ଯାତ୍ରୀମାନଙ୍କ ପାଇଁ ଫେସ୍ ମାସ୍କ ବାଧ୍ୟତାମୂଳକ। ଏଥିସହିତ ସମସ୍ତ ଯାତ୍ରୀଙ୍କୁ ଆରୋଗ୍ୟ ସେତୁ ଆପ୍ ଡାଉନ୍ଲୋଡ୍ କରି ବ୍ୟବହାର କରିବା ନିମନ୍ତେ ରାଜ୍ୟ ସରକାର ପ୍ରୋତ୍ସାହିତ କରିବେ। ୧୨ ଘଣ୍ଟାରୁ ଅଧିକ ଟ୍ରେନ ଯାତ୍ରା ପାଇଁ ରେଲଓ୍ବେ ପକ୍ଷରୁ ଗୋଟିଏ ମିଲ୍ ଯୋଗାଇ ଦିଆଯିବ। ଗନ୍ତବ୍ୟ ସ୍ଥଳରେ ଯାତ୍ରୀମାନେ ପହଞ୍ଚତ୍ବା ପରେ ସମ୍ପୃକ୍ତ ରାଜ୍ୟ କର୍ତ୍ତୃପକ୍ଷ ସେମାନଙ୍କୁ ଗ୍ରହଣ କରିବେ। ସେମାନଙ୍କ ସ୍କ୍ରିନିଂ, କ୍ୱାରାଣ୍ଟାଇନ ଓ ଷ୍ଟେଶନଠାରୁ ଅନ୍ୟ ସ୍ଥାନକୁ ନେବା ଓ ସୁରକ୍ଷା ବ୍ୟବସ୍ଥା ସେହି ରାଜ୍ୟ ସରକାର କରିବେ। ସୁରକ୍ଷା ଓ ସ୍ବଚ୍ଛତା ନିୟମର ଉଲ୍ଲଂଘନ ହେଲେ ରେଲଓ୍ବେ କର୍ତ୍ତୃପକ୍ଷ ଶ୍ରମିକ ସ୍ପେଶିଆଲ ଟ୍ରେନ୍ ଚଳାଚଳକୁ ବନ୍ଦ କରିଦେଇପାରିବେ।
