ଯୋଡ଼ା, ୨୪।୯ (ଡି.ଏନ୍.ଏ.): କେନ୍ଦୁଝର ଜିଲା ଯୋଡାସ୍ଥିତ ଟାଟା ଷ୍ଟିଲ ଡାକ୍ତରଖାନାରେ ଚିକିତ୍ସା ଅବହେଳାରୁ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଥିବା ଅଭିଯୋଗ ହୋଇଛି। ସେ ହେଲେ ଲୋକନାଥ ପ୍ରଧାନ(୪୭)।
ମିଳିଥିବା ସୂଚନାନୁଯାୟୀ, ଲୋକନାଥ ଏସ୍ଏନ୍ ସିଂ ନାମକ ଏକ ଠିକା ସଂସ୍ଥାରେ କାମ କରନ୍ତି। ପୂର୍ବାହ୍ନରେ ସେ ଅସୁସ୍ଥ ହୋଇପଡ଼ିଥିଲେ। ତୁରନ୍ତ ତାଙ୍କୁ ଟାଟାର ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରେ ତାଙ୍କର ଚିକିତ୍ସା କରାଯାଇଥିଲେ ସୁଦ୍ଧା ଅପରାହ୍ନରେ ତାଙ୍କର ମୃତ୍ୟୁ ଘଟିଥିଲା। ତେବେ ଲୋକନାଥଙ୍କ ସହିତ ଥିବା ମାନସ ରଞ୍ଜନ ସାହୁ ଚିକିତ୍ସାରେ ବିଳମ୍ବ ଯୋଗୁ ତାଙ୍କର ମୃତ୍ୟୁ ଘଟିଥିବା ଅଭିଯୋଗ କରିଛନ୍ତି। ତାଙ୍କ କହିବା ମୁତାବକ, ଲୋକନାଥଙ୍କୁ ପ୍ରଥମେ ଭୁବନେଶ୍ୱର ନେଇଯିବା ପାଇଁ କୁହାଯାଇଥିଲା। ହେଲେ ଟାଟା ଷ୍ଟିଲର ଡାକ୍ତର ତାଙ୍କୁ ଜାମସେଦପୁରସ୍ଥିତ ଟିଏମ୍ଏଚ୍କୁ ନେବାକୁ କହିଥିଲେ। ଏଥିରେ ବିଳମ୍ବ ହୋଇଯାଇଥିଲା। ଏଣୁ ତାଙ୍କର ମୃତ୍ୟୁ ଘଟିଥିବା ସେ କହିଛନ୍ତି।
ଅପରପକ୍ଷେ ଡାକ୍ତର ବସନ୍ତ କୁମାର ପାଳ ପ୍ରତିକ୍ରିୟା ଦେଇ କହିଛନ୍ତି ଯେ, ମୃତ ଲୋକନାଥଙ୍କର ଡାଇବେଟିସ୍ ଓ ବ୍ଲଡ୍ ପ୍ରେସର ଥିଲା। ଏହା ହୃଦଘାତ ଜନିତ ମୃତ୍ୟୁ। ଜୀବନ ବଞ୍ଚାଇବା ପାଇଁ ଚେଷ୍ଟା କରାଯାଇଥିଲେ ହେଁ, ତାଙ୍କର ଡାକ୍ତରଖାନାରେ ପୁଣି ଥରେ ହୃଦଘାତ ହୋଇଯାଇଥିଲା । ଫଳରେ ତାଙ୍କର ମତ୍ୟୁ ଘଟିଥିଲା। ତାଙ୍କର ଚିକିତ୍ସା ବେଳେ ହିଁ ତାଙ୍କୁ ଅନ୍ୟତ୍ର ସ୍ଥାନାନ୍ତର କରିବା ପାଇଁ ରେଫରାଲ ଚିଠି ମଧ୍ୟ କରାଯାଇଥିଲା। ଏଣୁ ଚିକିତ୍ସାରେ କୌଣସି ବିଳମ୍ବ ହୋଇନହାହିଁ । ଘଟଣାସ୍ଥଳରେ ଯୋଡା ପୋଲିସ ପହଞ୍ଚି ତଦନ୍ତ କରୁଛି ।
