ପର୍ଲା, ୧୨ା୨(ଡି.ଏନ୍.ଏ.)- କଳାହାଣ୍ଡି ଜିଲା କୋକସରା ବ୍ଲକ ଦଣ୍ଡପାଟ ଅଂଚଲ ପୋଡ଼ାଗୁଡ଼ା ପଁଚେତ୍ ମଙ୍ଗଳପୁର ଗଁାର ହୀରାଧର ନାଏକକଁର ମାଏକିନା ରତନୀ ନାଏକ(୫୫)। ସେ ଅନେକ ଦିନ୍ ହେଲା କର୍କଟ ରୋଗ୍ରେ ପିଡ଼ିତ୍ ଅଛନ୍। ପରିବାର ଲୋକ୍ ଧାରଉଧାର କରି କଟକ ବଡ଼ ଡାକ୍ତରଖାନା ନେଇଥିଲେ। ହେଲେ ଟଁକା ପଏସା ଅଭାବୁ ତାହାକୁ ଘରକେ ଫିରେଇ ଆନ୍ଲେ। ସେଦିନ୍ଠାନୁ ରତନି ଚିକିଛା ଅଭାବୁ ଭଗବାନ ଭରସାରେ ଘରେ ପଡ଼ି ରହିଛନ୍।
ସୂଚନା ଅନ୍ସାରେ ମଙ୍ଗଳପୁର ଗଁାର ହୀରାଧର ନାଏକ(୫୮)। ପରିବାର କହେଲେ ରତନୀ ନାଏକ(୫୫), ଦୁଇ ପୁଓ ଶଙ୍କଧର(୩୦) ଆର ଦୁଶମନ୍ତ(୨୭)କୁଁ ନେଇ ସଁସାର। ପରିବାରଟା ନିହାତି ଗରିବ୍, ଜମିବାଡ଼ି ଦୁଇ ଟୁକ୍ରି ରହିଛେ। ହେଲେ କୁଟୁମବସିଆ କୁଲିମଜୁରି କରି ଚଲୁଛନ୍। ଅଭାବ ଅନାଟନ ସବୁବେଲେ ଲାଗି ରହିଛେ। ସରକାରୀ ସାହାଯ୍ କହେଲେ ପରିବାରଟା ଅନ୍ତ୍ୟୋଦୋୟ ଅନ୍ନପୂର୍ଣ୍ଣା ଯୋଜନାରେ ମାସିକ ୩୫ କେ.ଜି. ଚାଉଲ ପାଉଛନ୍। ଏନ୍ତା ପରିସ୍ଥିତିରେ ଆଏଜ୍କେ ୭ ମାସ ତଲେ ରତନୀକଁର ଟୁଁଡ଼େ ଗୁଟେ ଘା’ ହେଇଥିଲା। ପରିବାର ଲୋକ୍ ତାହାକୁ ଆସରପାସର ଡାକ୍ତରଖାନାରେ ଦେଖାଲେ। ହେଲେ କିଛି ଲାଭ ନାଇଁହେଲା। ଏନ୍ତାଥି ଘରର ଖୁରିଗିନା ବଁଧା ପକେଇ ରତନୀକୁଁ ଚିକିଛା ଲାଗି ଭବାନୀପାଟଣା ଜିଲା ମୁଖିଆ ଡାକ୍ତରଖାନା ନେଇଥିଲେ। ସେଠାନେ ଡାକ୍ତର ପରୀକ୍ଷା ନିରୀକ୍ଷା କରି ଚିକିଛା ଲାଗି କଟକ ବଡ଼ ଡାକ୍ତରଖାନା ନେବାକେ ପରାମଶ ଦେଇଥିଲେ। ଟଁକା ପଏସା ଅଭାବୁ ହୀରାଧର ନିଜର ଦୁଇ ଟୁକ୍ରି ଚାଷଜମି ବିକି ରତନୀକୁଁ କଟକ ବଡ଼ ଡାକ୍ତରଖାନା ନେଇଥିଲେ। ସେଠାନେ ପାଖାପାଖି ୪୦ ଦିନ୍ ଧରି ଚିକିଛା କରାଲେ। ହେଲେ ଟଁକା ପଏସା ସରିଗଲାରୁ ହୀରାଧର ମୁହୁକାନ ଶୁଖେଇ ରତନୀକଁର ଅଧାତିଆ ଚିକିଛା କରି ଘରକେ ଫିରିଆଏଲେ। ସେଦିନ୍ଠାନୁ ରତନି ଭଗବାନ ଭରସାରେ ଘରେ ପଡ଼ି ରହିଛନ୍। ଇଆଡ଼େ ଚିକିଛା ଅଭାବୁ ରୋଗ୍ ଦିନୁଦିନ୍କେ ବଢ଼ତେଲ ଯାଉଛେ। ପରିବାରର ସ୍ବାସ୍ଥ୍ୟ ବୀମା କାର୍ଡ ରହିଛେ, ହେଲେ ସେଟା କିଛି କାମେ ନାଇଁ ଲାଗ୍ଲା ବଲି ପରିବାର ଲୋକ୍ ଅଭିଯୋଗ କରିଛନ୍। ଏନ୍ତାଥି ଇ ଦୁଖି ପରିବାର ଉପରେ ଜିଲା ପରଶାସନ ଆର ସୁଆସ୍ତିଅ ବିଭାଗ ଦୁରୁଷ୍ଟି ଦେଇ ରତନିକୁଁ ସରକାରୀ ଚିକିଛା ସାହାଯ୍ ଯୁଗେଇ ଦେବାକେ ଗଁାବାସୀ ଦାବି କରିଛନ୍। ଇ ବାବ୍ଦେ ଜିଲା ମୁଖିଆ ଚିକିଛା ଅଧ୍କାରୀ ଡା.ଜଗୁଲାଲ ଅଗ୍ରଓ୍ବାଲକୁଁ ପଚ୍ରାଲାରୁ ପରିବାର ଲୋକ୍ ରୁଗୀକୁଁ ଜିଲା ମୁଖିଆ ଡାକ୍ତରଖାନାରେ ଭରତି କଲେ ତାକର ପରୀକ୍ଷା ନିରୀକ୍ଷା କରାଯିବା। ଦରକାର ପଡ଼ଲେ ଅପରେଶନ ଟଁକା ବି ସରକାର ବହନ କରବେ ବଲି ସେ କହିଥିଲେ।
