ମାର୍ଶାଘାଇ,୨୭ା୪(ଡି.ଏନ.ଏ.): ଲକ୍ଡାଉନ ପରେ ବାହାର ରାଜ୍ୟରେ ଥିବା ଲୋକଙ୍କୁ ଆଣିବା ପାଇଁ ରାଜ୍ୟ ସରକାର ଯୋଜନା କରିଛନ୍ତି। ଏନେଇ ଆଶା, ଅଙ୍ଗନୱାଡି କର୍ମୀ ଓ ଏଏନଏମ କର୍ମୀ ଘରଘର ବୁଲି ବାହାର ରାଜ୍ୟରେ ଥିବା ଲୋକଙ୍କ ତଥ୍ୟ ସଂଗ୍ରହ କରୁଛନ୍ତି। ଯେଉଁମାନେ ଓଡ଼ିଶା ଆସିବେ ସେମାନଙ୍କୁ ୧୪ଦିନ କ୍ୱାରାଣ୍ଟାଇନ କେନ୍ଦ୍ରରେ ରଖାଯିବ। ସେଥିନେଇ ପ୍ରତି ପଞ୍ଚାୟତରେ କ୍ୱାରାଣ୍ଟାଇନ କେନ୍ଦ୍ର ପ୍ରସ୍ତୁତ ହୋଇଛି। ସୋମବାର କେନ୍ଦ୍ରାପଡ଼ା ଜିଲାପାଳ ସମର୍ଥ ବର୍ମା ମାର୍ଶାଘାଇ ବ୍ଲକର ମାର୍ଶାଘାଇ, ଅଙ୍ଗୁଳାଇ, ଜମପଡା, ବଛରାଇ ଓ କରିଲୋପାଟଣା ପଞ୍ଚାୟତର ୭ କ୍ୱାରାଣ୍ଟାଇନ କେନ୍ଦ୍ର ପରିଦର୍ଶନ କରିଛନ୍ତି। ଜିଲାପାଳଙ୍କ ଏହି ପରିଦର୍ଶନ ସମୟରେ ମାର୍ଶାଘାଇ ବିଡିଓ ଶ୍ରୀଧର ବିଶ୍ୱାଳ ଉପସ୍ଥିତ ରହି କ୍ୱାରାଣ୍ଟାଇନ କେନ୍ଦ୍ରର ପ୍ରସ୍ତୁତି ସମ୍ପର୍କରେ ଅବଗତ କରାଇଥିଲେ। ଜିଲାପାଳ କ୍ୱାରାଣ୍ଟାଇନ ସେଣ୍ଟରରେ ପରିମଳ, ସାନିଟାଇଜେଶନ ଓ ନିର୍ମାଣ କାର୍ଯ୍ୟକୁ ସୁଚାରୁ ରୂପେ କରିବାକୁ ଉପସ୍ଥିତ ସରପଞ୍ଚମାନଙ୍କୁ ପରାମର୍ଶ ଦେଇଥିଲେ। ବ୍ଲକର ଆୟତପୁର ପଞ୍ଚାୟତରେ ୨୧୬, ଆଖୁଆ ୯୮୫, ଅଙ୍ଗୁଳାଇ ୯୫୩, ଅନ୍ତେଇ ୯୫୪, ବଛରାଇ ୧୩୭୫, ବନ୍ଧକଟା ୭୫୩, ବଟିରା ୧୨୫୭, ବେରୁହାଁ ୭୨୭, ଦଶିପୁର ୬୫୫, ଦୁମୁକା ୬୬୦, ଗରଜଙ୍ଗା ୧୫୯୫, ହିନ୍ଦୁଳିଆ ୧୩୪, ଜଳପୋକ ୬୫୫, ଜମପଡା ୧୧୬୨, କରିଲୋପାଟଣା ୧୧୦୮, କୁହୁଡି ୯୪୦, ମଙ୍ଗରାଜପୁର ୪୦୨, ମଣିକୁଣ୍ଡା ୨୫୪, ମାର୍ଶାଘାଇ ୨୯୦, ମେହେନ୍ଦିନଗର ୧୨୫୯, ପରକୂଳା ୫୭୪, ରାଘବପୁର ୫୬୨, ଶିଳିପୁର ୫୬୦ ଓ ତାଳସଙ୍ଗାର ୫୯୪କୁ ମିଶାଇ ମୋଟ ୧୯୪୮୫ଜଣ ରାଜ୍ୟବାହାରେ ରହିଥିବା ବ୍ଲକ ପ୍ରଶାସନ ସୂଚନା ଦେଇଛି।
