କୋଇଲା ଖଣି ବନ୍ଦ ଘଟଣାରେ ସରପଞ୍ଚଙ୍କ ଅଭିଯୋଗ
8:51 amJune 11, 2019June 11, 2020 / 21

କଣିହଁ।, ୧୧ା୬ (ଡି.ଏନ.ଏ.)କଣିହାଁ ବ୍ଲକସ୍ଥିତ ଏମ୍‌ସିଏଲ୍‌ର କୋଇଲା ଖଣି କାର୍ଯ୍ୟ ରବିବାର ବନ୍ଦକୁ ନେଇ ମାମଲା ରୁଜୁ ପରେ ସୋମବାର ଖବରଦାତା ସମ୍ମିଳନୀ କରିଛନ୍ତି ଜରଡା ସରପଞ୍ଚ ସୁମିତ୍ରା ଦାସ। ଖଣି କର୍ତ୍ତୃପକ୍ଷଙ୍କ ସମେତ ମାଟିଉଠା କାର୍ଯ୍ୟ ନେଇଥିବା ଠିକାସଂସ୍ଥା ଅଧିକାରୀ ଦାଦାଗିରି କରୁଥିବା ସରପଞ୍ଚ ଅଭିଯୋଗ କରିଛନ୍ତି। ଅନ୍ୟପକ୍ଷରେ କଣିହାଁ ଥାନାରେ ସରପଞ୍ଚଙ୍କ ଅଭିଯୋଗ କ୍ରମେ ଖଣି ଜିଏମ୍‌ ଓ ଠିକାସଂସ୍ଥା ଅଧିକାରୀଙ୍କ ନାମରେ ନଂ. ୧୦୫ ଓ ୧୦୬ରେ ଦୁଇଟି ମାମଲା ରୁଜୁ ହୋଇଛି।
ସରପଞ୍ଚ ଦାସଙ୍କ ଅଭିଯୋଗ ମୁତାବକ, ଜରଡ଼ା ପଞ୍ଚାୟତବାସୀ କୋଇଲା ଖଣି ଯୋଗୁ ପ୍ରଦୂଷଣ, ପାନୀୟ ଜଳ ସଙ୍କଟ, ରାସ୍ତା ଓ ଅନ୍ୟାନ୍ୟ ସମସ୍ୟାରେ ଯୁଝି ହେଉଛନ୍ତି। ଖଣିରେ କ୍ଷତିଗ୍ରସ୍ତ ଲୋକଙ୍କୁ ଆଜି ପର୍ଯ୍ୟନ୍ତ ନିଯୁକ୍ତି କିମ୍ବା ଥଇଥାନ କରାଯାଇନାହିଁ। ଏ ନେଇ ବାରମ୍ବାର ଅଭିଯୋଗ, ଆନ୍ଦୋଳନ ସତ୍ତ୍ୱେ ସୁଫଳ ମିଳୁନି। ଗତ ୭ ତାରିଖରେ ସମସ୍ୟା ସମାଧାନ ପାଇଁ ପଞ୍ଚାୟତ ତରଫରୁ ସେ କଣିହାଁ କ୍ଷେତ୍ର ମହାପ୍ରବନ୍ଧକ ଓ ପ୍ରକଳ୍ପ ଅଧିକାରୀ, ତାଳଚେର ଉପଜିଲାପାଳ, କଣିହାଁ ତହସିଲଦାର, କଣିହାଁ ବିଡିଓ ଏବଂ ଆଞ୍ଚଳିକ ପ୍ରଦୂଷଣ ଅଧିକାରୀଙ୍କୁ ଲିଖିତ ଭାବରେ ଅବଗତ କରିଥିଲେ। ହେଲେ ଏହି ପରିପ୍ରେକ୍ଷୀରେ ତାଙ୍କୁ ଆଲୋଚନାକୁ ଡକା ନ ଯାଇ ସ୍ବାମୀ ରଞ୍ଜିତ ସାମଲଙ୍କୁ ଶନିବାର ପ୍ରକଳ୍ପ କାର୍ଯ୍ୟାଳୟକୁ ଜିଏମ୍‌ ଡାକିଥିଲେ। ସେଠାରେ ଜିଏମଙ୍କ ସମେତ ପିଓ, ଠିକାସଂସ୍ଥାର ଅଧିକାରୀମାନେ ଉପସ୍ଥିତ ଥିଲେ। ହେଲେ ସମସ୍ୟାର ସମାଧାନ ପରିବର୍ତ୍ତେ ସେମାନେ ତାଙ୍କ ସ୍ବାମୀ ରଞ୍ଜିତଙ୍କୁ ଗାଳିଗୁଲଜ କରିବା ସହ ଲୋକଙ୍କୁ ଆନ୍ଦୋଳନ ପାଇଁ ମତାଉଥିବା କହି ଧମକାଇଥିଲେ। ଏ କଥା ବାହାରେ ପ୍ରକାଶ କଲେ ଜୀବନରୁ ମାରିଦେବାକୁ ରଞ୍ଜିତଙ୍କୁ ଠିକାସଂସ୍ଥା ଅଧିକାରୀ ଏ. କେ. ଗାଙ୍ଗୁଲି ଧମକ ଦେଇଥିଲେ ବୋଲି ସରପଞ୍ଚ ଅଭିଯୋଗ କରିଛନ୍ତି। ଏଥିସହ ଖଣିରେ ବିଭିନ୍ନ କାର୍ଯ୍ୟରେ ଅନିୟମିତତା କରାଯାଇ ଦୈନିକ ଲକ୍ଷ ଲକ୍ଷ ଟଙ୍କା ଲୁଟ ହେଉଥିବା ସରପଞ୍ଚ ଅଭିଯୋଗ ଆଣିଛନ୍ତି। ଏହାର ଉଚ୍ଚସ୍ତରୀୟ ତଦନ୍ତ କରାଯିବାକୁ ସେ ଦାବି କରିଛନ୍ତି।
ଏ ନେଇ କଣିହାଁ ଥାନା ଅଧିକାରୀ ପ୍ରଭାତ ତ୍ରିପାଠୀ କହିଛନ୍ତି, ସରପଞ୍ଚଙ୍କ ଏତଲା ଆଧାରରେ ମାମଲା ରୁଜୁ ହୋଇ ତଦନ୍ତ ଚାଲିଛି। ଅପରପକ୍ଷେ ୨ ଦିନ ହେଲା ଅଞ୍ଚଳବାସୀଙ୍କ ଆନ୍ଦୋଳନ ଯୋଗୁ ବନ୍ଦ ଥିବା ଖଣି କାର୍ଯ୍ୟ ସୋମବାର ଅପରାହ୍ନରେ ତାଳଚେର ଉପଜିଲାପାଙ୍କ କାର୍ଯ୍ୟାଳୟରେ ଆଲୋଚନା ପରେ ଆରମ୍ଭ ହୋଇଛି। ଏ ବାବଦରେ ଖଣି ଜିଏମ୍‌ ନାରାୟଣ ଦାସ କହିଛନ୍ତି, ସରପଞ୍ଚଙ୍କ ନାମରେ ତାଙ୍କ ସ୍ବାମୀ ନିଜ ସ୍ବାର୍ଥ ପାଇଁ କାମ କରୁଛନ୍ତି। ଏକଥା ଅଞ୍ଚଳବାସୀ ମଧ୍ୟ ଜାଣିଛନ୍ତି। ସ୍ବାର୍ଥ ହାସଲ ପାଇଁ ସେମାନେ ଏପରି କରୁଛନ୍ତି। ଯାହା ଅଭିଯୋଗ ଆସିଛି ତାହା ସମ୍ପୂର୍ଣ୍ଣ ମିଥ୍ୟା ବୋଲି ସେ ପ୍ରକାଶ କରିଛନ୍ତି।