କଣିହାଁ, ୧୨ା୭(ଡି.ଏନ.ଏ.)-କଣିହାଁ ବ୍ଲକ ଅଞ୍ଚଳରେ କିଛି ଦିନ ହେଲା ୩ ହାତୀ ଆତଙ୍କ ଖେଳାଇଛନ୍ତି। ଗୁରୁବାର ହାତୀପଲ ଦଲକ, ତାଳପଦା, କଣିହାଁ, ହନୁମାନପୁର ପଞ୍ଚାୟତରେ ପଶି ବ୍ୟାପକ ଫସଲ ନଷ୍ଟ କରିବା ସହ ଘର ଭାଙ୍ଗିଛନ୍ତି। ଦଲକ ଓ ପୋଇପାଳ ବାସିନ୍ଦାଙ୍କ କହିବା ମୁତାବକ, ହାତୀପଲ ଗ୍ରାମରେ ପଶି ବହୁ ଲାଭକରୀ ଫସଲ ସହ ଆମ୍ବ, ପଣସ, ଅମୃତ ଭଣ୍ଡା, କଦଳୀ ଗଛ ଆଦି ଭାଙ୍ଗି ନଷ୍ଟ କରୁଛନ୍ତି। ଛତି ଭାନୁ, ପତୁରୁଆ, ଅଙ୍ଗାରୁଆ, ବାଲି, ବିଡିଡଣ ଆଦି ଜଙ୍ଗଲରୁ ହାତୀପଲ ଜନବସତି ମୁହାଁ ହେଉଛନ୍ତି। ତୁରନ୍ତ ଏହି ଅଞ୍ଚଳରୁ ହାତୀ ଘଉଡାଇବା ପାଇଁ ଦାବି ହୋଇଛି। ଏ ନେଇ କଣିହାଁ ବନାଞ୍ଚଳ ଅଧିକାରୀ ପ୍ରତାପ ରାଉଳ କହିଛନ୍ତି, ଦେବଗଡ ଜିଲାରୁ ୩ଟି ହାତୀ ପଶି କ୍ଷୟକ୍ଷତି କରୁଛନ୍ତି। ହନୁମାନପୁର, ରେଙ୍ଗାଳୀ ଫରେଷ୍ଟ ସେକ୍ସନରେ ଜଙ୍ଗଲ ମଧ୍ୟକୁ ବାଟ ହୁଡି ହାତୀପଲ ଗ୍ରାମରେ ପଶିଯାଉଛନ୍ତି। ବନାଞ୍ଚଳର ୩ ଫରେଷ୍ଟ ସେକ୍ସନ କର୍ମଚାରୀ ହାତୀ ଘଉଡାକାର୍ଯ୍ୟରେ ନିୟୋଜିତ ଅଛନ୍ତି। ରାଜ୍ୟ ସରକାର କ୍ଷୟକ୍ଷତିର ରିପୋର୍ଟ ନେଇ ବିଭାଗ ଜରିଆରେ କ୍ଷତିପୂରଣ ପ୍ରଦାନ କରୁଛନ୍ତି।
