ଅନୁଗୋଳ ଅଫିସ, ୨।୬- ଅନୁଗୋଳ ମେଡିକାଲରୁ ରେଫର ହେଉଥିବା ଗୁରୁତର ରୋଗୀଙ୍କ ମଧ୍ୟରୁ କେତେଜଣଙ୍କୁ କଟକ ବଦଳରେ ଅନୁଗୋଳର ଘରୋଇ ନର୍ସିଂହୋମ୍କୁ ନିଆଯାଉଛି। ଜିଲା ମୁଖ୍ୟ ଚିକିତ୍ସାଳୟରେ ସକ୍ରିୟ ଥିବା ଦଲାଲ ମେଡିକାଲର କେତେଜଣ କର୍ମଚାରୀଙ୍କୁ ହାତ କରି ଏପରି କରୁଥିବା ବେଳେ ଏଥିରେ ସରକାରୀ ଆମ୍ବୁଲାନ୍ସକୁ ବ୍ୟବହାର କରିବା ନେଇ ଗୁରୁତର ଅଭିଯୋଗ ହେଉଛି। ବାରମ୍ବାର ଏପରି ଘଟଣା ଘଟୁଥିଲେ ବି ମେଡିକାଲ ପ୍ରଶାସନ ସବୁଜାଣି ନୀରବ ରହିବା ଚର୍ଚ୍ଚା ହେଉଛି।
ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରୁ ଅନ୍ୟ ସରକାରୀ ମେଡିକାଲକୁ ରୋଗୀ ନେବା ପାଇଁ ସମୁଦାୟ ୫ଟି ଆମ୍ବୁଲାନ୍ସ ରହିଛି। ସେଥିମଧ୍ୟରୁ ୪ଟି ଛୋଟ ହୋଇଥିବାବେଳେ ଗୋଟିଏ ହେଉଛି ବଡ଼ ଆମ୍ବୁଲାନ୍ସ। ତେବେ ଅନୁଗୋଳ ମେଡିକାଲରୁ ରେଫର ହୋଇ ସରକାରୀ ଆମ୍ବୁଲାନ୍ସରେ କଟକ ଯାଉଥିବା ରୋଗୀଙ୍କ ମଧ୍ୟରୁ ଅନେକଙ୍କୁ କଟକ ନିଆଯାଉ ନ ଥିବା ଅଭିଯୋଗ ହେଉଛି। ଘରୋଇ ମେଡିକାଲ ସହ ସାଲିସ୍ କରାଯାଇ କେତେକ ରେଫର ରୋଗୀଙ୍କୁ ଉକ୍ତ ସରକାରୀ ଆମ୍ବୁଲାନ୍ସରେ ନର୍ସିଂହୋମ ନିଆଯାଉଥିବା ମେଡିକାଲର ଜଣେ ବରିଷ୍ଠ ଅଧିକାରୀ ନାମ ଗୋପନ ରଖି କହିଛନ୍ତି। ଏପରି ଘଟଣା ବାରମ୍ବାର ହେଉଥିଲେ ମଧ୍ୟ ଏବେ ତାହା ପଦାକୁ ଆସିଛି। ମେ ୨୫ରେ ଗୋଟିଏ ସରକାରୀ ଆମ୍ବୁଲାନ୍ସ (ନଂ. ଓଡି-୧୯-ଏଲ-୨୨୮୬) ଏକ ନର୍ସିଂହୋମକୁ ରୋଗୀ ନେଇ ଯାଇଥିବା ବେଳେ ସେହିମାସ ୩୧ ତାରିଖରେ ମଧ୍ୟ ଆଉ ଏକ ଆମ୍ବୁଲାନ୍ସ ନଂ. (ଓଡି-୧୫-ଜେ-୧୬୫୫) ଉକ୍ତ ଘରୋଇ ମେଡିକାଲକୁ ରୋଗୀ ନେଇ ଯାଇଥିବା କୁହାଯାଉଛି। ତେବେ ଘଟଣା ସମ୍ପର୍କରେ ଅନୁଗୋଳ ସିଡିଏମ୍ଓ ପ୍ରତାପ କୁମାର ବେହେରା କହିଛନ୍ତି, ଘଟଣା ସମ୍ପର୍କରେ ଜାଣି ନାହିଁ। ଅନୁଧ୍ୟାନ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
