ବନ୍ତଳା, ୧୫ା୬(ଡି.ଏନ.ଏ.)ଅନୁଗୋଳ ଜିଲା ସାତକୋଶିଆ ଅଭୟାରଣ୍ୟ ପମ୍ପାସର ରେଞ୍ଜ ଲବଙ୍ଗୀ ବିଟ ଜୋକୁବୁ ନାଳ ନିକଟରେ ଏକ ଅଣ୍ଡିରା ହାତୀ ଆହତ ଅବସ୍ଥାରେ ବୁଲୁଛି। ଏହାର ଶରୀରରେ ଗଭୀର କ୍ଷତ ଥିବା ଦେଖିବାକୁ ମିଳିଛି। ହାତୀଟି ସେହି ଅଞ୍ଚଳରେ ବୁଲୁଥିଲେ ହେଁ ବନ ବିଭାଗ ପକ୍ଷରୁ ଏହାର ଚିକିତ୍ସା କରାଯାଉ ନ ଥିବା ଅଭିଯୋଗ ହୋଇଛି।
ହାତୀଟି ଆହତ ଅବସ୍ଥାରେ ବନ୍ତଳା ରେଞ୍ଜ କନ୍ତମେଘ ଗ୍ରାମ ମଠ ନିକଟରେ ବୁଲୁଥିବାବେଳେ ଏପ୍ରିଲ ୨୧ ତାରିଖରେ ଦେଖିବାକୁ ମିଳିଥିଲା। ବିଭାଗ ପକ୍ଷରୁ ଏହାର ଚିକିତ୍ସା ନ କରାଯାଇ କେବଳ ସାତକୋଶିଆ ଅଭୟାରଣ୍ୟ ଭିତରକୁ ଘଉଡ଼ାଇ ଦିଆଯାଇଥିଲା ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି। ୩ ଦିନ ପୂର୍ବରୁ ହାତୀଟି ବନ୍ତଳା ରେଞ୍ଜ ବଲଙ୍ଗ ଗାଁ ନିକଟରେ ଥିଲା। ସେହି ସମୟରେ ପ୍ରାଣୀ ବିଭାଗ ଡାକ୍ତର ଏହାର ଚିକିତ୍ସା କରିଥିଲେ। ହାତୀର ଆଗ ଡାହାଣ ଗୋଡ଼ରେ କ୍ଷତ ହେବା ସହ ପଛ ବାମ ଗୋଡ଼ ଫୁଲି ଯାଇଛି। ବାମ ପେଟ ତଳେ ଏକ କ୍ଷତ ରହିଛି। ଆଖି ଦୁଇଟି ମଧ୍ୟ ନଷ୍ଟ ହୋଇଗଲାଣି। ବଲଙ୍ଗ, ତଳସିରା ଓ ଜୋକୁବୁ ଗ୍ରାମବାସୀ ଯାଇ ହାତୀକୁ ପଣସ, ଆମ୍ବ ଆଦି ଖାଇବାକୁ ଦେଉଛନ୍ତି। ହେଲେ ବିଭାଗ ପକ୍ଷରୁ ଠିକ୍ ଭାବେ ଏହାର ଚିକିତ୍ସା କରାଯାଉ ନ ଥିବା ଅଭିଯୋଗ ହୋଇଛି। ଏବେ ହାତୀ ପାଖରେ କେତେକ ବନ କର୍ମଚାରୀ ୩ ଦିନ ହେଲା ଜଗି ରହିଛନ୍ତି। ପୂର୍ବରୁ ଯଦି ଏହାର ଠିକ ଚିକିତ୍ସା କରାଯାଇଥାନ୍ତା ତେବେ ହାତୀଟି ସୁସ୍ଥ ହୋଇଯାଇଥାନ୍ତା ବୋଲି ପରିବେଶବିତମାନେ ମତବ୍ୟକ୍ତ କରିଛନ୍ତି।
ଏ ବିଷୟରେ ଅନୁଗୋଳ ଡିଏଫଓ ଭି. କାର୍ତ୍ତିକ କୁହନ୍ତି ହାତୀଟିର ବୟସ ଅଧିକ ହୋଇଗଲାଣି। ଏହା ଶରୀରେ ଥିବା କ୍ଷତ ଗଭୀର ହୋଇଛି। ଟ୍ରାଙ୍କୁଲାଇଜ କରି ଚିକିତ୍ସା କରିବା ହାତୀ ପାଇଁ କ୍ଷତିକାରକ ହେବ। ଡାକ୍ତର ଯାଇ ଚିକିତ୍ସା କରିଛନ୍ତି। ଏ ବିଷୟରେ ସାତକୋଶିଆ ଡିଏଫଓ ପି ରାମସ୍ବାମୀ କୁହନ୍ତି, ଖବର ମିଳିଛି। ହାତୀର ଚିକିତ୍ସା କରାଯିବ।
